晴王、香印點樣分? 5 個最正青提甜品

發佈: 2016.09.07
文:

如果呢個世上有個年度最受歡迎的生果選舉, 2016 年的生果之王,必定是來自日本的晴王香印提子。整整一串好像綠寶石的提子,賣相靚又大大粒,味道清甜又帶花香,難怪受到熱捧!除咗原粒提子逐粒慢慢歎之外,仲可以用嚟整甜品, 點食都係咁正!

5 大晴王提子甜品


1. 日本晴王芭菲 $98(c)
出名有勁大個日本蜜瓜雪糕嘅日本甜品店 i CREMERiA 都加入戰團, 推出用咗日本空運到港嘅晴王提子做芭菲! 以芒果肉及白桃果醬做底層,然後放有幾粒切半晴王提子。頂層是牛奶雪糕及以晴王提子作點綴!牛奶雪糕能夠引起提子嘅香甜,食落仲帶有陣陣花香!芭菲於尖沙咀及銅鑼灣都有得食!



2. 香印‧女王(香印青提芝士慕絲蛋糕 1.9 磅) $348(a)
東海堂今年首次推出日本提子蛋糕,不過佢哋用嘅是香印青提, 不是最高等級別的晴王。蛋糕面層鋪上日本直送香印青提, 數數至少有 10 粒香印提子,都算揼本!配以銀箔裝飾嘅奶凍,賣相好靚。



提子好甜,口感軟滑多汁;蛋糕內層是幼滑的芝士慕絲,夾着白提子果凍、提子乾, 餅底則用了脆身的杏仁酥餅,集合軟滑香脆的口感。



3. Shine Muscat Parfait $95(b)
由日籍甜品師主理,Parfait 用咗福岡的香印提子, 每粒都好飽滿又清甜。芭菲底層是檸檬啫喱, 上面有一層手打新鮮忌廉及 crumble, 再加呍呢嗱雪糕,並於頂層唧上忌廉及放了 7 粒香印提子,組合超級繽紛,集酸甜脆軟滑於一身,整體感覺好 fresh。



4. Shine Muscat Tarte $680/18cm(b)
大堆頭製作!撻底是曲奇餅底,口感脆鬆又有陣陣牛油香。 中間是一層以日本忌廉芝士、忌廉及檸檬汁等打成的芝士餡, 撻面用咗足足一整串提子裝飾,每一啖都有提子的清香!提提你, 呢個果撻只限預訂,想食要早啲 order。



5. Shine Muscat Mochi $35/ 粒(b)
日本大福外皮是甜品師自己搓,質感軟糯。 中間有一整粒香印青提及一層海綿蛋糕。簡單的配搭, 唔會搶走香印青提的清甜香味。


晴王 vs 香印,點區分?
市面上有兩款大熱的日本青提子,分別叫「晴王」「香印」, 好多人都是傻傻分不清(包括我), 今日就搵到經營網上生果購物平台的負責人 Alex, 為大家講吓晴王香印的分別。


Alex Chan
Fruitmaster 生果購物網站負責人



先解開提子品種之謎!唔講唔知,原來香印晴王是同一個品種。 不過只有出自日本岡山縣的品種,才可以稱為晴王。因為岡山縣的土壤養分、環境等都比較好,所以種出來的提子質素高啲,屬於香印提子中最高質的青提子。而每串提子都要重超過 700 克、每粒約 12 克重, 甜度必須達到 18 度,先有資格稱為晴王㗎。



點解咁貴?
點解晴王要賣 4百幾蚊一串?咁就要了解一下佢嘅種植方法! 日本岡山縣香印提子都算是新提子品種,於 2006 年第一次面世。 香印提子是用了「一枝一策」的種植方法, 每一個枝節只會保留一串最靚的提子生長, 提子可以吸收最多的養份,令其水份、糖份都可以推到最高, 每粒提子都大大粒又飽滿。因為咁講究,提子數量好有限。以去年為例,日本只出產 584 噸晴王青提,物以罕為貴,晴王所以咁貴囉。



點樣揀?
賣到咁貴,作為消費者就梗係唔想買到次貨啦!Alex 話晴王都會有再細分成藍秀、紅秀、 特秀及禮盒裝 4 個等級。要揀最靚的晴王, 首先睇吓每串提子的重量及提子的大細,如果提子輕過 700 克, 就未達標準。另外,提子不應該帶黃色, 王是實色青綠色。再睇提子柄, 如果有又長又綠的柄代表夠新鮮,見到提子柄變啡就唔好買! 最後睇睇每粒提子之間會唔會太鬆散, 一串頂級晴王應該是結實而且外面呈圓型,下次買提子就識揀啦!


Shop info
(a)東海堂
電話:2739 1328

(b)Cafe Life
地址:中環鴨巴甸街 35 號 PMQ 元創方 A 座 Staunton 1 樓 S106 號舖
電話:2858 8755
營業時間:11am-8pm

(c)i CREMERiA Café
地址:旺角亞皆老街 8 號朗豪坊 4 樓 13 號舖
電話:從缺
營業時間:10am-11pm

文:Jessie、攝:kee

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more