隱蔽巷仔 發現重量級漢堡

發佈: 2016.09.10
文:

新 Burger 我食唔少,但似這店 Electric Ave做得咁細緻、能夠 homemade 的都不假手於人,一改 Burger 粗疏、快餐的形象。舖頭唔易搵好易走漏眼,在西營盤第一街及皇后大道西間的小巷,沿樓梯下來才會發現它,店外牆身畫作好搶眼,只有十來張高身餐桌,有個性。

選這地點,英國店主兼大廚 Andy 說因為租平,寧願花錢買靚料,用澳洲安格斯草飼牛肉做
漢堡扒、Bread Elements 漢堡包、英國百年老號Stilton 芝士、意大利 Taleggio 芝士、煙豬腩肉、日本蛋、美國薯仔、法國有機雞胸肉等,高級到似做餐廳。

最正係用牛骨髓煎的漢堡扒,patty 用 2 個部位的免治草飼牛肉搓成,有分量,成 7
至 8 安士,厚約 3cm,煎時仲會撲乾香菇粉調味,為了牛骨髓,Andy 竟特地買來牛骨取出骨髓,以骨髓當油煎,漢堡扒會多陣油香味,法式煮法常用啦。

其他 homemade 配料都大陣仗,茄汁用 12 款材料煮 5 個鐘而成;秘製漢堡醬,將日本蛋
黃醬,跟是拉差辣椒醬及茄汁混合,另加蒜頭,及西班牙 5 年雪利酒醋製;半醃漬英式青瓜片,浸漬在芥末籽、番茜、月桂葉、醋及八角之中;糖漬洋葱用 11 種材料製作,4 小時烹調,還有帶香料味的洋葱絲、番茄辣醬等。

抬頭望望黑板,餐牌得 2 款漢堡,牛肉、雞肉外,還多 1 款 special,今期是 smoky chicken carbonara burger。薯條分粗幼 2 款,粗薯條混合牛骨髓,香噴噴,幼薯條則帶 rosemary 香味,特別脆身。再次印證好嘢要等,每個漢堡要等 15 分鐘,薯條、奶昔全部即叫即做,睇 Andy 烹調,仲以為佢煮緊法國菜。

雞扒漢堡中的雞胸肉以 Hache 方法處理,即將原塊雞胸肉切成粒,再用模具將它們拼回扒 狀,好處是快熟,減少流失肉汁,也不怕一般雞胸肉的粗纖維。樣樣都係心機,所以當 Andy 告訴我一個漢堡餐(麵包、茄汁及薯條),閒閒哋用上百種材料做,肯肯定不是講笑。


Classic Aussie beef burger with 5 hrs handcutchips w bone marrow $170
(加 Stilton 芝士 $15)
草飼牛肉漢堡扒牛味好濃,咬下去牛肉口感實在,揀medium 唔會嚡口,一定要加 Stilton 芝士,半融、鹹香,青瓜片爽脆帶香料味,還有甜香洋葱絲,中和一下。粗薯條用美國薯仔做,準備要 5 個鐘,炸兩次,最後澆點牛骨髓等,外脆內帶粉糯,陣陣牛油香。


開放式廚房,可看到 Andy 炮製 burger。


S m o k y c h i c k e n carbonara burger with skinny rosemary frie
s $160
Special 口味 burger,主角是融為一體煎雞胸肉跟濃郁的 Taleggio 芝士,配搭煙豬
腩肉、煎蛋、煙燻味紅椒粉等,層次豐富。


Creamy hachê chicken burger with skinny rosemary fries
$130
香煎有機雞胸肉,卻沒一般的嚡口,切碎再放模內煎成扒狀,煎時 keep 住肉汁之餘,粗纖維被切斷後也易入口。餡料還有酸忌廉、洋葱醬、火箭菜等。


店子有十多個座位,紅、綠、黃色椅子,增添生氣。


War of the roses
$65
自製玫瑰花瓣醬做奶昔,配球呍呢嗱雪糕及 rosemary,食味新奇,帶花香及香草味。


由 Andy 自製的醬汁、配料,有秘製漢堡醬、半醃漬英式青瓜片、糖漬洋葱、香料洋葱絲等。


Patty 用澳洲安格斯草飼免治牛肉搓成牛肉,肥瘦適中,有嚼勁兼帶油香。

Electric Ave
地址:西營盤第一街 27-29 號太益樓地舖
電話:2858 8883
營業時間:星期一、三至五 5pm - 11pm,星期六 12nn - 11pm,
星期日 12nn-10pm,星期二休息
收費:只限現金,不設加一‧交通:港鐵西營盤站 B1 出口
泊車:忠正街露天停車場 $24/hr‧平均消費:$150

原文摘自 U Magazine ISSUE 563

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more