回到童年時 懷舊糖果大募集

發佈: 2016.09.04
文:

新版眼鏡朱古力
如果你係六七八十後,一定食過眼鏡朱古力!仲記唔記得個包裝?8 字形,左右加兩條橡筋,即刻可以戴上做眼鏡!呢款日本製造嘅鎖匙朱古力,係新版本,其實朱古力好甜,味道同而家的朱古力無得比,勝在情懷搭夠。細細粒容易食,一粒食完再搣一粒,滋味。




Chirin 鎖匙朱古力 $3.9 (A)

小學雞最愛 怪味朱古力豆
呢款「達輝朱古力豆」味道怪怪的,咬落好大陣香蕉味,每粒朱古力表面都有少少褪色,但又唔係過期或溶化,不過以前小學雞同學都好鍾意一次過成盒啪晒。


達輝朱古力豆 $5 (B)

拗斷一半慢慢嗒 唧唧冰
兒時的唧唧冰,通常係水果果汁味冰捧,去士多打開雪櫃,有提子味、青檸味、橙味、士多啤梨味等,款款都想食!我通常會拗斷一半同朋友 share。依家買到嘅係加奶嘅乳酪口味,酸酸咪咪又食到奶香,但就少了一份童年情懷。


COCON 水果冰捧 $12.9 (B)

黐牙都要食 大白兔糖
上海大白兔糖係必食嘅奶味糖,最過癮係包着糖的一層透明糖紙,兒時好鍾意咬走張糖,慢慢嗒到溶化,再食牛奶糖,又香又甜又有奶香,黐牙都要食。


上海大白兔奶糖 $19.9 (B)

生津解渴 酸味味金梅片
一開罐就停唔到口!金梅片係細個時溫書必食嘅零食,同阿媽講話食酸嚟溫書提神,其實只係食零食嘅藉口!酸咪咪,嗒嗒下好生津解渴。


KIMBUAY 金梅片 $8.5 (B)

一試愛上 清新蘋果糖
細個時日本零食未攻陷香港,所以見到 TINO 蘋果糖黑色簡約盒面設計,已經覺得好 high class,糖入口蘋果味清新唔過甜,好鍾意收埋一盒扮大人慢慢食。


Mikakuto UHA 味覺糖(TINO 蘋果糖) $9.5 (B)

三種 classic 味道 明治彩絲糖
明治彩絲糖有 3 種味道,分別係粉紅色花紋奶油味、綠色花紋乳酪味及啡色花紋咖啡味。小記問同事們細個鍾意食邊款,大部分都話鍾意食咖啡味,無錯!咖啡味好濃香,又不失奶味,兩者好平衡,食一粒,好似飲咗杯咖啡一樣!不過咖啡糖而家已經好難搵,市面上見到多數都係乳酪味。


Chelsea 明治彩絲糖 $11.9 (B)

食糖吹 BB + Mini 汽水糖
食得 BB 糖一定會當樂器用,因為放係兩唇中間可以吹 BB,仲幾響㖭!另外粉狀嘅罐仔糖,勁細粒好快食晒,牙痕時仲可以成罐啲,數分鐘內 KO!




(左) 小貝京 BB 糖 $4 (B)、Orion 迷你波子罐仔糖、提子糖及可樂仔 $3.9 (A)

汽水糖 + 勁香口吹波糖
去士多見到嘅汽水糖,通常都放在透明膠桶中任揀,食落有滋滋咋咋嘅感覺,好得意。至於蝴蝶糖膠味甚濃,唔明點解細個咁鍾意食!吹波珠每盒有 3-4 粒,又係好鍾意一次個放落口 chew 來 chew 去,吹波一流。


(左) 多慶屋松木汽水糖 $10 (C)、(中) Red brand tutti frutti 蝴蝶糖 $4、丸川吹波珠 10 個裝 $11.9 (A)


新包裝的汽水糖紙牌,更附送李商隱七言律詩一首,食糖都咁有詩意。

難求綠寶
綠寶橙汁大部分大朋友都聽過,不過現時好難搵到舊版綠寶,但小記去炮台山一間車仔麵店「萬歲」就搵到一枝泰版枝裝綠寶,味道都好相似,叫做飲番種老情懷啦。


泰版綠寶 $15 (D)


車仔店外有懷舊綠寶設計的海報,感覺懷舊。

銷售點:

A .好多多直銷中心.地址:大埔廣福里 13 號 A 地下.電話:2656 3614


B .味之誘惑.地址:調景嶺都會駅商場 L2-034 舖.電話:3153 2100


C.萬歲.地址:炮台山宏安道 2-12 號宏輝大廈地下 9 號舖.電話:3105 9681

D. アメ横丁.地址:太子彌敦道 751 號 C2 舖.電話:2320 1900

文:Celia、攝:Lok

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more