湧出嚟啦!流心芝士治

發佈: 2016.09.05
文:

好多人係芝士控,一見到芝士就雙眼發光,勢估唔到,有人將平平實實的鹹牛肉蛋、蘑菇蛋三文治變成流心芝士版本。一切開,芝士、蛋汁湧晒出嚟,好澎湃呀!咁特別的三文治,我喺元朗新店 Whatever 搵到,啱啱先出,有流心芝士鹹牛肉蛋及流心芝士磨菇蛋 2 款,流到似瀑布咁,因為內裏放了原片車打芝士,靠師傅控制火喉,將普通牛治、蛋治升格做 2.0「流心」狀態,細細力可以拉出芝士絲,視覺超越三文治。

流心芝士鹹牛肉蛋三文治 $30/ 份,冰滴咖啡 $80/ 枝、$60/ 杯
鹹牛肉蛋治內藏流心車打芝士,即時變得不平凡,多士烘香微脆,跟綿軟餡料有對比。老闆揀尼加拉瓜冠軍單品豆做冰滴,經黑蜜處理,味道醇帶酒香,無澀味。
另一必試名物係「 瑞士汁乜乜乜」,有 雞髀、雞翼、豬頸肉,肯預訂的話,全雞都有得你食,見瑞士汁色水唔錯,顏色唔會過深,味道鹹甜適中,也不會太 sweet 蓋過食物原味。店主羅生話只係用咗豉油、糖、香料等調校,仲定時煮新的瑞士汁,保證瑞士汁食品賣相靚又夠味。所有雞髀、雞翼及豬頸肉,都係即叫即浸煮,需時 10 幾分鐘,好嘢要等。瑞士汁食品可揀 淨食,或配飯/ 丁麵/ 米粉/ 沙律,真心推介吃雞髀,皮爽肉嫩,仲要係美國無激素雞。
瑞士豬頸肉沙律 $34
瑞士汁豬頸肉甜甜鹹鹹的,肉質爽滑,沙律亦非閒角,雞蛋烚煮後,將蛋黃跟蛋黃醬、調味料拌好,只保留蛋白碎,有柯打才跟罐頭水果即時撈勻,好新鮮,所有食材質感分明,沒有糊成一團。
最最最新力作, 仲有 Whatever curry(素食),橙黃色咖喱內,雖只有簡單的薯仔、洋葱,但夠晒入味,刺激辛香,再配塊印度黃金烙餅,perfect match。他揀馬來西亞咖喱醬做,辣度夠但唔會 over,還加入椰漿及 secret 新鮮水果烹調,增加香滑度。推出以來,客人反應超好。老闆超慷慨,逢 weekend 指定時段更會送出 suprise 之神秘小食!
Whatever curry $40
咖喱濃稠度剛好,辣得來帶椰香果香,配料有連皮的澳洲有機薯仔及洋葱,旁邊的印度黃金烙餅以牛油烘焗,酥香脆身。
店子好有心,個個星期都送小食俾客人,上星期有 秋葵沙律,胡麻醬香而不膩,只要逢 weekend 2pm - 5pm,惠顧任何食物飲品,即請你食。
地址:元朗鳳攸街南 9 號好順利大廈 2 座 63A 地舖
電話:2668 6966
時間:星期二至日 11am-8pm,星期一休息

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more