好玩！自己串燒自己燒

因想增加客人食飯時同食物的互動，又見韓燒、港式BBQ都流行自己燒，於是力sell 「自己串燒自己燒」的 concept，在每張桌上都放了一個日本入口的串燒gas爐，又在上面裝了個食韓燒時常見到的抽油煙設備，等客人可廚神上身自己燒，生熟度同調味都可以自己話事，有得玩有得食仲唔使擔心食到成身油煙味。

唔只自燒自食的 gimmick 對準年青人鍾意有得玩的 market，食物選擇都比坊間港式串燒店有心思，大路的豬牛雞海鮮同蔬菜固然齊備，店子仲有個好玩又好食的鐵板同煲仔系列，俾你放埋上串燒爐燒。好似窩蛋菜甫玉子燒，其實係住家菜菜甫炒蛋的變奏，客人先將粒粒帶甜的日本玉子在鐵板上煎香，再淋上蛋漿同菜脯粒，最後食到的蛋是滑是金黃定焦香，就要看你的功架。煲仔系列則有麻甩的川式麻辣牛骨髓、薑蔥廣島蠔等，味道盡鎖於煲仔內，愈燒愈入味。

飲品同樣有亮點，好似啤酒，除了逐杯點，仲有款 Fun Fun 斟手工啤酒，客人可自己飲幾多斟幾多，按毫升收費，夠晒均真；不好酒精的推介你試沙冰，口味好特別，竟然用自家煲的腐竹糖水、番薯老薑糖水同冬瓜檸檬水來做！難得味道少甜傳神、沙冰口感又夠幼滑，用來送熱辣辣的燒物好正。

黑白糯米紫薯椰漿甜竹筒飯 $43
黑白糯米飯加入椰漿又混入紫薯粒，跟timer燒13分鐘就食得，米粒索滿竹香同椰子香，仲好有咬口。

川式麻辣牛骨髓 $30
軟滑的牛骨髓加了自家用十多款香料調製的麻辣醬調味，用小煲上，愈燒愈入味。

窩蛋菜甫玉子燒 $33　
菜脯炒蛋變奏版，先將日本入口的玉子粒迷你鐵板上煎香，再加入蛋漿和菜甫粒，食落咸甜有致，口感豐富。

惹味黑松露墨魚滑 $48　
自家每天用新鮮墨魚加黑松露醬打成，鮮甜彈牙，仲食到少少墨魚粒。

腐竹糖水沙冰 $29　
將腐竹糖水做成沙冰，用來送熱辣辣的燒物，好爽！沙冰帶濃濃的腐竹香，冰粒打得夠幼滑。

Fun Fun斟手工啤酒 $0.15/ 毫升　
飲幾多斟幾多，收費按毫升計算，每天供應一款手工啤酒，採訪當天就是日本的COEDO。

每張枱都有一部小小的燒烤爐，油煙小，易控制，自己燒自己食，別有一番樂趣。

店子仲提供大量調味粉，每兩位可免費選一款，或可另加$5要多一款，有梅粉、咖喱粉、香菇粉等選擇，令食物味道更多姿多彩。


每張枱仲有本「烏龍秘笈」，裡面寫滿了燒不同食物的小貼士。

烏龍燒
地址：旺角染布房街白布街交界藝興大廈地下14 號舖
電話：2336 7370
營業時間：星期日至四 6pm-3am，星期五及六 6pm-4am
收費：現金及信用卡，不設加一
交通︰港鐵旺角站 E2 出口
泊車︰金雞廣場 $23/hr
平均消費：$150

文︰Amy、攝：Ken

歡迎你 like 我哋 U Food Facebook Page / U Food Instagram ，取得我哋更新更快嘅資訊！