原條東星斑上!霸氣外露魚湯米綫

發佈: 2016.09.19
文:


呢間霸氣外露嘅魚湯米綫店叫「漁川米線」,係荃灣和灣仔都有分店。我今日去灣仔店,入到舖頭,見到牆上嘅 poste r大大隻字寫住「全港首個(野生東星斑)米線」,再加多一張紅色嘅東星斑浸喺碗入面嘅相。嘩!有無咁誇張呀?睇埋個價錢,$88?野生喎!東星斑喎!好抵食,無慮即決!


餐牌的選擇勁多,單是配魚的米綫都有 10 多款。原條魚米綫都有黃花黃腳鱲大眼雞馬友 4 款選擇,啱晒鍾意食魚嘅朋友仔。


原條東星鮮茄米線 $88
店內選用的是菲律賓直接入口的天然野生東星斑,魚嘅 size 一啲都唔細,魚身長過個米綫碗,絕對唔係魚毛仔!以呢條魚嘅大細,再加多碟菜,就已經係一個二人家庭嘅晚餐!最重要是成條東星斑原條上枱,賣相夠晒豪!


賣相夠呃 like 吸睛係唔夠,東星斑分量好足,條魚唔係瘦猛猛,好厚肉!魚肉白雪雪,食唔到有腥味。魚肉結實、唔鬆散,證明新鮮;但魚味唔算濃和鮮甜。但 $88 食到呢個質素,絕對合格!


魚湯米綫嘅湯底有兩款可以揀,純魚湯每朝 6 點開始用 60 斤海魚煲,熬足 4 小時,完全唔加味精,難怪啖湯咁濃咁甜又有阿媽靚湯 feel!番茄魚湯就加咗新鮮番茄再滾,番茄味濃但唔會過酸。酸酸哋仲可以提鮮,呷一口番茄魚湯再食啖魚肉,魚香鮮味湧現!


米綫嘅粗幼度適中,入口滑溜爽,沒有奇怪嘅粉味。廚師唔會將米綫煮得太腍,食落有咬口又爽口。


原條黃花魚泡飯 $58
黃花魚都唔弱,魚身都長過米綫碗。而且黃花魚有預先煎香,魚油滲出更加香噴噴。


平時食到嘅黃花唔係大細條無乜肉食,就係太多骨。但呢條黃花魚肉厚、唔鬆散,可以大大塊肉咁夾起。魚肉質地幼滑,真係食到魚嘅甜味!


呢個選配純魚湯,湯底呈奶白色,配有絲瓜椰菜豆卜。飲落好有魚香、唔會腥、無味精,飲多啖都唔口渴。


飯粒粒分明,無結成一嚿嚿,食落不糊不綿,吸咗魚湯嘅飯粒唔會過分脹身,飯粒仍然有嚼勁。


漁川米線
地址:灣仔太原街 7 號地下
電話:2386 4188
營業時間:7am-10pm

文、攝:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more