隱世冬菇亭 高手炸髀炸翼凍檸茶

發佈: 2016.09.20
文:

如果你係大埔區吃貨,一定估到我講嘅係廣福邨冬菇亭嘅「嘉華咖啡小食」。摺枱膠凳、牛角扇、街邊位,冬菇亭典型格局,不過佢架勢啲,分開冷氣區同風扇區,以厚身膠墊圍住以免冷氣外漏,天氣熱時嚟都唔覺辛苦。


一貫冬菇亭簡陋裝修,但食店同做人一樣,係睇內涵嘅。


冬菇亭都裝咗中央冷氣,勁!

一坐低,大部分食客都二話不說叫杯凍檸茶!唔使講都知一定係招牌!據講老闆用咗 5 種茶葉自行調配茶底,仲會睇客人流量而撞茶,將時間控制得剛剛好,茶沖好唔會放得太耐,自然鮮香不澀,加上幾種茶葉,茶味嗒得出有層次,即使無叫少甜,都嚐到濃茶味,加上檸檬清酸,中和了甜味,果然不錯。


凍檸茶 $16
無飲過凍檸茶,唔好同人講去過嘉華!茶香檸鮮,一杯有 4 片鮮檸檬,厚薄均一,高水準之作。


凍奶茶 $16
嘉華名物之一係熱奶茶,我怕熱所以飲凍的,出品無失望,茶味濃又夠香滑。

嘉華另一樣名物係沙嗲牛麵,通常跟常餐;牛肉雖然不是鮮牛,但食落無渣,難得係老闆沒有下梳打粉,尚算食到點點牛味和自然質感。靈魂嘅沙嗲汁夠香辣,唔會過鹹,可帶起牛香。




沙嗲牛肉麵 $21
沙嗲汁夠濃夠辣夠惹味,食得出牛肉無用梳打粉醃,有質感有咬口之餘無渣。

其實呢度仲有好多嘢係必食,好似炸髀炸雞翼!普通食店嘅炸雞翼炸髀,唔係預先炸好凍冰冰,就係因為炸過龍變得又乾又柴;這裏即點即生炸,醃味恰到好處,雞髀雞翼外皮無厚厚粉漿,炸到脆卜卜,肉質仍然滑身,仲有肉汁㖭!炸完喉嚨一大輪,飲番啖凍檸茶,爽晒!




炸雞髀 $20
炸髀不乾身,外皮香脆,雞肉嫩滑 juicy。


炸全雞翼 $20/ 兩隻
外皮顏色炸得靚又均勻,咬落肉嫩多汁,證明炸的火候剛剛好。

如果你打算去嘉華吃飯,我有另一個建議,就係呢度嘅鹽焗雞飯炒底!呢個雞飯,喺網絡上勁 hit。鹽焗雞鹹香味入晒肉,配濃惹沙薑汁吃,超惹味;一定要加 $8 配炒飯底,食落甘香之餘仲粒粒分明。我早幾日 1pm 去到,已經沽清!

Yoky C.(@yoky)張貼的相片 張貼

要食鹽焗雞飯炒底,記得要早!早!早!中午12 點左右就沽清!

呢間隱世茶檔已經喺廣福邨服務街坊 30 年,宣傳不多,但老闆好有遠見,早在 07 年已衝到北京開分店,叫「嘉華茶餐廳」,仲係當地明星飯堂,所以話有麝自然香,就係咁解。


傳統舊式茶記嘅餐牌,用到殘兼字體不清,反而夠貼地。


侍應叔叔喜歡將刀叉食具插在水杯中,讓你自己抹乾用。


有好多街坊喜歡吹風扇,會揀非冷氣區,一樣坐得自在。

嘉華咖啡小食

地址︰大埔廣福廣崇樓側熟食亭 5 號
電話︰2653 1380
營業時間︰6:30am-6:30pm

文、攝:Celia
轉載:yoky instagram

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more