試咗!搶手宵夜自助餐

發佈: 2016.09.16
文:

如果你係自助餐狂迷,應該知我講緊邊間酒店餐廳。無錯!就係尖東唯港薈嘅 The Night Market 喇!餐廳由 9 月頭開始逢星期五推出宵夜自助餐,話明宵夜,真係好夜開始,限時兩小時,由 11pm 至 1am 放送,夜鬼最啱。餐廳的晚市自助餐質素一向有口碑,對於宵夜自助餐,我抱期望!



開餐前先巡視一周,宵夜時段,海鮮吧同樣有長腳蟹青口東風螺樣樣齊!刺身吧亦有 4 款刺身,冷盤區有黑松露茶燻蛋,甜品區仍然有晚餐重點嘅榴櫣乜乜乜;熱食區呢,有牛扒羊架串燒,種類選擇絕不比晚餐遜色,無欺場喎!宵夜想食小食,一樣滿足到,有足料鹹豬骨火鴨蠔豉粥碗仔翅!最驚喜係除咗啤酒汽水果汁任飲外,仲有 MövenpickHäagen-Dazs 雪糕任食!

每位 $388,作為宵夜一啲都唔平,不過食物選擇算好多,而且保持到晚餐水準,食物頻頻 refill,價錢係晚市嘅一半,如果 book 唔到自助晚餐,可以一試!美中不足就是時間有點太夜,食完可能要搭的士歸家。

必食熱盤

明爐燒牛扒和羊架,肉色帶粉紅,medium 生熟度剛好,肉質相當嫩,仲有肉汁。


兩款宵夜限定食物,分別有鹹豬骨火鴨蠔豉粥,火候足,材料又多,粥底夠綿。鮑魚雞絲碗仔翅,啖啖鮑魚絲,食得夠過癮。


一般自助餐的串燒肉質都帶乾,但這裏做的,完全打破呢個印象;雞翼好 juicy,雞腎及雞肉串亦夠晒惹味。


千祈唔好錯過熟食區的麵食,即叫即煮,除咗有大大粒雲吞及彈牙魚蛋,最精彩係喇沙湯底,椰香味十足,又辣辣地,好惹味。

新鮮刺身



刺身三文魚、吞拿魚、章魚及牡蝦,即叫即切,新鮮。吞拿魚係回本位。

驚喜冷盤




冷盤醉雞翼、紅油炒手及辣味牛肉,不過最特別莫過於蟹肉釀芒果,芒果的酸甜原來與蟹肉好夾,一口一啖,不知不覺食了四五件,還有黑松露茶燻蛋,熏蛋的蛋香,隱隱透出黑松露的香味。

狂食海鮮




要回本,海鮮當然不能錯過。當日有長腳蟹、東風螺、凍蝦、青口及魷魚,每款都夠新鮮,尤其凍蝦肉質好彈牙。

榴槤乜乜乜




食過晚市自助餐的朋友都知 The Market 的甜品名物是榴槤,宵夜時段又點少得呢?款式與晚市差不多,榴槤芝士撻、榴槤斑蘭卷……榴槤粉必定會陷入瘋狂狀態!唔嗜榴槤,仲有數款招牌甜品,如焦糖布甸、朱古力及綠茶蛋糕,但要回本就必定要食多幾轉 Mövenpick 及 Häagen-Dazs 雪糕,仲要係新口味㖭!




汽水、啤酒及果汁都係任飲唔嬲。

宵夜自助餐
供應日期:逢星期五(公眾假期除外)
時段:11pm-1am
價錢:$388(成人)、$288(小童),設加一


The Night Market
地址:尖沙咀東部科學館道 17 號唯港薈 2 樓
電話:3400 1388

文、攝:Theo

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more