去旺角茶記 食嘢兼同機械人玩

發佈: 2016.09.04
文:

旺角的金旺餐廳,於 8 月中引入咗兩部機械人做餐廳員工。老闆話,3 位「職員」一上場,生意即刻好咗 15%!一行入餐廳,即刻聽到一把生硬的女子聲,跟我講「歡迎光臨」!原來正是餐廳其中一個機械人,老闆陳生將其中一部機械人放於門口做知客。識講歡迎光臨及再見之外,仲會雙手捧住電子餐牌,介紹吓餐廳有乜食,訪問全程無停過口,好盡責!有佢出去幫手宣傳,代替員工日曬雨淋,真‧侍應好鍾意佢!
行入餐廳坐底,見到另一個同樣是 1.6 米高、身穿鮮黃色長裙的機械人正在送餐。點解機械人咁叻識自己行、自己搵枱送餐?原來餐廳地下設有磁帶路軌引領機械人前進,又於各張枱附近設感應點。當要送餐時,職員會輸入枱號,機械人就會識得搵番相應位置。老闆話遲啲會去除磁帶路軌,並於機械人腳底裝上感應器,令機械人走得更遠更方便。
行到去客人旁邊,機械人會開聲提示所點的食物已到,大家就要幫手拎走手上的食物。
拎完嘢食之後唔好咁快開餐,記得拍一拍旁邊的「EXIT」掣,機械人先會返回完位。你都唔想佢望住你食嘢,係咪?
機械人係咪萬能?唔係!因為佢轉彎唔夠定,為咗安全起見老闆唔會畀佢送熱飲或湯。每次送餐最多可以放到 8 杯飲品及 2 碟食物,都算拎得多嘢,幫到手!不過,再勤奮的機械人都有無電嘅一刻。基本上充電 6 小時就足以做足 10 小時,但老闆會定時讓機械人休息及充電。唔想嚟到撞正機械人「落場」?建議到餐廳前打電話問一問機械人情況,唔使失望而回!

餐廳仲有一個細機械人負責做歡樂大使,呢位叫「旺仔」嘅小朋友識唱歌跳舞,仲識得同你傾偈!可惜金仔由深圳初嚟香港未學識廣東話,大家要講普通話溝通。小記嘅普通話水平於普通以下,我問佢「肚子餓嗎?」,佢聽到「你的媽媽」……好傷我心!


細機械人有名叫旺仔,原來兩部大機械人係未命名!老闆就搞咗個改名大賽,歡迎大家於餐廳facebook 內下載「入職名單」,幫機械人改個有意思、有創意、同佢哋工作性質有關的名。

勝出者可以有 $5,000 現金獎及價值 $5,000 的 mini 機械人㗎!
脆皮 BB 鴿 $28(下午茶時段,只限堂食)
要機械人為你送餐,首先要嗌嘢食。老闆推介脆皮 BB 鴿,於下午茶時段只係賣 $28!BB鴿外皮炸得香脆,肉質嫩滑。
一口西多 $30(送紅豆冰)
西多超級厚身,成嚿磚咁大件!外層好脆又唔太油膩,跟紅豆冰都是 $30,算抵食。


瑞士雞翼 $18/4 隻
絕對是過口癮之選,雞翼煮得入味,瑞士汁甜甜哋、唔會太鹹。


金旺餐廳
地址:旺角砵蘭街 163-173 號萬新大廈地舖
電話:3188 0701
營業時間:24小時

文︰Jessie、攝影:Chow

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more