小儀:西貢男孩燒烤店

發佈: 2016.08.16
文:

圖中笑容好燦爛又勁玩得嘅,就係我想推介大家嚟試下佢手勢嘅大廚 Bao La,唔係西貢嚟嘅男孩,佢係澳洲長大嘅越南人,爸媽喺當地開餐館,由越南大廚養大,煮餸自然有一手啦。

唔係我吹水呀,Bao La 有晒暖男特質,超細心㗎(我講煮嘢食呀......)大家可能對越南菜嘅印象仲停留喺生牛河、蒸米卷,但原來燒烤越南人都好耍家,不過香港啲越南菜館最多都係得串燒,所以香港人唔多知。但 Bao La 見咁情況,就專攻越式 BBQ,材料都高級咗,用本地三黃雞、澳洲和牛、街巿買來的新鮮蝦、游水鱲魚等。

最吸引我眼球嘅,係 Banh Xeo,最初 load 呢個餸出嚟真係唔知點入手,大廚話呢個係越式 crepe,面層會蛋皮燒得極脆,食嗰陣搣出脆蛋皮,將裏面啲蝦、芽菜、辣腸、香料同旁邊嘅生菜放上去食,OMG!我食到辣椒,辣爆呀,嗜辣嘅朋友係咁正呀正呀咁嗌。搣下搣下就成份食晒,惹味香口得嚟又 refreshing。

我都好 like 隻黃油雞呀,唔知 Bao La 用咗乜方法,將隻雞烤到皮勁脆,但雞肉又多汁,最正係係醃到辣辣哋,又有雞油,佢提醒我一定一定要試將啲雞包埋米紙、喇沙葉、青瓜、紫蘇同薄荷葉一齊食,唔得了!個米紙好煙韌,仲勁有米味,Bao La 話係新鮮製㗎,唔係街外嗰啲咁冷藏,掂!眨下眼食晒一叠米紙,大廚醒多幾張嚟好喎。

差啲講漏咗啲醬汁,會同燒烤一齊上,沙嗲、魚露、海鮮醬、菠蘿鯷魚醬全部都係 Bao La 的心血,佢話無咗呢啲咁正嘅醬,燒烤就無咗靈魂,所以開店嗰陣,佢專登嚟澳洲運咗偉大嘅媽打嚟監督,Bao La 媽媽係越南菜老手,Bao La 都係用佢配方,菠蘿醬激正,配香口濃味嘅和牛,即係清新咗,仲吊起肉味㖭。


les amoureux $88


Rangers Valley Wagyu Bavette steak(400g)$348


Yellow Chicken(half)$188


Lemongrass chicken skewer $127


Banh Xeo $148
12 米紙及蔬菜(附送)
個米紙簡直係人間極品,裏面的有味喇沙葉同紫蘇,夾燒烤吃一流啊!



醬汁用 Bao La 家傳秘方製,用來配燒烤菜一流,我最鍾意是花生沙嗲醬及菠蘿鯷魚醬。

Le Garçon Saigon

地址:灣仔永豐街 12-18 號地下
電話:2455 2499
營業時間:6pm - 11pm

文:小儀、攝:Lok

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】位元堂養生花茶系列!↓

↓ 選用優質草本成分!/ 無添加香料同防腐劑!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more