90 分鐘食唔晒!京川滬點心放題

發佈: 2016.09.13
文:

荔枝角工廠區近年愈來愈熱鬧,你見幾多文青鍾意蒲 D2 Place 就知。仔細周圍睇周圍逛,發現附近有間走中檔路綫的京川滬菜館,叫「外灘拾號」。環境高格調,總廚曾經在高級滬菜館「夜上海」任職,出品有一定保證。對於荔枝角區,平日消費不低,午市大約 $200,晚市 $300 以上。不過,餐廳最近推出茶市任食優惠又另當別論,每位 $138,可任點任吃多款京川滬點心。

負責人 Nathan 說:「工廠區關逢星期六茶市難免較靜,試推呢個任食計劃,估唔到反應好好,9 月已差不多 full booking。」唔係誇張,任食優惠在兩個星期前開始,booking 已經去到十月初!為疏導人潮,任食由原來的 120 分鐘改至 90 分鐘,分兩個時段,幸好份量及質素不變。


點餐紙內有廿幾款選擇,Nathan 笑說有食客一次過點了十多份鮑魚叉燒酥!回晒本!

任食共有廿多種選擇,大部分都是滬式經典點心和小食,小食好吸引,有紅油抄手四喜烤麩雞絲粉板蒜泥白肉燻魚酸辣湯等;點心有蒸有炸,必食有名物鮑魚叉燒酥,咬開酥化外層,有半隻 10 頭鮑魚在內,霸氣之餘咬口十足;招牌小籠包,湯汁滿到瀉;流沙奶黃包搣開流出奶黃鹹蛋黃,都屬必吃。點心每次會以一人份量上桌,可減少浪費之餘,亦可以讓人多試幾款。

每款試一點點,90 分鐘也許吃不完!以每位 $138 的收費來說,同一般飲茶消費差不多,但就可一次過試到多種點心款式,整體來說都算抵食,如果上海粗炒、揚州炒飯、上海炒年糕或四川擔擔麵等飯麵類都包括在任食餐單內就更好,現在要另加 $15 才可吃到一款,唔夠划算。


鮑魚叉燒酥
外皮夠香脆,每個鮑魚叉燒酥都食到半隻 10 頭鮑魚,認真夠霸氣。


四喜烤麩
經典上海小食,烤麩吸收醬汁精華,鹹中帶甜,味道不會過濃,加上雲耳及筍絲,夠爽口。


鮑汁雞腳
一向對雞腳有份情意結,雞腳夠入味又軟腍,鮑汁可以送一碗白飯!


流沙奶黃包
個人認為是一般流沙奶黃包的 super 版本,有流極唔完的鹹蛋奶黃,好滿足!


招牌小籠包
雖然皮不算太薄,但肉汁滿瀉又夠熱,小心燙嘴!


沙律蝦球盞
大大隻新鮮蝦,彈牙爽口,加埋沙律醬及鮮果,又是一道醒胃小吃。


外灘燻魚
先將鯇魚炸至脆身,再裹上陳醋汁,既酸且甜,很惹味。


除咗點心小食任吃,這裏有自家製豆漿薏米水竹蔗水任飲。



甜品方面,有清甜清爽的桂花糕,不過我最愛擂沙湯丸,芝麻味濃,糯米皮夠煙韌。


外灘拾號
地址:荔枝角長裕街 10 號地下
電話:2336 6776
營業時間:11:30am-10pm
註:
1 任食時段只限星期六,分個時段,時段一 11:30am - 1:15pm;時段二 1:15pm - 2:45pm
2 收費每位 $138,茶芥 $10,設加一;可以優惠價每位 $15 享用上海粗炒、揚州炒飯、上海年糕或擔擔麵一客(兩位起)


文:Theo、攝:Ki

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more