食小炒幫到手!Cool 爆 80 後派飯畀長者

發佈: 2016.09.21
文:

荃灣二陂坊,每逢星期日下午 4:30pm,總出現人龍,原來成班長者為的是取一盒熱騰騰的豆腐肉碎飯。這飯盒,你會可能賺無乜料,但其實係小炒店店主原哥諗過度過而設計,老人家無牙,這味又健康又易𡁻!最估不到是原哥才 30 歲,外表冷酷霸氣,煙不離手,硬漢背後是一顆敬老的心。

原哥茶餐廳廚師出身,25 歲就當上老闆,3年前開了這間小炒店。派飯原因源於不時深宵幫襯區內麥記,心痛總有執他人剩食放入口的飢餓無依老人,9 個月前決心每逢周日在店外派 200 個飯盒給長者,落雨天更會多派給附近的露宿者和拾荒者。

慈行會感染他人,初期夏蕙姨也主動來幫手派飯,亦曾經獲有心人放下$5,000 支票贊助飯盒及生果,亦有個別受感動的客人放下數百元支持。「有網民話我搏宣傳,哼,我都費事嬲!呢個夏天生意跌咗三成,有考慮過停派飯,但諗起班長者可能失望,雖然唔知可以頂得幾耐,暫時仲繼續派。」原哥話。

有生意先可以撑起善事,原哥好勤力做好小炒,增加收入補貼派飯。小店的餐牌由小炒、海鮮、火鍋、雞煲、川菜、潮州打冷、砂鍋粥都有。香口小炒諸如私房蜜汁牛柳粒、黑椒豬手、脆皮冰梅骨、虎皮釀尖椒,做得不俗。

仲有抵食的 2 至 4 人海鮮小菜套餐,平均 $488 已經可以食到芝士龍蝦伊麵、椒鹽鮮魷、豉椒炒蜆、懷舊砵仔焗魚腸等。原哥家姐 Kelly 仲每天去楊屋道街市買海鮮,加上餸菜分量大,價錢大眾化,得閒去幫襯一餐飯,間接幫到老人喎。


原哥和家姐 Kelly(右)自小居住荃灣區,對這區有份情意結,知道區內有不少老人家,希望盡點綿力給他們一餐溫飽。他叮囑記者採訪時別騷擾公公婆婆,看出這位 cool cool 地的80後對長者特別尊重。


新鮮煮好的豆腐肉碎盛於大鍋中,直接舀入飯盒內,夠晒暖笠笠。


虎皮釀尖椒 $68

尖椒鮮辣,鯪魚肉香口,好啱佐酒。


脆皮炸大腸 $78

大腸塗上 2 層麥芽糖炸,帶甜闢了羶味,煙煙韌韌。


私房蜜汁牛柳粒 $88
香甜的蜜糖汁包封着每粒美國牛柳,混了黑椒,更辛香。


每逢星期日下午,百多位長者會站在門外排隊等派飯,排首位的早上 11am 已來到。


源記

地址:荃灣二陂坊地下 6 號舖
電話:2614 1688
營業時間:12nn-2am
收費:只收現金,不設加一
交通:港鐵荃灣站 B1 出口
泊車:荃新天地 $20 hr
平均消費:$120

(原文摘自 U Magazine ISSUE 563)

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more