茶記大激鬥 邊間炒蛋最香最滑?

發佈: 2016.09.21
文:

「伙記!早餐配炒蛋」呢句係繼「早晨」之後,每朝擘大眼必講嘅開場白。諗真啲,其實 lunch 食常餐、下午茶嗌件三文治咪又係有炒蛋!食到一份滑嘟嘟嘅炒蛋,人都開心啲!究竟點先稱得上是最正嘅炒蛋呢?

一份好食嘅炒滑蛋,應該要……
賣相:一碟新鮮炒起的滑蛋,要有光澤和水漾感,散發出蛋香。
口感:炒滑蛋,有名你嗌,梗係要夠滑!炒好嘅蛋唔可以太老、死實實。哎呀!炒滑蛋唔可以 well done 㗎!不過,又唔可以炒到水汪汪,會無口感,同飲蛋汁有乜分別?
味道:食蛋有蛋味,唔係廢話!有啲茶記亂溝牛奶及忌廉,甚至加水,乜蛋味都溝淡晒!此外,茶記炒蛋係高卡陷阱,因為往往落好多油!超班嘅炒蛋,唔可以滲油,亦唔會食到牛油、忌廉嘅飽滯。

估唔到一份炒蛋都咁講究吧?即睇邊間茶記炒蛋最正!



冰室界新星 牧牛 6 分
第一位參賽者,係兩個月前落戶大角咀嘅牧牛冰室,走懷舊路綫,灰色撞綠色嘅磚牆真係勾起唔少回憶!餐廳開咗無耐,區內街坊就畀炒蛋俘虜!偷偷望入廚房,見廚師用個平底鑊配合摩打手快拋鑊,再用鑊鏟快手炒幾吓,唔使兩分鐘就炒好一份滑蛋


「No」得頂麵 $39
炒蛋略有光澤,睇落老身,顏色亦較深黃,內內外外都無乜蛋汁。


食落都算滑,但味道較淡,蛋香不夠突出,整體口感偏實淨,再滑身點會更好。


炒滑蛋唔會滲水,雖然碟底唔見有油但食落其實好膩好滯。

小評: (以 5 *為最高)
賣相:**
口感:**
味道:**
總分:6 分


牧牛冰室
地址: 大角咀中匯街 7 號地下
電話: 2786 2666
營業時間:7am - 6pm

水漾有光澤 澳牛 11分
澳洲牛奶公司,唔使多介紹啦。最出名嘅唔係啲伙記夠霸氣,而係炒滑蛋!前員工透露,澳牛老闆專用靚料,炒蛋嘅蛋漿混合咗3種蛋調製,好花心思。每個人面前一定有碟炒蛋,唔食過點算嚟過澳牛?


茶餐 $43
炒蛋嘅顏色呈淡黃色,賣相水漾有光澤,部分留有滑溜蛋汁,賣相滿分!


蛋味突出,炒得夠晒鑊氣。質地滑嘟嘟,可昔蛋汁比較多,質地較削,口感差少少,但點都好過well done炒蛋!


放心,呢啲係蛋汁嚟嘅!蛋底下唔算好油,食落都唔滯,食到有蛋味但唔算好濃郁!可惜炒蛋味道比較鹹,略嫌蓋過蛋味。

小評:
賣相:*****
口感:***
味道:***
總分:11 分


澳洲牛奶公司
地址:佐敦白加士街47-49號地下
電話:2730 1356
營業時間:星期一至三、五至日 7:30am-11pm,星期四及勞工假期休息

半熟滑蛋 華星 13 分
華星冰室出名係明星竇,但舖頭出品唔係明星宣傳,而係本身有實力。好似佢嘅滑蛋,一出道已有人將佢同澳牛相提並論!色澤光鮮亮麗,入口超滑溜,每一啖都是半熟滑蛋,內裡包裹住豐盈蛋汁,蛋味香而濃郁,水準相當高。


常餐 $40
炒蛋顏略呈橙黃色,表面有光澤又有蛋汁,賣相都幾吸引!


近鏡睇真啲,炒蛋呈半熟狀態。食落蛋味突出,唔會過鹹。質地滑溜,啜到有蛋汁又咬到炒蛋,口感豐富。


炒蛋感覺唔油膩,唔會食到成口油。不過炒蛋有少量水滲出。

小評:
賣相:****
口感:****
味道:*****
總分:13 分


華星冰室
地址:旺角西洋菜南街107號地下
電話:2520 6666
營業時間:7am-11pm

總評:華星 勝!
利申,小記一直係澳牛忠實粉絲!Battle前真係唔會認為澳牛會輸,但食過之後真係不能不服!澳牛炒蛋的確好滑,但係太稀太多蛋汁反而令口感減分,而且味道偏鹹蓋過蛋味,跌眼鏡。華星真係做到 7 成滑蛋、3 成蛋汁,滑蛋又唔會炒得過火,夾住啲蛋汁一齊食,感覺更加滑溜!炒蛋唔會太鹹,蛋味突出,今次係佢贏喇!

文、攝:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more