心心眼 靚爆玫瑰蛋糕

發佈: 2016.09.05
文:

呢個「玫瑰園」,喺中環威靈頓街的一間樓上 cafe,叫 Sogno Café+。每次來,都覺有新意,因為這裏會定期推出限定主題,早前就與本土地 Character Fluffy House 以其創作的 Character 聯乘推出甜品。今次輪到玫瑰系列,話事人 Big John 說:「每隔一段時間都會推出唔同主題甜品,上次係柚子系列,希望帶畀食客新鮮感。」


法國粉紅玫瑰蛋糕 $68
四層蛋糕是漸變粉紅色,食落鬆軟細滑夠濕潤,還透出淡淡的玫瑰花香,感覺好清新。

在 facebook 專頁看到的照片已經心心眼,尤其是 3 款玫瑰甜品法國粉紅玫瑰蛋糕,上面以淡粉紅 cream 整成玫瑰花,蛋糕是漸變的粉紅色;玫瑰慕絲綿花杯,就是近期吸 like 度極高的烏雲雪糕,mousse 棉花杯,上層粉紅色棉花糖灑上玫瑰花瓣,自拍一流;還有由澳洲 hit 到香港的玫瑰士多啤梨西瓜蛋糕,頂層以士多啤梨整成玫瑰花,中間食到西瓜,好睇又好食。


玫瑰慕絲棉花杯 $68
賣相好吸引!底層玫瑰果凍及慕絲溢出浪漫感覺,中間士多啤梨軟糕帶出酸香味道,而粉紅棉花糖,則灑上玫瑰乾花瓣,吸 like 指數爆燈。


玫瑰士多啤梨西瓜蛋糕 $68(只限星期五及日有售)
由澳洲 Black Star Pastry 帶起一陣西瓜蛋糕熱潮,cafe 也來湊熱鬧,仲玩升呢,加入玫瑰及士多啤梨,創出新味。西瓜先用玫瑰水浸泡,散發出淡淡玫瑰味;蛋糕灑上玫瑰花瓣及開心果碎,中間有玫瑰忌廉及杏仁蛋白,層次感極豐富。

甜品師 Ice 說:「食物唔止講求外觀,味道都研究咗好一陣子,如果用玫瑰精油,閒落會好香,但味道會好假,所以採用法國食用玫瑰來炮製菜式。」心機之作除咗甜品,連兩款鹹點都好吸引,好像和風玫瑰蘋果雞翼,炸過後再用蘋果玫瑰醬調味,外層香甜鬆脆,內裏好 juicy。仲有仲有,連意大利雲吞都做成玫瑰花形態,食落依然咁煙韌,用蟹及蝦做餡料,再加上番茄醬汁,酸香彈牙。5 款玫瑰系列,味道與賣相都各有個性,共通點係幽香得來不失天然。


和風玫瑰蘋果雞翼 $88
雞翼炸得金黃,再用自家製蘋果玫瑰醬拌吃,味帶酸甜,好得意。


海鮮芝士野菌意大利瑰麗雲吞 $88
以蝦、蟹肉、野菌巴馬臣 Parmesan 及格魯耶爾 gruyere 芝士作餡料,彈牙又香口;雲吞包成玫瑰形狀,再配以番茄醬汁,比一般意式雲吞加分。










在人來人往的中環,難得搵到一處以鬆一鬆的地方。Cafe 裝潢走簡約路綫,感覺舒服,每個角落都有個小擺設,可以自拍打咭,更有 Character Fluffy House 公仔售賣。


Sogno Cafe+
地址:威靈頓街 97 號威利大廈 2 樓 D
電話:2757 9878
營業時間:星期一至三 12nn-6:30pm,星期四至六12nn-10:30pm,星期日13:30pm-10:30pm
註:玫瑰系列供應期由即日至 10 月 15 日

文:Theo、攝:Kee

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more