率先直擊!全港首間轉轉吓 Gelato 店

發佈: 2016.09.05
文:

之前出過 post 介紹銅鑼灣時代廣場會有一間以 Spinning gelato 旋轉式雪糕做主打嘅雪糕店登陸。個 post 一出,即時引起各方吃貨好奇,就連整個編輯部都好想知 Spinning gelato 係乜東東!今日,謎團終於解開喇!


呢間叫 Petite House 嘅雪糕店,喺銅鑼灣時代廣場 3 樓。店內放咗 16 部旋轉雪糕機,由意大利籍雪糕師用新鮮材料即席製作 Gelato。究竟乜係旋轉式雪糕?其實即係新鮮製作嘅雪糕!一般雪糕店的 gelato,都是在廠房做好送到店中;而這裏就由雪糕師每日即場調配材料,再倒入旋轉雪糕機內,於攝氏零下 11 至零下 14 度嘅低溫內,將材料不停轉動,大約 15 至 20 分鐘就可以製作出 gelato!呢 16 部旋轉雪糕機喺意大利都好罕見,香港都有真係好威威!


整個製作過程全公開,大家可以睇住啲 gelato 由液體變成雪糕,好治癒呀!雪糕機 gimmick 十足,仲係維持 gelato 品質嘅重點。平時食到嘅 gelato 多數於工場製作,經過運送品質始終會打折。呢度唔單止即製,仲係每次少量製作,每次可以做到 2kg 雪糕,賣完即接力製作,保證夠 freah!


Gelato 用料簡單兼全天然!最基本嘅 Gelato base 只加意大利牛奶及糖製作,再加入不同材料調味。為咗配合香港人口味,雪糕師仲特別研發低糖、低脂嘅配方,落少咗糖嘅 gelato 依然好 creamy,完全無影響到綿滑口感!


(左)開心果、(右)紅桑子核桃 $55(兩種味)
以果仁口味為例,雪糕師會用原粒果仁,放焗爐烘香後打碎再 mix 入雪糕內,完全不加人造堅果油調味,天然又濃香!用西西里開心果製作嘅 gelato,果仁味亦好突出!紅桑子核桃味於 gelato base 內加入新鮮紅桑子果醬,以及用糖煮過嘅核桃脆脆,酸甜中帶果仁味。


(左)紅桑子、(右)芝麻 $55(兩種味)
生果味 gelato,好似紅桑子、西瓜、士多啤梨及芒果等,就用新鮮生果製作。部分生果如紅桑子及西瓜,不會落牛奶製作,素食者及對奶敏感嘅朋友都有份食!紅桑子 gelato 果味濃郁,食落好清新!芝麻味 gelato 就好似食緊芝麻糊咁,正!


(左)西瓜、(右)Stacciatella $55(兩種味)
西瓜味超驚喜!全天然,食落似咬緊一塊起沙嘅西瓜!Stacciatella 係傳統意大利口味,牛奶 base gelato 加入 75% 朱古力醬一齊轉,轉出嚟唔係變成烏黑色,而是牛奶雪糕內凝結成朱古力碎,好神奇呀!


Italian Chocolate Petite Gelato Smoothies (未定價)
用一球朱古力味 gelato 加奶打成,on top 仲唧啲朱古力醬。質地滑溜又香朱古力味。


Strawberry Waffle (未定價)
呢度仲會大玩 fusion,除咗有芝麻、泰式咖啡、抹茶等亞洲口味 gelato 外,仲將勁有香港特色嘅雞蛋仔、窩夫等同 gelato mix 埋一齊。即製窩夫入面夾住新鮮士多啤梨及 cream,側面加多球呍呢嗱 gelato,好大堆頭。


少女們至愛嘅班戟!4 塊鬆軟嘅班戟放上朱古力味 gelato、新鮮香蕉片及朱古力醬,呢個簡直係不敗組合!

$1 食 Gelato!
新開張有勁筍優惠!9 月 10 日至 9 月 17 日期間,每日 3 點開始會有 $1 gelato 優惠,每日只限 20 名!搶唔到唔緊要!只要 like and share Petite House 嘅 Facebook page 並 tag 3個朋友仔,再 show 畀職員睇,就可以有買一送一優惠!

Petite House
地址:銅鑼灣勿地臣街 1 號時代廣場 3 樓 Kiosk G
電話︰2336 4333
營業時間︰11am-10pm
註:餐廳於 9 月 10 日試業

文︰Jessie、攝:Barin

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more