少女眼發光!夢幻粉系棉花糖特飲

發佈: 2016.09.16
文:

呢間餐廳,原來是銅鑼灣龍蝦石鍋專門店 Master Kama 嘅新分店,呢間 2 層的新分店坐落波鞋街,舖名字多了 Day and Nite,原來係餐牌玩日與夜概念,不過日間主攻 homemade pasta、三文治、漢堡等,而晚巿跟銅鑼灣店相若,招牌龍蝦三食、海膽拌麵繼續撑場,新店新增更多龍蝦美食,韓國大熱吉列西冷扒西班牙烤乳豬等主菜。最破格係出咗一系列靚到暈嘅粉系飲品,少女必揀 Unicorn Dream,粉紅 x 粉藍色調 smoothies 再加扭紋棉花糖,好夢幻!鍾意藍系,唔好錯過 Cookie & Mint,湖水藍色令港女們心心眼。


Unicorn Dream $58
波子味及提子味汽水加冰打成 smoothies,上面仲有彩色棉花糖,吸睛度爆橙!


Cookie & Mint $58
湖水藍色是薄荷,下層則是曲奇,smoothies 都有兩層 layers。


Gummy Grape Soda、Bubble Blue Soda $55 杯、$118 Jar
舖內仲有自家製的粉色系列雪糕梳打,雪糕是牛奶味的,一 jar 可以倒出 3、4 杯,仲有大量雪糕,啱大家些牙。




舖頭裝修設計以外國漁巿場做藍本,旺角店比銅鑼灣店更大,有 2 層,仲有卡位,好鬼好坐。

除咗飲品吸睛,食物亦大把話題,出品由大廚阿山主理,他曾在 Jamie's Italian 工作,擅長意菜,午巿主力賣 homemade pasta 都是他主意,特地購入一部意粉機,日日新鮮做意粉,最特別是那款以蝶豆花、紫椰菜做嘅紫藍色蝴蝶粉 Farfalle,仲有加咗檸檬辣椒的鮮製 spaghetti、闊麵 fettuccine 等,以最 fine 的意大利 00 粉 semolina 麵粉炮製,意粉醬及肉丸都是 homemade 的,仲有醬汁、配料同意粉都可自家揀嘅「車仔」style。新加的龍蝦菜式都好有睇頭,以鑊仔焗嘅龍蝦大通粉有足足 1.5 磅加拿大龍蝦肉、仲有超邪惡加咗大量芝士拉絲嘅龍蝦三文治,少女心都對抗唔到邪惡誘惑。


流心芝士龍蝦三文治配薯條及沙律 $108(午巿)
麵包面橙紅的醬是龍蝦膏牛油,裏面夾着車打芝士、Mozzarella 水牛芝士及 Gruyere 芝士、以香草及沙律醬調味嘅龍蝦肉,一切開出現芝士瀑布,牛油香超濃,仲有濃濃嘅龍蝦膏香。


香草白汁煙三文魚紫椰菜蝴蝶麵 $75(午巿)
蝴蝶粉以藍蝶花、雞蛋及紫椰菜製,淡淡的藍紫色,口感十足,刁草白汁煙三文魚是無敵配搭。


大廚阿山特別買這部意粉機日日做手工意粉供午巿用。


龍蝦芝士 Mac n Cheese $208(晚巿)
用 1.5 磅的加拿大龍蝦做,有箝及龍蝦肉,大廚先用龍蝦殼及雜菜煮出龍蝦白汁,再用醬汁為龍蝦肉入味,再放上 2 種 Mozzarella 芝士及瑞士大孔芝士 Emmental 加麵包糠焗製,花心機又有心思;熱辣辣,龍蝦味鹹香且濃,大通粉中間仲滿有芝士!


吉列牛排配忌廉蘋果咖喱撈烏冬 $128(晚巿)
韓國大熱嘅吉列牛扒,安格斯西冷牛肉撲上勁薄的吉列粉炸,牛肉醃過後慢煮至大約 6 成熟,牛味濃而嫩,咬口比 medium 好,可蘸烏冬的忌廉吃,烏冬以日本甜咖喱加上青蘋果煮,香香甜甜。


Day and Nite by Master Kama

地址:旺角山東街 50 號 1 樓 2 樓
電話:3106 0900
營業時間:星期一至五 12nn - 11pm,星期六、日及公眾假期 12nn - 11:30pm
收費:現金及信用卡,設加一

文:Sieg、攝:Ki

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more