獨食最啱!迷你佛跳牆 + 片皮鴨

發佈: 2016.09.06
文:


呢個「經典迷你粵菜」套餐,由九龍酒店中菜廳「龍逸軒」推出,以傳統手工粵菜做主角,亮點有迷你佛跳牆迷你北京片皮鴨迷你避風塘炒中蝦等。我對「迷你」一向有情意結,唔通係 cute cute 微形造型?原來係一廂情願!所謂迷你,係指分量迷你。

平日食粵菜通常都係大碟頭,要一大班人先食得晒,呢個迷你套餐的菜式就做成一人食分量,碟頭細細,最難得係無偷工減料,足料之餘,同平常 size 做得一樣咁精細,價錢逐位計,人少少都食到手工粵菜。

先講吓套餐重頭戲原盅迷你佛跳牆,識食都知佛跳牆材料出名多,平日人多食,一大鍋上桌,陣容鼎盛。而家大廚將佢濃縮到用一個手掌咁大嘅燉盅分量,但材料陣容不減,有原隻飽魚、花膠、排翅、關東海參,湯底則以金華火腿、雞肉、瘦肉清燉,每口都是精華。

迷你北京片皮鴨,畀佢個名呃咗,其實唔係迷你,係 sell 一人分量啫!每客一片,分量真係好少!幸好外皮夠香酥脆,超甘香;依足規格附上薄餅皮、青瓜絲及葱伴吃,一件入魂!翠盞蟹肉桂花炒瑤柱最考大廚功架,將鮮蟹肉拆細,再將蛋花炒成桂花粒咁粒粒分明,炒時火喉要掌握得準確,否則就成唔到桂花狀,負責設計菜式嘅鄧師傅話,每道菜都係即叫即炒,好似炒桂花蛋粒咁,逐少炒,難度更高㗎。

迷你粵菜系列由 9 月至 11 月推出,分午市及晚市都指定時段供應,散點每款數十元,又有逐位計套餐,邊個話中菜唔可以獨食?


原盅迷你佛跳牆 $198
迷你 size,原盅材料,包括有原隻飽魚、花膠、排翅、關東海參,湯底則以金華火腿、雞肉、瘦肉清燉,啖啖精華,好甘甜。


迷你北京片皮鴨 $48
烤鴨外皮夠香脆,加埋薄餅皮、青瓜絲及葱伴食,一人份量唔 heavy。


迷你避風塘炒中蝦 $68
中蝦外面包着香炸蒜酥,與薑、辣椒同炒,極惹味。




翠盞蟹肉桂花炒瑤柱 $68
先將鮮蟹肉拆細,再將蛋花炒成桂花粒咁粒粒分明,炒時火喉要掌握得十分準確;食落蛋每口都充滿蛋香。


九龍酒店「龍逸軒」的中菜馳名,今年首次推出迷你粵菜套餐,提供更彈性份量畀食客選擇。

「經典迷你粵菜」套餐 $398/ 位 (設加一)
迷你北京片皮鴨
原盅迷你佛跳牆
迷你玉樹麒麟斑球
迷你避風塘炒中蝦
花膠絲蟲草花翡翠
鮑汁鮮蝦荷葉飯
甘露浮圖


龍逸軒
地址:尖沙咀彌敦道 19-21 號九龍酒店 2 樓
電話:2734 3722
經典迷你粵菜
供應日期:即日至 11 月 30 日
供應時間:星期一至六 11am-3pm、6pm-11pm;星期日及公眾假期 10:30am-3:30pm、6pm-11pm
註:到九龍酒店 Facebook 專頁可下載並列印龍逸軒八折餐飲優惠券,詳情參考 facebook 公佈:https://www.facebook.com/KowloonHotel

文:Celia、攝:Ki

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more