最有 feel 舊冰室地圖

最Hit食訊

發佈: 2016.08.18

文:

電影常客戲味十足中國冰室
要數九龍西最有特色最有 feel 冰室，一定係「中國冰室」！開業 50 多年，室內一磚一瓦依然保持完好，地下連閣樓兩層空間寬敞，室內卡位雅座仲以為回到 70 年代，所以《PTU》、《迷離夜》、《新不了情》等等經典電影都在此處取景，環境戲味十足。

冰室招牌貨係好出色嘅「鴛鴦冰」($25)，即是紅豆＋蓮子冰，中間一枝冰柱，最底層係軟糯蓮子、中間係彈牙紅豆，最上層係香滑花奶，三個層次睇晒，女仔飲一杯夠飽肚。另外仲有甜食嘅「牛奶通粉」($25)，以牛奶湯底煲的通粉食落好香滑，懷舊之餘，當早餐一流。

不過去到呢間冰室主要都係食環境，欣賞下吊扇、卡位座、紙皮石牆壁，聯想番電影情節感受氣氛，打卡勝地。

樓上雅座有木枱木凳卡位，係十分正嘅蛇王閣樓，坐低慢慢歎杯凍啡或鴛鴦冰。

兩層樓底，空間闊落不擠迫。

舊日冰室沒有冷氣，就靠幾把吊扇吹風。到七十年代中期才開始裝冷氣，「冷氣開放」成為了街坊食客聚腳的好地方。

紙皮石地磚、瓷磚牆身，舊時每日都勤力抹乾淨，四十幾年如一日的新簇。

舊日冰室自設餅房，有自家焗蛋撻、麵包、西餅等新鮮出爐；但今日已改用來貨麵包蛋撻取代新鮮製造了。

中國冰室
地址：旺角廣東道 1077A 號地舖
電話：2392 7825
營業時間：6am-7pm

自設工場新鮮造餅麗香園冰廳
現在要買西餅蛋糕，都是去大型連鎖店，舊日吃貨想買奶油生日蛋糕有乜得揀呢？原來係去冰室。到今日仍然自設餅房工場的麗香園冰廳，西餅麵包仍舊每日新鮮出爐，外面難尋。蝴蝶酥餅、忌廉筒、奶油西餅，懷舊老餅仍有供應，「老餅」去懷舊一流。除了食餅，仲有樽仔奶茶都好出名，奶味夠濃無走味。

自家餅房出品西餅好受歡迎。

蝴蝶酥餅、忌廉筒、奶油西餅好多選擇。

整餅師傅在整忌廉筒，如今難得一見了。

樽仔奶茶濃香，配西餅一流。

整餅焗爐充滿歲月痕跡。

手沖奶茶方法超傳統

舊茶餐廳格局，好多街市檔販和街坊來打躉。

麗香園冰廳
地點：佐敦新填地街 38-40 號地下
電話：2780 4009
營業時間：5:30am-7pm

行運一條龍！鴻運冰廳餅店
七八十後嘅朋友無乜可能唔識周星馳電影，例如「行運一條龍」，就係當時必睇嘅賀歲電影，何金水打工嘅茶餐廳就係呢間「鴻運冰廳餅店」，係咪好熟面口呢？

同麗香園一樣，鴻運自設餅房同廚房，開業 60 多年仍然保留舊冰室建築特色：分上下兩層，大門兩則擺放西餅麵包凍飲，中庭闊落，樓上有陽台式閣樓做蛇竇。細心位係樓梯扶手用桃木裝飾，天花掛有舊上海銅製雕花吊燈，閣樓的圓角木製冷氣槽，還有中式傳統「萬字」圖案的牆角綫，每個細節都非常華麗。

至於美食，有「星爺都專登嚟買蛋撻食」嘅牛油皮蛋撻，用靚牛油搓皮兼落足蛋，食落鬆脆香甜，每小時出爐都極速去貨。另外仲有自家製椰撻、蝴蝶酥、夾心花餅、合桃蛋糕、蛋卷、杯子蛋糕同燒餅等，下午 3 點 3 準時嚟歎餅飲奶茶，街坊價高享受。

牛油蛋撻黃靚蛋香，蛋漿比較結實。

椰撻、蝴蝶酥、合桃蛋糕，件件西式「老餅」街坊價價廉物美。

鮮茄焗牛肉飯番茄香無死鹹，個芡打得好，牛肉更用上鮮牛。

冰廳有上下兩層，中庭闊落，樓上係蛇竇勝地。

樓上格局都係卡位同長枱，留意天花有中式傳統「萬字」圖案的牆角綫，裝修仔細。

鴻運冰廳餅店
地址：旺角上海街 726 號地下
電話：2392 6038
營業時間：6am - 8pm

屋企的味道大利冰室
深水埗總係人多雜亂，其實向荔枝角道方向走，近北河街位置，碼頭已變成填海地，份外寧靜的街道還有一間「大利冰室」，已有 50 多年歷史。89年頂手的老闆梁太將冰室維持原貌，例如綠色牆身與卡位桌椅。招牌菜有巴西豬扒，只用簡單的鹽、糖、豉油醃香再煎，陣陣屋企味道，吸引街坊日日來吃豬扒飯，份外親切。