激平 $99 韓燒放題 食唔食得過?

發佈: 2016.09.10
文:

佐敦莊士倫敦廣場嘅「平昌 by BBQ 7080」係韓烤店 BBQ 7080 嘅分店,開張即推出人氣嘅韓燒放題,午市晚市皆有,最抵係午市,$99 可以食足一個半鐘!晚市亦唔貴,最平 $198,假日都係 $218;平日散點兩三碟燒物已經唔止。最平嘅 $99 韓燒,食物選擇唔少,有 3 款海鮮,仲有肉類、韓國料理任食,小記當日見好多學生妹豬都去食 lunch。


韓燒店係新開,裝修當然簇新,空間唔算好闊落,但有好多兩人卡座,算有私人空間。



抵唔抵食?睇下食物種類先。肉類有牛肉牛排骨五花腩脢頭肉豬頸肉等 20 多款,選擇花碌碌,仲有韓劇常出現嘅烤豬皮同豬腸,韓籍店員話佢哋最鍾意以燒酒豬腸!必食!




食韓式燒肉,五花腩係重點!呢度嘅五花腩唔算厚切,勝在肥瘦均勻,真係見到一層層,燒熟咗油香爆破,用生菜包住食,香得嚟無咁油膩,可減少罪惡感。


放題中有普通牛肉,但如果你對牛肉要求高,建議你加多 $88 食雪花牛肉。肉質好軟腍,燒熟後入口牛脂即融!我仲加 $3 加多一碟芝士,放喺爐邊燒,用芝士捲住牛肉,拉絲嗰下好滿足,超邪惡,但超好味!芝士除咗配牛肉,仲可以做拉絲泡菜啦、豬皮啦、腩肉啦……


至於海鮮,午市都有生蠔任燒,仲有魷魚小八爪魚共 3 款;晚市吸引啲,有帆立貝鯖魚鰻魚任食。


生蠔帆立貝算新鮮,味道鮮甜,但 size 偏細,唯有食多幾隻回本啦。


燒到差不多或尾聲,有時想食啲嘢填肚,呢度嘅選擇比一般韓式放題店多。有 10 多款韓國料理任食,炒粉絲炒年糕石鍋飯冷麵一應俱全,保證一定食得飽。晚市仲送炸雞添,小記就飲咗個石鍋麵豉湯作結,熱辣辣,比一般麵豉湯好飲。


食燒烤最口渴,呢度嘅飲品選擇唔少,烏龍茶、蘆薈飲品、cider 等大部分都屬韓國貨,午市晚市任飲,都係回本位!


食後感:
市面上嘅韓烤放題愈來愈多,論環境,平昌因為新裝修,坐得舒服,特別係卡位,人少少可以自成一國。雖然午市海鮮偏少,但整體選擇夠多,海鮮新鮮,肉類醃味亦不賴,唔會款款肉一樣味。剔紙仔點餐,食物分量係因應入座人數而安排,每次分量少少的,可以減少浪費,想食多啲,要勤力啲入紙先得,以 $99 的收費,絕對可以滿足午餐的食量和期望,無投訴了。

韓燒放題
供應時間︰ 午市 12nn-3pm(限時 1.5 小時)
晚市 6pm-11pm(限時 2 小時)

收費:星期一至四 午市 $99、晚市 $198
星期五至日 午市 $108、晚市 $218
註:設加一


平昌韓國餐廳
地址:佐敦彌敦道 219 號莊士倫敦廣場 5 樓
電話:5901 7080
營業時間:星期一至日 12nn-3pm、6pm-11pm
Facebook:https://www.facebook.com/bbq7080/

文:Louise、攝:Keeyau


歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more