日賣千袋七彩沙冰
轉角位嘅「避暑山莊」，最近係場內風頭躉！舖裏舖外塞滿人不特止，行街時不斷見到人拎住佢嘅袋裝、桶裝沙冰！舖頭由 4 個 90 後年輕人所開，佢哋唔係飲食界初哥，上年青衣戲棚要排足一個鐘先買到嘅桶裝梳打，正是佢哋出品！喺開舖前，佢哋先飛去韓國及泰國取經，周圍試飲當地至 hit 嘅飲品，試味之餘又參考包裝和賣相。店仔細細，飲品選擇多不得了！主要分成沙冰、雪葩、梳打、茶飲及特飲 5 大類別，每款超過 20 種口味選擇，有啲用連飲管嘅膠袋載住，拎住超方便；有啲用桶載，飲足一日，加埋會變色嘅幻飲星空沙冰系列，總共超過 100 款畀你揀！
（前）彩虹沙冰 $25、（後）銀河星空 $30
台內的人氣 No.1 飲品，試過一日賣出 1,000 袋！沙冰分 4 層，粉紅色是石榴味、綠色是青蘋果味、藍色是甘桔荔枝味、黃色是菠蘿味，好吸睛！銀河星空底層白色是荔枝檸檬味沙冰，藍色是泰國蝶豆花沙冰，蝶豆花遇到酸味檸檬沙冰，會變成淡紫色，好靚！
士多啤梨乳酸雪葩加小丸子 $30
採用新鮮士多啤梨果肉製作，果味天然，加埋自家製作嘅小丸子，口感煙煙韌韌，每日限量做到 50 份咋！
選擇恐懼症梳打 $25
桶裝梳打有近 30 種選擇，太多嘢揀做唔到決定，就揀「選擇恐懼症」梳打，由店員幫你話事，有時會是餐牌以外的配搭，好似呢杯紅蘋果石榴梳打，味道清爽。
皇家泰式奶茶 $25、泰式三色冰 $25
小店其中一位負責人是泰國混血兒，向媽咪學識沖泰國奶茶。茶葉是泰國貨，奶味濃但茶味較淡。泰國三色冰以椰奶做底，加綠色黃色嘅珍多冰，用袋盛載，好似係泰國飲一樣！
避暑山莊
地址：葵芳葵富路 7 號葵涌廣場 2 樓 2007 號舖
電話：從缺
營業時間：1pm-10pm
人氣至勁 $30 半板海膽手卷
七彩沙冰隔離個舖位堆滿人、打晒蛇餅，老闆一開舖即刻做到係停手，賣嘅係至 hit 嘅日本手卷！新開張有兩大皇牌大放送優惠，$29.9 就食到足半板海膽手卷，平到笑！金黃色嘅時令馬糞海膽鋪到就快滿瀉，賣相好吸引！食落雖然稱唔上鮮甜，但勝在無苦味怪味，水準不錯。除咗手卷之外，仲有卷物、炸物、燒物、刺身、魚生飯、壽司拼盤等超過 140 款食物選擇。小店仲放咗幾張枱仔畀客人立食，就連醬油種類都多過人，有日式豉油、芥辣豉油、柚子沙律汁、美式甜辣汁、鰻魚汁及番茄沙律汁共 6 款，好認真呢！
（左）半板海膽手卷 $29.9、（右）牡丹蝦海膽拼黑松露手卷 $29.9
海膽多到密不見飯，好足料！海膽呈金黃色，入口尚算軟滑，食落沒苦味及怪味。另一個大堆頭手卷，有原隻牡丹蝦、少量海膽及黑松露醬，唔使 $30，抵！
大滿足山 $29.9
睇 poster 見到刺身堆到成個山咁，可惜真身無咁澎湃，有啲失望！飯上鋪上玉子粒、青瓜粒、海膽、三文魚及吞拿魚粒，三文魚及吞拿魚粒食落有筋，影響口感。
大滿足
地址：葵涌廣場 2 樓號 2009 舖
電話：3188 3788
營業時間：12nn-10:30pm
超正改良版鹽水雞
