阿鴻開快餐店 用自製靚叉配天使麵!

發佈: 2016.09.10
文:

東廣場最近開了間叫「鴻師傅」的快餐店,邊個鴻師傅?就係賣滷水賣到拎米芝蓮的「阿鴻小吃」老闆兼大廚黎偉鴻。轉攻快餐輕食,他以其拿手的叉燒及一向受港人歡迎的咖喱牛腩做主打,有信心可創造出下「阿鴻式」傳奇。

雖說是快餐,食物做法同款式明顯比坊間快餐店有心思。招牌的叉燒在店內自家少量燒製,賣完再燒,保證新鮮。叉燒肥瘦適中、色澤鮮明兼少少燶邊,甘香腍滑,令成件事 young 咗的,除了以叉燒配撈麵外,客人仲可揀配天使麵、長通粉甚至夾入軟法包中,難得食落又幾夾。

咖喱牛腩鴻哥花了 2 年時間研究,先做出啱心水的顏色同味道,最特別的是咖喱牛腩配腸粉,他說靈感來自咖喱牛腩河粉,腸粉即叫即拉,超滑溜又富米香,索晒咖喱汁仲惹味過炒河,製作需時但值得等待。店子另供應少量蒸飯泡飯、超足料老火湯芥末雞腳筋滷水素鵝等 3 款阿鴻小吃熱賣小食,觀塘人覓食又多了個好選擇。


薑葱鮑魚汁叉燒天使麵 $65
叉燒甘香又肥瘦剛好,配埋加入金華火腿骨及瑤柱水煮的鮑汁及大量薑葱、銀芽做的撈麵非常惹味。


叉燒在店內燒製,每次只燒少量,入口你知叉燒都要新鮮。


咖喱牛腩配即拉腸粉 $65
咖喱汁用東南亞入口的咖喱膽加大量乾葱頭、蒜頭、茄醬等近 10 款配料煮成,辣度中等,香味富層次,牛腩、牛筋炆得入味軟腍,即拉腸粉米香十足又滑溜,索咗咖喱汁,一滴汁都無嘥。


艇皇蝦乾蒸肉餅配飯 $58
肉餅混入了土魷粒,鋪上大量的蝦乾及鹹魚乾同蒸,鹹香得來又口感豐富,配飯之餘仲送個超足料的例湯,好有住家 feel。


黑椒豬頸肉硬法包 $23(加芝士加 $3、加煎蛋加 $3)
法包外脆內軟,豬頸肉燒香後再加入秘製黑椒汁,好惹味,加錢配蛋及芝士就更 perfect。


嘴刁刁燉湯 $48
天天不同,採訪當日是花膠甘草蓮子芯湯,燉足 3 小時,飲落清潤又充滿膠質,好滋補。


老闆兼大廚 黎偉鴻
入行做餐飲已幾十年,滷水賣到街知巷聞仲連續 5 年奪得米芝蓮一星殊榮,今次開新品牌走年輕路綫,有信心水準同阿鴻小吃睇齊。


店子一室新派快餐格局。

鴻師傅
地址:觀塘成業街 7 號東廣場地下 G26-G31 號舖
電話:2618 0168 / 2608 0178
營業時間:10:30am - 9pm
收費:暫只收現金,不設加一
交通:觀塘港鐵站 B2 出口
泊車:觀塘廣場 $16/hr
平均消費:$70

文︰Amy、攝影:Brain

(原文摘自 U Magazine ISSUE 563)

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more