邊款連鎖大牌 奶黃月餅最好食?

發佈: 2016.08.10
文:

介紹番,奶黃月餅熱潮其實喺 80 年代由半島嘉麟樓帶起,近年人人瘋搶,連帶大大小小連鎖個體戶餅店都紛紛推出。今年的連鎖品牌各出奇謀,奶黃月餅有的 sell 流心,有啲賣卡通包裝,有啲玩造型,有啲更賣大包送精品。但吃貨如我,最關心當然係邊款最好食啦!今日揀咗 5 個大型餅店品牌的奶黃月餅試食。

好食標準
點先為知好食?有以下兩大準則:
1 月餅餅皮厚薄適中,鬆脆得來不過黏,皮餡味道質感要配搭得宜。
2 奶黃餡要夠蛋黃香或奶油香。


註:今次試食的五款月餅均先放入微波爐叮熱 20 秒,令奶黃香發揮得更好。

凱施餅店


迷你奶皇月餅 $168 (原價)
睇凱施餅店的 facebook fan page,見到有迷你奶皇月餅盒宣傳,落去舖頭買,現時還未有盒裝現貨賣,幸好有試食散裝!玫瑰花造型好特別!淺色餅皮加上烘焗過的金黃色,令玫瑰花呈現出立體感!


餅皮:外皮太軟身,用手拿起很黏手;但咬落餅餡又不夠鬆軟,外軟內硬。
餅餡:只有淡淡奶味,蛋黃香不足,不似同類月餅有鹹香。
總評:雖然味道較平庸,但玫瑰花造型高貴且外間少有,好特別。價錢亦較其他品牌化算,期望包裝盒設計可挽回分數。

凱施餅店(鰂魚涌分店)
地址:鰂魚涌英皇道 981 號 A 地下
電話:2562 0033
註:即日至 8 月 14 日前,可以特價 $148 訂購 8 件裝奶皇月餅(原價 $168)。

聖安娜餅屋


金沙軟心奶黃月餅 $308(零售價)
今次比拼實力最平均嘅係聖安娜餅屋嘅「金沙軟心奶黃月餅」,包裝不花巧,但香檳色配花綫條都算高貴。


餅皮:餅皮咬落唔會過腍,呈金黃色澤,質地夠乾爽,甘香得來仲帶少少脆。
餅餡:叮熱後餅心湧出金黃奶黃餡,奶香和蛋香配合得好,質地均勻細滑,不會太甜。
總評:餅上刻上「有口福」三個字無呃人,食奶黃月餅預咗甜,但能夠將奶、蛋黃、外皮配合得均勻,甜味合度,仲有流心,層次豐富。


Emoji 奶黃月餅 $188(零售價)
除咗傳統奶黃月餅,餅店仲有另一款獲獨家授權的「Emoji 奶黃月餅」,包裝已經係 Emoji 得意樣,月餅更有 4 款不同 Emoji 表情,拆開送畀唔同面口嘅朋友,正!

聖安娜餅屋
電話:2991 6677
註:金沙軟心奶黃月餅 (零售價 $308),早買優惠(即日至 8 月 18 日) $160;MasterCard 早買優惠(即日至 8 月 18 日)$155。Emoji奶黃月餅(零售價 $188),早買優惠(即日至 8 月 18 日) $ 108。

美心西餅


流心奶皇月餅 $326
美心月餅一向受歡迎,喺預訂時段已買少見少嘅皇牌月餅「流心奶皇月餅」,係品牌舊年首始創嘅重點月餅,包裝超靚,四四方方,墨綠色襯金色,仲有壓花同兔仔圖案,一啲都唔老套。


餅皮:未叮熱前外皮色澤顯得淡黃,但叮熱後變得金黃香脆,有少少黏口。
餅餡:切開即見流心奶黃餡湧出,好吸引!奶黃餡料蛋香及奶味兼備,甜度適中。
總評:流心效果做得很好!味道不俗,加上包裝精緻,送禮一流。

美心西餅
電話:2101 1333
註:即日起至 8 月 15 日可以特價 $208 購買 8 件裝(原價 $326)。

超羣餅店


奶黃月餅 $169 (零售價)

老字號超羣都有「奶黃月餅」,標榜用日本麵粉、法國淡忌廉及日本海藻糖製作,用料揼本有誠意。


餅皮:用手捏起已有少許餅皮黏手,切開時餅皮輕微碎開,太軟身。
餅餡:奶黃餡過甜,有點似墨西哥包味道,鹹香不足。
總評:童年情懷超群出品唔失禮,加分位係橙色及月兔餅盒設計,好搶眼,而且有凹凸壓花,有心思。

超羣餅店
電話:2371 6350
註︰ 月餅原價 $255 ,特價 $168,以富邦銀行信用卡購買折扣為 $159(優惠期到 9 月 9 日)

A1-Bakery Group


Doraemon 中秋限定「金紗月菓」$158
「A1-Bakery Group 金紗月菓」奶黃月餅感覺較新派,今年亮點一定係以多啦 A 夢做主角,包裝同月餅造型都有佢嘜頭,仲有個小小手挽袋,Fans 必買!


餅皮:色澤淡黃,咬落黏口,似食菠蘿包皮,質感不夠鬆化。
餅餡:內餡略嫌硬實,咬開後湧出過濃甜味,掩蓋蛋黃香及奶香,欠缺入口即融感覺。
總評:月餅叫「金紗月菓」,食落太甜;不過多啦 A 夢造型包裝挽回不少分數,月餅外型以佢嘜頭及頸上噹噹造型設計,夠晒可愛,月餅盒亦以叮噹大頭設計,仲隨月餅送多啦 A 夢獨家手挽袋一個,Fans 買嚟儲都化算嘅。

A1-Bakery Group
電話:2634 1188
註:即日起至 8 月 22 日,可以優先價 $148 購買 Doraemon 中秋限定「金紗月菓」禮券。

同場加映另類奶黃口味


如果傳統奶黃月餅唔夠滿足你好奇心,不如試下奇華新推出嘅奶黃月餅。有「蜜餞子薑奶皇月」及「柚子奶皇月」,薑奶味配搭大膽又新鮮,粒粒蜜餞加薑肉刺激胃口;柚子則較清香,配奶黃可減少膩滯感。緊美食博覽現場有優惠,兩種口味奶黃月餅原價 $135,會場可以優惠價 $100(6個裝)買到。


蜜餞子薑奶皇月 $135


柚子奶皇月 $135

奇華餅家
電話:2785 6066

文:Celia、攝:Keeyau

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more