成球上紫薯杯 粟米屋
大圍村有間「粟米屋」，老遠見到招牌頂有枝大粟米，一睇就知主打粟米小食，夠哂搶眼！佢嘅熱食粟米杯，除有招牌牛油蜜糖、蜜糖芥末口味，估唔到仲自創紫薯粟米杯！
紫薯粟米杯 $25
紫薯粟米杯賣相最靚，紫薯蓉舀到成球雪糕咁放在上面，落本用日本紫番薯烚煮壓蓉，番薯味濃又幼滑，甜度適中，食落啖啖粉糯甜香，難得係跟粟米粒好 match。
粟米屋
地址：大圍大圍村第八街 4 號地舖（積德里及積富街交界）
電話：2543 9999
營業時間：9am-8pm
街頭脆口紫薯片 捌拾胡同
可能因為紫薯控實在太多，而家超市除咗薯片，仲有包裝紫薯片賣。咁有無鮮炸呢？行經尖沙咀小街，發現呢間「捌拾胡同」唔止有招牌串燒、燒物，仲有「真‧ 薯片」！薯片概念來自鹽燒土豆片，店方改用薯仔及紫薯做。每日人手刨薄片，有柯打即炸，又薄又脆熱辣辣。識得食，一定食鮮炸紫薯片！
胡同真‧薯片 $28
新鮮即炸，薯片薄脆，紫薯片厚身有質感，mix 埋會食唔停。最堅係放耐咗都好香脆，可選避風塘、川椒及海苔風味，有辣有唔辣。
捌拾胡同
地址：尖沙咀厚福街 9 號 B 地舖
電話：3704 7107
營業時間：星期日至四 2:30pm - 12mn，星期五、六及公眾假期前夕 2:30pm - 1am
足料！紫薯蓉手抓餅 大埔友‧手抓餅專門店
手抓餅唔係得大埔有，不過「大埔友‧手抓餅專門店」性價比甚高。老闆 Kidman 整嘅紫薯蓉手抓餅，咬一口食到條條紫薯纖維，真材實料，唔係用粉開出嚟，香甜味又突出又天然！
紫薯蓉手抓餅 $25
手抓餅鋪滿足料紫薯蓉，咬落好香甜彈牙。紫薯蓉係用紫薯逐個刨絲，唔係用粉開出嚟㗎！手抓餅外層好甘香，唔會油淋淋，內裏紫薯蓉香滑，不太甜，作為下午小點一流。
大埔友‧手抓餅專門店
地址：大埔廣福道 103A 舖
電話：6626 8818
營業時間：1pm - 1am
小心辣嘴！流心紫薯撻 Pie & Tart
Pie & Tart 嘅鮮奶撻有好多 fans，不過最近新出咗個紫薯流心撻就吸引埋一眾紫薯控！呢個日式流心紫薯撻，撻餡呈深紫色，上面灑滿紫薯粉，賣相超吸引。未食已感受到嗰種紫薯威力！
日式流心紫薯撻 $12
中間嘅紫薯餡堅係流心，一咬開即刻湧出！唔想食到成手都係紫薯餡，建議大家用匙羹食。流心度滿分，紫薯味亦算濃郁，而且味道唔假、好自然。
Pie & Tart
電話：2332 1348
粒粒紫薯奶凍煲 想甜嚐甜
個人覺得，食紫薯最開心莫過於見到滿滿嘅紫薯放哂喺面頭，而黃大仙的甜品店「想甜嚐甜」嘅紫薯奶凍又真係將粒粒紫薯鋪哂喺奶凍面，一打開個煲仔蓋真係「嘩」咗出嚟。奶凍滑嘟嘟，紫薯香噴噴，吸引！
紫薯奶凍 $38
打開煲蓋，望到粒粒紫薯已經心花怒放！老闆將帶甜嘅越南紫薯去皮、蒸熟、切粒，並製成紫薯醬，紫薯軟腍，入口紫薯味濃郁。連埋以德國牛奶 + 淡忌廉製嘅奶凍一齊食，紫薯甘甜，奶凍唔漏，兩者好 match！
想甜嚐甜
地址：黃大仙蒲崗村道73號富佑大廈地舖
電話：3956 4744
營業時間：星期一至五 1pm-12:30am 六日及公眾假期 11am-12:30am
文︰Louise
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】Ísey Skyr健康冰島乳酪套裝！↓
↓ 使用比普通乳酪多近4倍的牛奶！/ 好像Gelato義式雪糕一般的口感！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
