掃街嘅戰綫已經迅速蔓延，由地舖鬥到上商場舖！葵廣可以話係商場小食街嘅發源地，日式手卷、台式飲品、雪糕、台灣芋圓乜都有！近日冒起嘅旺中，食物選擇同葵廣差不多，勝在地點就腳，新場環境乾淨啲！究竟葵廣會贏在起跑綫上，定係會被旺中後來居上？今次比較吓兩個場嘅日式手卷店同飲品選擇，邊個場吸引啲，就去掃邊個！
旺中係食場新力軍，用成個葵廣去做比較確係唔公平！我今次揀咗葵廣 2 樓新開小食街嘅手卷店同旺中較量。清楚遊戲規則？兩大食場拗打瓜，開始！
旺中代表 1 ：膽量十足 手卷駅
先嚟旺角中心嘅手卷駅，開咗唔夠 2 星期，已經儲咗唔少回頭客。小店有手卷、手握壽司、火炙壽司、卷物及小食 5 大類，總共近 60 款選擇，壽司每件 $5-$12 不等，最平嘅手卷好似松葉蟹棒 $13，一份 4 件的卷物 $18 就有交易，小食最貴都只是 $15，好抵食。最重要係佢地製作夠認真，庶渣價錢燒鵝味道！不過講到最受歡迎嘅一定係海膽手卷，睇吓有幾巴閉！
全板海膽手卷 $45
| 分量： | 海膽分量多到睇唔到底層嘅飯！因為小店用咗全板海膽，仲要賣 $45 跳樓價，抵！ |
| 賣相： | 呈橙黃色嘅海膽每片都好似手指頭咁大片，每塊都好完整而且好厚肉。 |
| 飯： | 飯微暖、飯粒軟糯，醋味適中唔會太酸，仲有驚喜位，中間仲夾住幾片海膽！紫菜用暖盒保溫及保持乾爽，食落脆口。 |
| 味道： | 小店現時用咗大連馬糞海膽，味道鮮甜又 creamy！海膽每隔 2-3 日返貨，新鮮沒苦味，帶甘香。遲啲仲會轉用味道更鮮甜嘅韓國紫膽，難怪成為人龍店！ |
手卷駅
地址：旺角中心第一座 2FSA30A 舖
電話：5281 3548
營業時間：12nn-10pm
旺中代表 2：僅僅合格 築卷
旺角中心 2 樓只得一間日式手卷店，所以要搵埋 1 樓嘅外援「築卷」幫手！開咗 2 個月嘅築卷是第到代進駐旺角中心啲小食店，主打日式手卷，睇吓個餐牌有至少 30 款嘢揀，選擇困難又發作！
海膽拼三文魚手卷 $45
| 分量： | 小店出名玩雙拼，負責人就推介呢款必試嘅海膽拼三文魚手卷。材料雙拼但海膽嘅分量唔算勁少，大約有 10 片海膽。 |
| 賣相： | 負責人表示海膽手卷是店內嘅人氣 no.1，韓國馬糞海膽每日返貨，橙黃嘅海膽大片厚身，可惜有少少出水嘅情況。 |
| 飯： | 飯粒比較軟身，醋味唔太明顯。紫菜亦比較腍，唔係一咬即開，食得有啲狼狽。 |
| 味道： | 海膽入口黏黏哋，味道帶苦、食唔到鮮甜嘅味道，眾店之中味道比較遜色。 |
築卷
地址：旺角中心第 1 樓 F123A 號舖
電話：6346 6477
營業時間：12nn-10pm
葵廣代表 1：勝在夠平 大滿足
位於葵廣 2 樓嘅大滿足，開咗兩個月左右即成人龍店。手卷之外，仲有卷物、炸物、燒物、刺身、魚生飯、壽司拼盤等超過 140 款食物選擇，好似放題店咁多選擇，簡直是麻雀雖小，五臟俱全！
半板海膽手卷 $29.9
| 分量： | 4 行、約 50 克嘅海膽鋪滿晒個整個手卷嘅表面，店方表示是用咗韓國馬糞海膽，拎上手都感受到個重量，有半板分量，賣 $29.9，計番唔算最平，但分量少啲，啱晒胃口細小嘅女生。 |
| 賣相： | 海膽呈橙黃色，顏色好 sharp，每一塊都好完整，但就唔夠厚身。 |
| 飯： | 飯身頗熱，暖笠笠咁搞到紫菜都變濕而且腍晒！醋味適中，中間夾咗啲青瓜絲，食落無咁單調。 |
| 味道： | 海膽質地 creamy，味道稱唔上鮮甜，但勝在無苦味怪味，唔腥唔臭，只是味道比較淡。 |
大滿足
地址：葵芳葵富路 7 號葵涌廣場 2 樓號 2009 舖
電話：3188 3788
營業時間：11:30am-10:30pm
葵廣代表 2 ：海膽新鮮 壽司安
喺大滿足嘅另一邊，有另一間人龍店壽司安。食物款式無大滿足咁多，30 款手卷、14 款丼飯、4 款小食及 4 款卷物。勝在價位勁低，辣味三文魚卷 $8、玉子手卷 $10、原板海膽丼 $68，平靚正！
半板海膽手卷 $30
| 分量： | 小店只有半板海膽手卷，全板嘅只得丼飯。畀足半板海膽，算足料。 |
| 賣相： | 海膽呈哪淡黃色，瓣塊尚算大，海膽唔算好厚身，但每一片都好完整。 |
| 飯： | 紫菜夠脆、壽司飯微酸。 |
| 味道： | 馬糞海膽雖然唔夠鮮甜，但唔腥唔臭無苦味，海膽算好新鮮，唔會有出水嘅情況。 |
壽司安
地址：葵芳葵富路 7 號葵涌廣場 2 樓號 2002 舖
電話：9385 6539
營業時間：星期三至一 12nn – 10:30pm，星期二 6:00pm – 10:30pm
總評：
食完一大輪，雖然幾間舖頭叮噹馬頭，都係要決勝負嘅！小編覺得旺中嘅手卷駅最高分！海膽手卷無論在海膽分量、新鮮度、味道，以至飯的味道都係 4 間之中最出眾嘅，價錢亦合理，係我目中嘅no.1！但如果你行開葵廣，我就推介壽司安，同是半板海膽手卷，價錢比同場嘅大滿足貴 1 毫子，但海膽味道較好，刺身嘅嘢，都係食新鮮好！
文：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
