放蛇實試 90 分鐘任食燒肉回到本?

發佈: 2016.09.21
文:


點解「牛角」會搞放題?因為 6 歲生日!為咗益粉絲,由即日起首次推出「夜食の食べ放題」, 只限旺角瓊華、奧海城及香港仔分店。放題每晚 9 點開始,聽起嚟好夜,但香港人個個晏收工,去到啱啱好。入座計可以食 90 分鐘,咁每日可以做到幾多 round 放題呢?店員話餐廳 10:30pm last order、11pm 收舖,所以做一round 90 分鐘放題時間剛剛好,每晚只止一場咋!


今次記者揀咗大角咀奧海城分店試食,8: 30pm 去到已經見到長長人龍!店員話, 每晚都會有 3 成座位留畀預訂的客人, 其餘 7 成會做 walk-in 客,而奧海城分店每日8: 30pm 開始派籌,大家自己睇時間喇!


放題分 3 個等級,最平 $188 起就有交易,「 特選食べ放題【鶏、豚】」可以食到 2 款豚肉2 款雞肉 2 款海鮮前菜沙律牛角飯共 33 款食物,都唔算少,不過無牛肉。想食牛就要揀$ 228 起的「豪華食べ放題コース」,可以食到 5 款包括牛舌 牛肚網燒一口牛肩脊肉等牛肉,仲多咗石斑魚柳 黑糖牛油番薯等,總共 47 款食物。

再豪啲,食到最貴其實都係 $298 起,前菜沙律都多咗選擇,牛肉選擇再多 3 款, 食埋厚切牛舌牛角上級牛肋肉骨付牛肋肉, 豚肉有丹麥皇冠豚扒,另有香草芝士雞髀肉廣島蠔牛油帶子車海老壺漬味噌大腸等,總共 74 款食物,多到差啲食唔晒!


飲品有可樂烏龍茶白桃巨峰提等唔同味的乳酸味梳打津輕林檎蘋果汁等 16 款任揀,選擇好多,而且都算揼本。另外加 $10 及 $20 可以任飲 Asahi Suntory 生啤。 記者一次過嗌 3 杯飲品都無問題,飲品上得好快, 不過隔離枱嘅汽水就等足半個鐘、催足 5 次都未見蹤影。


每個餐最基本都跟每位一客的肉食拼盤,記者試食 $298 套餐, 一坐低店員就送上和牛拼盤,包括極上和牛西冷和牛牛肋肉 肩脊肉丹麥雞胸肉豚肉和牛是日本貨, 但之後放題食到的所有牛都是美國貨,雖然無日本牛咁油花密布,不過美國牛勝在肉味濃,分量按人頭計, 每款肉每人都有兩塊,分量適中。


枱面上唔見有柯打紙,點食物時客人要逐款朗讀再由店員慢慢罰抄, 一下子嗌得太多食物的話,隨時出現抄唔切或有錯漏的情況。


記者計時,落 Order 後 7 分鐘內就開始有嘢食,都算快。


隨即再上埋牛油金菇,分量唔算少。


蔬菜上枱後唔夠 1 分鐘,再送多兩碗牛角飯, 分量同平時食到嘅一樣,無欺場!


極辛味噌拉麵平日嗌要 $55 一碗,而家放題都有得食。麵條有咬口,湯底微辣唔太鹹, 再加多隻蛋做配料。味道一般,可以留肚食其他嘢。


前菜上枱後重新計時,10 分鐘內就有肉食!牛肉都係每人有兩塊, 就一人一隻。呢個上菜速度唔算太慢!


睇真啲,厚切牛舌約 1cm 厚,夠腍但唔夠牛油香。牛角上級牛肋肉 骨付牛肋肉嘅 size 跟平時散叫差不多,質素都 keep 到, 唔會因為放題而將貨就價。


各款肉類口感各不同,燒嘅時間同火候都唔同㗎,唔好校到個火咁大,又或問下店員大約燒幾耐都得。


芝士雞髀肉,做到拉芝效果,好邪惡!


食食吓,店員突然送上平版電腦作點餐之用, 咁就大大減少落漏單嘅機會。不過記者有兩次試過想落單都不被接受, 最後都係搵返店員「罰抄」。


45 分鐘過後,全場人開始追加食物,為免人多落單太混亂, 記者即刻舉手加單。第二 Round 肉等咗 15 分鐘就有得食, 都算合理,讚!


跟首回合一樣,每份肉都有兩片,唯獨丹麥皇冠豚扒就得一塊, 不過咁厚切食一塊都夠啦!肉味香濃,厚切口感又好。另外再點普通版牛舌, 油脂香都係差咗啲。一口牛就好 juicy 又有牛味,值得再追加。


車海老(即係蝦),一份得一隻!兩個人記得點兩份! 鹽味石斑魚塊出奇地好食,魚肉實淨又有甜味,必試!


食最豪嗰 set 必點壺漬味噌大腸,大腸燒香後油脂溢出勁香口, 入口又腍又無渣,仲有洋葱墊底,燒埋當蔬菜食!


放題包埋甜品雪糕銅鑼燒(綠茶或呍呢嗱味),不過店員掛住收錢, 無主動提過有甜品,唔想蝕底唯有自己開口問啦!


埋單計數,放題 $298 加一之外,真係無再加其他雜費。 粗略計算,如果散嗌咁多款食物,總共約 $850 (兩位計)。 由於分量少啲,打個 8 折計算,都要 $680 兩位計、$340/ 位) !仲未計日本和牛拼盤、飲品及甜品,真係回到本㗎!燒肉迷食得過。

90 分鐘放題套餐(每日 9pm 後供應)
1. 特選食べ放題コース【鶏、豚】
星期一至四 成人 $188、小童及長者 $138,星期五、六、日及公眾假期 成人 $208、小童及長者 $138
2. 豪華食べ放題コース
星期一至四 成人$228、小童及長者 $148,星期五、六、日及公眾假期 成人 $248、小童及長者 $148
3. 極上食べ放題コース
星期一至四 成人 $298、小童及長者 $168,星期五、六、日及公眾假期 成人$328、小童及長者$168

牛角放題分店地址:
1. 旺角瓊華中心 6 樓全層 電話:2152 1822
2. 西九龍奧海城 2 期 1 樓 128A 號 電話:2702 8128
3. 香港仔中心商場 4 期 1 樓 45 號舖 電話:2555 2418

文、攝:Jessie

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more