即將進駐尖沙咀金馬倫道嘅 L'attitude x Ruimilk，主打賣相靚靚嘅韓式軟雪糕。 招牌烏雲雪糕跟韓國大熱嘅 Remicone 出品好似樣， 不過雪糕店原來跟 Remicone 無關係， 反而是與起源自中國嘅 Ruimilk 合作開設。 Ruimilk 嘅老闆是中韓混血兒，於上海開設首間店， 一年內開咗過百間分店，期後更衝出亞洲，去美國紐約插旗！
軟雪糕暫時只有牛奶及朱古力味兩款，店方表示遲啲會加入香港店獨有嘅口味！牛奶雪糕每日於店內用澳洲鮮奶、歐洲淡忌廉及雪糕粉新鮮即製。香港店嘅牛奶雪糕甜度跟總店一樣，但奶味則會輕微減少，食落感覺會 light 啲。朱古力味雪糕則用 60% 巴西精品可可豆 AMMA 製成，朱古力味香濃，雪糕質地比牛奶雪糕厚實。
烏雲軟雪糕 $42（牛奶）、$44（牛奶 mix 朱古力）
店內有 12 款雪糕畀你揀，全部都是以「相機食先」為宗旨，唔靚唔賣！不過講人氣及賣相， 一定係「烏雲軟雪糕」，牛奶雪糕嘅頂層放上大大嚿灰色薄荷味棉花糖，好吸睛！原來嚿烏雲加咗墨魚汁染色，製作出灰灰黑黑嘅烏雲效果。食落完全無墨魚汁味，唔會有腥味。棉花糖下面嘅牛奶雪糕，加咗少許爆炸糖，香滑嘅雪糕食落竟然會於喺口腔滋滋作響，好爆趣！
店員教路，先將烏雲食一半，然後將餘下嘅棉花糖拌雪糕食，食法好過癮，但味道偏甜。
夢幻熱氣球 $46
棉花糖系列雪糕仲有呢款夢幻熱氣球，一樣咁搶鏡！牛奶雪糕上面用百力滋撐起紅色嘅士多啤梨棉花糖，個樣超靚超夢幻！加埋棉花糖粒、 士多啤梨朱古力餅乾條及士多啤梨糖漿，好 sweet 好豐富！
粉紅蓬蓬裙 $46（牛奶）、$48（牛奶 mix 朱古力）
賣相靚靚嘅又點止兩款咁少！店內唯一用脆筒盛載嘅雪糕，可以揀朱古力及牛奶扭紋雪糕，雪糕面仲有士多啤梨乾，旁邊圍上士多啤梨味棉花糖。不過食唔夠一半，棉花糖開始融化，仲有甩裙嘅情況，要快吃！
夏威夷海灘 $42
牛奶雪糕加上藍柑醬，再灑上椰子粉，酸酸甜甜，fresh！糖醬仲可以自己唧，好玩！
抹茶忌廉沙冰 $46
香港店限定飲品，將韓國抹茶粉加忌廉及鮮奶打成沙冰，質地幼滑，加埋一撮棉花糖，又一相機食先之作！
朱古力咖啡加棉花糖 $50
咖啡用本地咖啡名店 sensory zero 嘅咖啡豆，Mocha 會跟棉花糖分開上，將熱辣辣嘅 Mocha 倒入棉花糖內，睇住佢融化，感覺好治癒！
朱古力可可 $42（牛奶 / 牛奶 mix 朱古力）
朱古力味雪糕使用 60% 巴西精品可可豆 AMMA 製成，朱古力味濃郁，雪糕上放有法國進口嘅心形馬卡龍。
提拉米蘇 $42
將雪糕及蛋糕二合為一，分成 3 層的提拉米蘇先以牛奶雪糕及 Mascarpone Cheese 做底層，然後放上牛奶味手指餅碎。另一層再加入牛奶雪糕及咖啡，頂層再喞上雪糕並灑滿可可粉，食落有多重口感。
L'attitude x Ruimilk
地址：尖沙咀金馬倫道 19A
電話：從缺
Facebook：L'Attitude Hong Kong
註：店子預計於今個星期尾開業，詳情請留意其專頁公佈。
文：Jessie、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
