名廚回歸第二擊 泰國餐廳

發佈: 2016.09.09
文:

Harlan 話早在十多年前已有想開泰國餐廳的念頭,今次終於願望成實,邀得與他共事十多年的泰籍大廚 Amphon Phoomphookieo 當總廚,他曾於深灣遊艇會及中環 IFC 的 H One 主理泰菜,經驗非常豐富。

這店吃到的基本上都是經典的泰國菜式,驟眼望餐牌或者驚喜不大,但食落就知真材實料,用料比不少泰國餐廳優質。香料、柚子、椰奶等堅持自泰國入口,味道正宗,其他食材都多用歐美或本地的優質貨,優質程度幾乎同Harlan的意大利餐廳睇齊。好似牛,用澳洲和牛或美國 Prime Grade、龍蝦是地中海貨、雞肉又要用美國有機的,連一道簡單的炒蜆用的本地蜆都指定隻隻要有近掌心大小,食落零舍肥美鮮甜。

餐牌上也可找到少量菜式融入了大廚的創意,好似沙嗲雞串燒,沙嗲汁還加了一點日本麵豉去調味,食落香味更有層次﹔又好似海鮮疏乎厘,本是當地的平民小吃,由泰國河魚 Pla Dong 打成的魚漿加紅咖喱、雞蛋、魚露等蒸成,店子則做了個upgrade版,在裡面加入大量帶子、蝦粒及魚肉,口感同鮮味都即時double up。


Halan (右) 與泰籍大廚 Amphon Phoomphookieo (左) 早在My Tai Tai開業前已有十多年合作經驗。


店子以湖水藍做主調,加上不少泰國飾物做裝飾,布置似足曼谷當地的餐廳。


Chicken Satay $24/串
用的是美國有機雞腿肉,嫩滑不嚡口,附設的醬以花生醬、沙嗲醬及少量日式麵豉醬等調成,非常惹味。


Yellow Egg Lobster Curry $588
接到柯打才逐份製作,先將波士頓龍蝦燒香再塗上以牛油、檸檬葉、蒜蓉等調成的醬,再淋上用黃咖喱加花奶、雞蛋等煮成的咖喱汁,食落濃郁香口,點薄餅食一流。


Stir Fry Clams $138
用的是本地新鮮貨,每隻竟有近掌心?拳頭咁大!烚至半生熟後再與大量爆香了的辣椒、蒜肉、辣椒膏、酒等同炒,惹味度爆燈,送酒一流!


Seafood Souffle $128
用泰國河魚Pla Dong打成的魚漿加紅咖喱、雞蛋、檸檬葉、魚露等拌勻,再加入帶子肉、魚肉、蝦肉等分兩次蒸共12分鐘,口感輕盈如滑豆腐,又帶粒粒海鮮增添口感。


Mango Sticky Rice, Mango Sorbet & Sesame Crunch $98
糯米配上加了斑蘭、鹽及糖的椰奶吃起來軟糯得來超級香!配埋泰國芒果同芒果Sorbet 吃清新而滿足。


My Tai Tai
地址:中環擺花街8號2樓
電話:2896 6018
營業時間: 12nn-3pm、6pm-10:30pm (星期五及六營業時間延長至11pm)
收費:現金及信用卡,設加一
交通:港鐵中環站D1出口
泊車:中央廣場 $37/hr
平均消費:$350

文︰Amy、攝影:Ken

(原文摘自 U Magazine ISSUE 562)

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more