7-ELEVEN 有即製 叉燒芙蓉蛋飯!

發佈: 2016.09.08
文:

OL 朋友喺鰂魚涌太古坊工作,同佢傾開商業區有乜好食,佢竟然推介 7-ELEVEN!唔係食叮叮飯,事關呢間便利店唔止有魚蛋燒賣芝士腸食,仲有兩餸飯即製飯餐!問過 7-ELEVEN office 職員,午市飯餐已推出一段日子,暫時只於指定分店供應,包括鰂魚涌太古坊、灣仔。



同買魚蛋一樣,先付款,再憑票點餐;午餐每天 11am 至 2:30pm 供應,店員話 12nn 就開始多人喇,擠滿上班族!


望望餐牌,午餐陣容果然好鼎盛!有十多款選擇,有飯有意粉,鮮茄焗豬扒飯咖喱雞球飯白汁火腿雞絲拼芝士肉醬意粉黑椒汁雞扒香腸豬扒煎雙蛋番茄肉醬煎蛋等等,仲有「是日精選」,有 4 種選擇,可選兩款菜式配白飯,即係兩餸飯!估唔到便利店都會令人有選擇困難症!


部分飯款即點即製,估唔到便利店姐姐係十項全能,煎蛋煎扒舀飯汁樣樣得,仲摩打手㖭!最正係叉燒芙蓉蛋飯,買完飛見姐姐即刻煎蛋炒蛋,滋滋咋咋香噴噴,都有鑊氣㗎!此外,豬扒雞扒和蛋都是即煎的,食落唔會又乾又嚡又凍。


叉燒芙蓉蛋飯 $33
熱辣辣!煎蛋內有叉燒、洋葱,煎的火候剛好,仍食到蛋汁,飯軟硬適中,淋上豉油吃,水準拍得住茶餐廳!如果叉燒多番啲更好!


除咗即製飯餐,還有即舀兩餸飯!菜式每天轉,前一兩天有菠蘿雞球味菜涼瓜牛肉鹹魚蓉豆卜蒸排骨粟米南瓜豆腐,今日就有京都菠蘿豬扒豆腐炆火腿滷水雞中翼節瓜粉絲蝦米,統統都是家常味道,似住家飯!食落都係熱辣辣,飯盒分開三格,將飯餸分開,唔會撈埋一齊,貼心!


是日精選套飯(京都菠蘿豬扒、豆腐火腩)$33
有豬扒有菠蘿有洋葱有青椒,好足料!豬扒夠軟腍,酸酸甜甜好開胃;豆腐火腩大大嚿,唔會碎濕濕,味道偏淡;餸的分量整體偏少。


白汁火腿雞絲拼芝士肉醬意粉 $36
意粉以錫紙盤載並在暖櫃㷫着,唔會太乾;白汁 creamy,芝士惹味,一次過食齊紅白兩款味道,很受歡迎。

羅宋湯 $13(套餐加 $6)
羅宋湯估唔到咁足料,吃到蔬菜和牛腩,味道仲好濃!不過我飲到有味精。

7-ELEVEN
地址:香港鰂魚涌海光街13-15號海光苑地下5及6D號舖
電話:2299 1110(客戶服務熱綫)
註:午餐只限指定分店供應,時間為 11am-2:30pm

文︰Yo 、Louise、攝︰Nova

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more