嚟自奧地利兼擁有近百年歷史嘅麵包店「麥上日光」，上年底正式登陸香港，今年 7 月再於灣仔開分店，仲加咗 5 張枱畀人食個包歎杯咖啡。如果你幫襯過，一定識得佢嘅招牌五層流心芝士軟包，最高峰要等足一個鐘先買到！品牌都知道香港人鍾意試新嘢，所以繼朱古力、粟子及芒果之後，於上星期再推出抹茶及柚子兩款新口味。
五層流心抹茶芝士包 $28/ 個、$100/4 個
麵包外表鋪滿粉狀，微微綠色，賣相不算討好。不過之前試過原味芝士軟包，對佢嘅味道有信心！同樣用自家培養天然酵母再經 3 次發酵製作，可想而知幾咁鬆軟！新出嘅抹茶味用日本宇治抹茶粉，加澳洲及新西蘭的忌廉芝士炮製，芝香十足，抹茶味適度，帶少許回甘。最讚係中間兩層抹茶芝士餡多到滿瀉，一咬即時唧出嚟！芝士狂迷表示好滿足！
製作時，將軟包於打橫切開，於中間抹上抹茶芝士餡。外層都唔可以放過，抹上抹茶芝士餡後，整個包都變成綠色！
外層仲沾滿奶粉，增加邪惡度！
五層流心柚子芝士包 $28/ 個 , $100/4 個
除咗抹茶，新出的柚子味芝士軟包都相當唔錯！將柚子汁、柚皮及蜜糖與忌廉芝士混合成柚子芝士餡，有芝士的香味，同時有柚子的清香，可以中和滯膩感，感覺好 fresh！兩款新口味芝士包每日分別限量供應 300 個，每日 12nn 就開始有得賣。可以凍、熱兩食，熱食放微波爐叮 10 秒，叮前於麵包面噴少少水，咁就有流心效果！不過抹茶及柚子呢兩款就適宜雪凍食，放入雪櫃冷凍 1 至 2 小時，仲會有食芝士蛋糕嘅感覺㖭！
同場加映：3 款新麵包上場
玫瑰藍莓包 $12
將玫瑰味調味粉加入軟包麵團內，整個麵包都是勁靚嘅粉紅色，仲有淡淡花香。中間混入了少許藍莓醬，增加酸甜嘅味道。
無花果軟包 $15
無花果近年大熱，招牌嘅軟包入面有無花果醬做餡，麵包面鋪滿無花果乾粒，香香甜甜。
三色辮子包 $18
呢款有 3 隻色嘅麵包，分別是加咗墨魚汁、菠菜及番茄製作，一個包食到 3 種味，麵包全部用上新鮮食材，食得健康啲！
麥上日光（灣仔店）
地址: 香港灣仔軒尼斯道 338 號北海中心地下 C 舖
電話: 2611 9638
營業時間: 8am-9pm
歡迎你 like 我哋 U Food Facebook Page / U Food Instagram ，取得我哋更新更快嘅資訊！
