率先 Hea!滿記新開 Cafe 有乜好食?

發佈: 2016.09.13
文:


滿記開 Cafe,令人好期待喎!究竟環境係點?走一轉,同滿記甜品店一貫裝潢好唔同,全新旗艦店走歐陸 cafe 風格,採半開放式,好似 side walk cafe 咁,感覺開揚。


裝潢以淺木色作主調,木枱椅配木地板,以綠色植物點綴,感覺舒服自然;最讚係設半圓形梳化卡座,好坐又好 hea。


食物方面,除咗滿記主打嘅甜品,主 menu 內有一系列鹹食,即係話除咗可以飯後嚟,約 friend 嚟食飯開餐都得!眾多選擇中,最引人注目係多款烤粟米,款式多之餘,配搭仲好特別!

(前) 傳統墨西哥烤粟米 $58/ 條
新增設嘅食物中,最特別就係呢個傳統墨西哥烤粟米,喺粟米上塗滿蛋黃醬、車打芝士、Mozzarella 芝士,最後再灑上微辣嘅墨西哥辣椒粉,想像得到好惹味。果然,鹹鹹香香帶微辣,以蛋黃醬代替牛油,味道更香甜。

(後) 吉士醬焦糖烤粟米 $58/ 條
吉士醬、焦糖能引發粟米的香甜味,吃不停口!


朱古力棉花糖烤粟米 $58/ 條
粟米外層全塗滿 Nutella 以及棉花糖,經烤焗後棉花糖呈半融狀態,十級邪惡!另有香草醬芝士烤粟米、番茄醬蜜糖烤粟米及榴槤芝士烤粟米口味。


紅酒燴牛面肉配意粉 $88
除咗烤粟米,品牌首次推出意粉系列,呢款紅酒燴牛面肉配意粉就係必食。用澳洲牛面肉,連同紅酒汁、番茄、甘筍等食材以 80 度慢煮 8-10 小時,入口軟腍鬆化兼入味。


蜜糖芝士薄餅 $68
雖然早於今年 4 月九龍灣滿記已首推 pizza,今次旗艦店開張,店方只推出新口味─蜜糖芝士薄餅。以番茄醬、車打芝士及 Mozzarella 芝士作薄餅底,烤焗後再淋上蜂蜜,番茄的酸,芝士的鹹與蜂蜜甜香共冶一爐;餅底僅得 3mm 厚,烘焗得很香脆。


草莓棉花糖薄餅 $48
一上枱,見到原個 6 吋 pizza,旁邊仲有 pizza 刀㖭!原來係甜 pizza!有士多啤梨、棉花糖以及 Nutella。香脆嘅薄餅底、酸酸甜甜嘅士多啤梨,配上香甜半融嘅棉花糖,飯後幾飽都想食!


除咗以上菜式,這裏亦推出新的 brunch menu,有芝士窩夫、egg benedict 等選擇,小編推介煙三文魚雞蛋芝士窩夫 ($88/ 份),用挪威三文魚配以半熟水波蛋、熱嘅融芝士及火箭菜,很豐富。飲品可選配 Beetroot Miracle,由紅菜頭、蘋果及檸檬鮮榨而成,味道 natural,檸檬能辟走紅菜頭嘅泥腥味,還有蘋果嘅微甜,go green 人士肯定鍾意!

同場加映:
全球首推!TMCF 出雪糕!


今次去 HONEYMOON DESSERT de avenue 先知,原來日本人氣芝士餅品牌 Tokyo Milk Cheese Factory 係由滿記引入;Tokyo Milk Cheese Factory 亦將會長駐銅鑼灣希慎廣場,更喺 10 月中有新嘢推出,全球首度推出雪糕,仲有 2 款口味。雖然店方要保持神秘感,但依小編估計,一款應該係原味,另一款‧‧‧睇圍板就係淡綠色雪糕,唔知會唔會係抹茶或者蜜瓜味呢?超級期待!


HONEYMOON DESSERT de avenue
地址:銅鑼灣軒尼詩道 500 號希慎廣場 317-319 號舖
電話:3580 1697
營業時間:11am-11pm
註:不設加一;Brunch menu 供應時間為逢星期六、日及公眾假期 11am-5pm

文:Joyce、攝:ken

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more