由香港人主理嘅鹽水雞店，門前半開放式嘅雪櫃放了不同部位嘅雞件，提供 3 個套餐，分別是 3 隻雞翼、雞胸及雞髀，各配 3 款配菜，同售 $40，想再加料要另加 $5！配料有冷麵、杏鮑菇、秋葵、車厘茄、青瓜、芭樂、哈密瓜、魚片等選擇。老闆曾生是台灣鹽水雞的 fans，但覺得當地出品味道太濃，於是鑽研出改良版鹽水雞，秘密就在於調味料！
傳統的鹽水雞以麻油及大調味粉拌雞件，好惹味但略嫌太濃。小店提供 3 款醬汁，鹽水味醬汁用多種香料以長時間烹煮，味道較清，適合配蔬果。辣味則以秘製辣油加紅花椒粉調製而成，辛辣刺激。仲有老闆大力推介嘅泰辣味，以天然香料調配，酸辣醒胃。
B 餐（雞胸及 3 配料） $45
雞件以浸煮方法烹調，即使是雞胸都唔會嚡，肉質嫩滑。以泰辣味醬汁調味，香料味清香不俗，微酸開胃。
撈撈雞
地址：葵涌廣場 2 樓 2003 號舖
電話：從缺
營業時間：12nn-10pm
新鮮乳酪 自助 Topping 吧
（前）細乳酪杯（後）大乳酪杯 $19/100g
葵廣 2 樓小食店除咗夠平，仲有一個共通點，就係特別多年青人創業。呢間乳酪店嘅老闆係一位 24 歲嘅少女！首次創業嘅 Cindy，原本是個無乳酪不歡嘅 OL。既然咁愛乳酪，於是自己開舖，鍾意幾時食、食幾多都得！小店嘅 froyo 用咗新鮮乳酪加全脂牛奶製作，質地稠密厚身，但帶有少許冰感，略嫌不夠滑。Cindy 特意將乳酪的酸味減低，即使配士多啤梨及奇異果等帶酸的生果，都唔會酸到震，好細心！舖頭仲設有自助 topping 吧，畀客人自己落手加 topping，好玩！
乳酪分大（約 220g）及細（約150g）兩個 size，topping 由客人先自己落手加，新鮮水果、水果爆珠、椰果、朱古力彩針、OERO 粉、粟米脆片等 27 款咁多！仲有蜜糖、朱古力醬及士多啤梨醬揀㖭！隔離嘅小食店都係 Cindy 嘅，可以將雞蛋仔 crossover 乳酪一齊食！
My Star Yogurt
地址：葵涌廣場 2 樓號 2013 舖
電話：從缺
營業時間：12nn-10pm
跳樓價手卷
一山不能藏二虎？喺葵廣大大話話有 6 間日式手卷店，單係呢條短短嘅巷仔，己經有兩間，一頭一尾咁包抄住食街，而且兩間都有人龍，喺 2 樓平分秋色。壽司安嘅食物款式比較少，30 款手卷、14 款丼飯、4 款小食及 4 款卷物。選擇少仲有人排？因為小店定價夠低，辣味三文魚卷 $8、玉子手卷 $10、五色丼 $29、原板海膽丼 $68，簡直係跳樓價！手卷、丼飯等全部即叫即製，刺身每日新鮮由供應商直送到小店，三文魚無雪味、馬糞海膽足料，性價比高！
半板海膽手卷 $30
馬糞海膽沒腥味，紫菜夠脆、壽司飯微酸，不錯。
火炙芝士三文魚腩手卷 $23
三文魚腩好厚，加芝士用火槍輕炙，三文魚腩的油脂滲出被飯粒吸收，好滋味。
壽司安
地址：葵涌廣場 2 樓號 2002 舖
電話：9385 6539
營業時間：星期一、星期三至日 12nn-10:30pm，星期二 6pm-10:30pm
相關報導：
葵廣新發現！日賣過千 袋裝彩虹沙冰
旺中變新葵廣？帶你掃齊最新小食店
歡迎你 like 我哋 U Food Facebook Page / U Food Instagram ，取得我哋更新更快嘅資訊！
