跟住發哥 掃堅‧唔離地美食

發佈: 2016.09.08
文:

朝早食糖水 佳佳甜品
位於佐敦、擁有 30 多年歷史的老字號佳佳甜品,上年獲得米芝蓮街頭小食店推介,旋即被無良業主加租 120%,逼住要搬舖!不過有實力嘅老字號又使乜怕,當中星級熟客周潤發一樣 keep 住幫襯,仲大讚糖水好好食!呢度甜品店主打十幾款中式糖水,必食招牌芝麻糊、合桃露、杏仁露及寧波薑汁湯丸,每碗都唔超過 $20。仲可以加錢追加配料,雞蛋加 $2、湯圓 $6/3 粒、番薯 $6,抵食!老闆話發哥通常一朝早行完山就嚟幫襯,12 點前就會出現,一食就打孖上,想野生捕獲發哥嘅朋友要改中午食糖水喇!


芝麻糊 $18
用咗湛江出產嘅芝麻,炒完後再浸洗 1 小時,重覆 3 次後用石磨慢慢磨,再先後以快、慢火煮 45 分鐘,芝麻糊質地黏稠,芝麻味香濃。

@notfastfood 張貼的相片 張貼

薑汁寧波湯丸 $18
用了廣西的小黃薑,連皮打成薑汁後隔渣倒入清水內加番薯煲成薑湯,薑湯夠薑夠辣但不嗆喉。湯丸由上海老師傅手搓,湯丸皮薄、芝麻餡香濃,日賣 1,000 粒!


無呃你㗎!小記之前去佳佳搵老闆一家人做訪問,真係撞到發哥!


佳佳甜品
地址:佐敦寧波街 29 號
電話:2384 3862
營業時間:12nn-3:30am

至愛咖喱雞翼 屏山 CAFE 123
識飲識食嘅時裝設計師鄧達智 William,幾個月前踩過界喺屏山圍村開餐廳!幾年前特登入圍村食鄧氏盤菜嘅發哥,知道 William 開餐廳,第二日即刻入元朗撐場!我諗發哥既係有情有義撐朋友,亦係為咗試新嘢。餐廳力 sell 本土文化,好多食物都保留傳統茶記特色,油占多、奶醬多、鹹牛蛋麵等一定走唔甩,仲有自家秘製的特色咖喱雞翼及豬扒,晚市仲有私房菜供應!用料也在地,元朗楊氏漁業、根叔魚塘的烏頭、元朗番薯苗等食材,撐本地、夠新鮮。


咖喱雞翼撈麵 $26
呢個係發哥至愛!咖喱汁嘅配方來自屋企印尼女傭,用大量乾葱、蒜頭、丁香、豆蔻等配料,充滿印尼爪哇風情,香料惹味,辣度適中。


黑松露蛋厚多士 $28
蛋漿混入法國牛奶,炒蛋唔係厚厚一大堆,而是略呈薄皮狀,奶味不算重,蛋面放入法國黑松露醬,香噴噴;烘脆咗厚多士抹上蛋黃醬,好惹味。


從化蜜糖梳打 $16
蜜糖香味與梳打好夾,唔似汽水般死甜,飲完喉嚨好舒服。


Cafe 123
地址:元朗屏山塘坊村 123 號
電話:9195 4884
營業時間:8am-5pm(星期日及公眾假期休息)

彈牙手打魚蛋 新樂園魚蛋
旺到爆嘅市區會,「山卡啦」嘅圍村會去,勁多街坊美食嘅大埔墟街市,都有發哥蹤跡。喺大埔墟街市開咗 11 年嘅新樂園魚蛋粉麵,主打潮州粉麵。最出名嘅梗係手唧魚旦炸魚片頭啦!老闆每朝以門鱔、九棍魚等打成魚漿,再製成魚蛋、魚片及魚片頭,質感彈牙,食到魚味,好多街坊都會買嚟做早餐或打邊爐。下午餐時段,一碗魚蛋粉都係 $20,同發哥一樣咁親民!


魚蛋河 $20(下午茶)
大大碗魚蛋粉都賣 $20,有 3 粒魚旦、3 塊魚片及 1 塊炸魚片頭。河粉幼身滑溜,湯底呈淡淡嘅奶白色,飲落有魚味。


魚蛋 size 適中,質地爽彈唔會死實實。


魚片頭 $88/ 斤
新鮮炸起嘅炸魚片頭仲冒緊煙!外面脆脆哋好甘香,魚味突出又唔會太油膩。


新樂園魚蛋麵餐廳
地址:大埔鄉事會街 8 號大埔墟新街市 CFS23 號
電話:2638 2186
營業時間:7am-11pm

文:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more