茶記凍檸茶 邊杯最好飲？

一杯好飲嘅凍檸茶，應該要……
茶底：唔好太濃太苦澀，但又唔可淡而無味。茶味太濃飲落好苦，仲好易蓋過檸檬嘅味道，茶味突出又不失檸檬香 ，先稱得上最正檸檬茶！

檸檬：檸檬片嘅多少，雖然唔能夠直接反映檸檬味有幾突出。但點都唔可以太少，得一、兩片仲要薄切，又點會夠味？仲要講埋檸檬味，唔要有檸檬嘅苦澀，要飲到新鮮檸檬嘅清新、自然嘅酸味。

甜度：甜度要適中，太甜會飲到封喉，又會蓋過檸檬味，甚至連茶味都搶走埋！相反唔夠甜，又唔能夠帶起檸檬茶嘅清香味，仲好易變得又苦又難飲！

冰塊：都係適量！太少冰唔夠凍，太多冰唔單止茶少，冰融化後會溝淡檸檬茶，影響味道。

熟食中心名物 李記　18 分
大埔墟街市熟食中心真係好多好嘢食！除咗必食豬扒麵及魚蛋粉外，仲有一間「李記」茶檔，去到見每人一杯凍檸茶，就知係店內名物。檸茶有 5 片唔算太厚嘅檸檬片，姐姐預先幫你篤好。茶底唔算太深色，不過茶色有啲混濁。飲落茶味唔算勁突出，不過有清香紅茶味。檸檬味好香又唔會特別酸，酸度恰到好處，所以大家飲之前唔好再手多多篤檸檬喇！甜度亦剛剛好，唔會甜到封喉起痰，能帶起檸檬及茶香。最正係冰唔算多，仲要大大杯，好抵飲，難怪每個客人嚟到必嗌凍檸茶！


凍檸茶 $13


檸檬預先幫你篤好，大部分都篤到無咗一半檸檬肉。

評分：（以 5＊ 為滿分） 茶底：＊＊＊＊ 檸檬：＊＊＊＊ 甜度：＊＊＊＊＊ 冰塊：＊＊＊＊＊

李記咖啡奶茶
地址：大埔鄉事會街 8 號大埔墟街市及熟食中心 2 樓 CFS33 舖
電話：從缺
營業時間：8am-10:30pm

視乎銷情泡茶撞茶 嘉華　13分
根據大埔街坊報料，區內仲有另一杯無敵凍檸茶！位於大埔廣福邨的冬菇亭「嘉華咖啡小食」。開咗近 30 年，竟然衝出北京開分店！店內佔 9 成食客都嗌凍檸茶，據說茶底用咗 5 種茶葉自行調配，仲會睇銷情而撞茶，避免太早撞好令茶變味。檸茶嘅 size 同一般茶記嘅差不多，茶底顏色明顯較深，茶味都相對突出。檸茶有 5 片唔太厚嘅檸檬片，檸檬要自己篤，要幾酸自己控制。小記篤到檸檬差唔多無晒肉，有檸檬嘅自然酸味，但飲唔到檸檬嘅清香。檸茶味道偏甜，略為蓋過茶味嘅後勁。


凍檸茶 $16


檸檬有 4 片，唔算太厚，上到枱要自己郁手篤！


用咗碎冰，而且只有薄薄一層，溶晒都唔會影響到檸檬味。

評分： 茶底：＊＊＊＊＊ 檸檬：＊＊＊ 甜度：＊＊ 冰塊：＊＊＊

嘉華咖啡小食
地址︰大埔廣福邨廣崇樓側熟食亭 5 號
電話︰2653 1380
營業時間︰6:30am-6:30pm

完美的結合 勝香園　12 分
中環勝香園無理由唔識！即使係露天要坐街邊都一樣排晒隊，除咗招牌茄牛麵及脆豬仔之外，原來檸茶都好受歡迎！檸檬茶有 4 片檸檬，置於杯嘅中間位置。檸檬片都是由姐姐預先幫你篤好。茶底嘅顏色比較淺，飲落茶味的確較淡，甚至可以用無茶味去形容！茶味淡令檸檬嘅味道突出，飲落有檸檬嘅自然果酸味，酸度適中，都幾 refreshing！甜度唔太高，飲開走甜嘅小記都接受到。雖然分開睇各個項目都稍有不足，但當甜度同茶味及檸檬酸度夾埋一齊，三者平衡得好好。所以即使茶味唔夠，但都是一杯好飲嘅檸茶！


凍檸茶 $13

檸檬厚薄適中！


茶檔姐姐會幫你篤好檸檬，其中 3 塊入面有一塊篤到無晒肉，其餘一塊就篤到 7 成爛。

評分： 茶底：＊＊ 檸檬：＊＊＊＊ 甜度：＊＊＊ 冰塊：＊＊＊

勝香園
地址：中環美輪街 2 號排檔
電話：2544 8368
營業時間：08am-5pm（ 星期日及公眾假期休息）

康樂茶冰廳　12 分
荃灣路德圍新開咗好多主攻年輕人嘅小食店，不過有間舊式茶餐廳仍然屹立不倒！街坊必食自製麵包及蛋撻，再加杯檸檬茶慢慢歎。檸檬茶顏色比較深，茶味香濃，無澀味怪味。檸檬有 5 大片，咁多間之中最厚切，檸檬需要自己篤。不過檸檬片比較多，建議唔好一口氣勁篤，否則味道會太酸！飲落有檸檬味但被茶味略為蓋過，好在甜度唔算高，唔會一味死甜。


凍檸茶 $17


檸檬有 5 大片，仲要厚切！怕酸就唔好一味勁篤，酸過頭就救唔到！

評分： 茶底：＊＊＊＊ 檸檬：＊＊＊ 甜度：＊＊＊ 冰塊：＊＊

康樂茶冰廳
地址：荃興徑 21 號地下荃發大廈 D 座
電話：2490 1722
營業時間：6:30am-12am

總評：李記 勝！
4 杯凍檸茶嘅質素都相當高！飲落絕對無茶底過濃嘅苦澀味，又無檸檬嘅酸澀味！但整體而言，大埔李記做得最出色，茶味、檸檬香、甜度三者好 balanced，唔會互相搶味，確係做到飲到茶味，又嚐到檸檬香，仲唔會甜到封喉！檸檬仲要帶有清新果酸味。冰塊數量剛好，可以 keep 到杯茶凍又唔會令檸茶變淡！勝香園輸在茶味唔夠、嘉華就少咗檸檬香，其實都係輸咗個馬鼻！

文：Jessie；攝：Jessie、Theo、Pam

歡迎你 like 我哋 U Food Facebook Page / U Food Instagram ，取得我哋更新更快嘅資訊！