美食沙漠 驚現靚爆海洋蛋糕

發佈: 2016.09.12
文:

試過這餐廳的出品,CP 值真不錯,真的造福天水圍、洪水橋同元朗街坊。這店好底調,開在私樓的會所內,但人人可來幫襯。最正係這裏面積極大樓底有 2 層高,加埋三邊都有大窗,唔迫夾又舒適。這裏由潛水發燒友 Johnny、媽媽 Winnie 及弟弟 Alan 開設,以海洋及潛水作主題,所以一室蔚藍,好似去咗希臘小屋咁,Johnny 仲僻咗一閣展覽潛水用具及產品,希望多啲同道人來交流。

巿區真係好難搵到呢種咁有空間感的 cafe,樓底差不多有 2 層高,又多窗戶,下午來好好 hea。配上海洋藍色做主調,襯返餐廳主題。
由於太愛海洋,食物有不少都是海鮮,有心位是廚師阿勇唔怕辛苦,天天去街巿買來游水貨,更不時以時令海鮮做 chef special,大家可以在這裏吃到生猛嘅 本地龍蝦及花蟹,游水虎蝦及琵琶蝦,阿勇曾在酒店任職,擅長烹調意法菜,配菜更會隨時因應時令蔬菜而轉款。

Ocean 二人餐 $298(另配湯、飲品、法式煎鵝肝各 2 份)
豬手以香草雜菜水烚入味,再炸至外皮脆身,皮脆裏面有滿滿的膠原。虎蝦是游水貨,簡單燒烤。巴西春雞起骨調味後在扒爐煎熟。另配酸椰菜及黑松露意大利飯。

法式原隻煙芝士鮮蟹 $128(包括沙律、湯及飲品)
新鮮的游水花蟹約有 12 両,好大隻,拆出蟹肉後會跟野菌炒香,再釀回蟹身,蟹身則以煙芝士煮,墊底有法式黑松露薯蓉。

活龍蝦米多拼牛柳 $168(包括沙律、湯及飲品)
約 1 磅游水本地龍蝦,釀入龍蝦肉、芝士及法式芥末,旁邊仲有美國牛柳及日日不同的薯菜,連 gravy 都是自家熬的。
來幫襯,不能試漏靚到哭嘅海洋蛋糕,甜品師正是 Alan,為配合海洋主題,就做了個食得落肚嘅 沙灘蛋糕,造型靚靚嘅 櫻花乳酪蛋糕及冰屋蛋糕都是招牌作,以淡忌廉代替鮮忌廉,也減了糖分量,甜品吃來健康少甜,好多老人家都愛吃。

海洋蛋糕 $28
蛋糕是減甜減膩版的德國芝士蛋糕,墊底是戚風蛋糕,上面放了以 Bols 橙酒做的寒天啫喱扮海,海沙則是酥皮碎,旁邊有翻糖蟹仔及貝殼。
最最最亮點係,定價真係幾低,有齊沙律、湯及飲品嘅扒類平均都係 $130-150,平過巿區最少 2、3 成,咁嘅質素同價錢,真係拯救咗這片美食沙漠。
地址:天水圍天湖路 1 號新北江商場 P 字樓 嘉湖會所
電話:2785 0909
營業時間:7:30am - 5pm、6pm - 11pm(last order 9:30pm)
收費:現金及信用卡,6pm 後設加一
交通:於天水圍西鐵站,轉乘 706 號輕鐵於樂湖站下車,步行 2 分鐘‧泊車:新北江商場 $16 hr
平均消費:午巿 $100、下午茶 $50、晚巿 $180
文:Sieg

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more