蟹季開鑼!即試任食大閘蟹餐

發佈: 2016.09.15
文:

資深蟹民表示,雖然一年四季都可以用到玉蟹、奄仔蟹、花蟹等等,但大閘蟹嘅豐腴美味,係咩蟹都取代唔到!蟹季未開鑼,我已密鑼緊鼓搵抵食、任食嘅大閘蟹套餐。

第一擊係沙田帝都酒店「帝玉庭」嘅任點任食太湖大閘蟹套餐,每位 $438 至 $468,可任點任食大閘蟹。江蘇太湖大閘蟹係主角,大廚仲構思咗 4 款口味,除了清蒸麯酒煮之外,創新混合西式材料創製兩款新口味,包括伯爵紅茶黑松露,好唔好食㗎?

先食最新奇嘅黑松露大閘蟹,大廚先將大閘蟹拆件,放落滾油後快速炸香,再拌入乾葱、蒜蓉及黑松露醬炒香。其實蟹味本身已好鮮甜,加上黑松露菇菌香,濃香得嚟唔會搶鏡。

如果唔喜歡太濃味,可試「伯爵紅茶大閘蟹」,伯爵紅茶味道清淡優雅,先以伯爵紅茶浸泡大閘蟹,將茶味完全滲透蟹肉及蟹膏,再蒸約 20 分鐘就食得。淡雅茶香平衡咗大閘蟹膏的膩滯,帶出 Earl Grey 嘅輕怡。


黑松露大閘蟹
大閘蟹加入黑松露醬炒香,菌香四溢,幸好大奪蟹鮮味。


清蒸大閘蟹
最普通又最得我心嘅選擇,傳統地配紫蘇葉清蒸,有助辟除腥味及中和大閘蟹的寒涼,保留大閘蟹原汁原味。


伯爵紅茶大閘蟹
配伯爵紅茶來個中西合璧,用伯爵紅茶浸泡大閘蟹蟹肉及蟹膏,食落口腔縈繞淡淡伯爵茶香。


麯酒浸大閘蟹
係凍食大閘蟹,先將大閘蟹蒸熟後,以紹興酒、五糧醇及香料浸泡一天,讓酒味滲透蟹身,更吊出蟹膏的甘香。


麯酒浸大閘蟹用咗花雕、芽台、五糧醇等紹興酒,如果想盡興飲多杯,可另外叫紹興加飯酒,邊飲邊食蟹,一流。


呢張係酒店官方圖片,係去年大閘蟹爆膏嘅情況。預計蟹季高峰期來臨就爆喇!

款式花樣好多,蟹的質素係點?店方話大閘蟹每隻 3.8 兩起,好細喎!當然啦,每隻蟹大小各異,記者目測,大部分都係三四兩細蟹,蟹膏唔算多也不算少,希望隨住蟹季來臨質素會再高啲!

套餐除咗 4 款大閘蟹任吃,仲包每位一客蟹肉雞茸雪燕羹即泡薑茶,唔係齋食蟹咁寡!雪燕羹係有真.蟹肉及滋潤養顏雪燕,啖啖精華;而即泡薑茶夠晒薑,好啱一眾怕寒嘅「蟹后」。套餐唔似一般大閘蟹套餐般有蟹粉菜或其他菜式,亦無包甜品,齋食蟹飲湯稍嫌單寡,但剔除咗不相關嘅菜式,相比起坊間動輒過千的蟹餐,這裏平一大截,對蟹迷來說都係划算嘅。


蟹肉雞茸雪燕羹
有鮮蟹肉及雪燕,雪燕係珍貴植物木髓分泌物,產量十分稀少,外形及質感均與燕窩相似,據講好有益。


菊花薑茶雪糕 $48
係套餐以外的甜品,以薑茶及潤喉菊花水炮製雪糕,帶微薑辣又滲出菊花甘香,好有層次。


話梅花雕雪葩 $48
以原粒話梅及花雕酒製成,食落酸甜醒胃,雪葩口感輕怡,能消除大閘蟹的膩滯感。

「滋味「蟹」逅」套餐
供應日期:9 月 19 日至 11 月 30 日
供應時間:6pm-10pm
收費:星期一至四 $438/ 位,星期五至日及公眾假期 $468/ 位(設茶芥及加一)
註:任點菜式包括黑松露大閘蟹、清蒸大閘蟹、伯爵紅茶大閘蟹、麯酒浸大閘蟹;每位客人可享用蟹肉雞茸雪燕羹一碗及即泡薑茶一杯。


帝玉庭

地點:沙田白鶴汀街 8 號帝都酒店 1 樓
電話:2694 3939

文:Celia、攝:Keeyau

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more