等咗 3 個月!表參道超厚蛋治 香港食得到

發佈: 2016.09.22
文:


Omotesando Koffee Hong Kong 6 月正式登陸灣仔利東街,係香港開咗 3 個多月,至今人氣不減,係咖迷蒲點、文青打卡勝地!開業初期,曾聽聞會有港式 style 嘅蛋治供應,不過一直只聞樓梯響,襯咖啡的甜品只得焦糖蛋糕仔 Kashi 及Matcha Brownie 兩款。上星期小記再去歎啡,發現 Food Menu 選擇多咗,等足 3 個月嘅蛋治終於出現!仲有番茄火腿三文治、牛油果多士及咖喱飯,當中 3 款仲要係香港獨有,香港人總算有福!


Egg Sandwich $58
之前有說 Egg Sandwich 係香港限定,店員話其實日本都有蛋治!三文治唔係即叫即整,落完柯打店員即時於收銀櫃附近拎出三文治,有啲失望!不過一睇,興奮感返晒嚟!一盒 3 件,雞蛋唔係港式炒蛋,而是關西風味玉子燒!厚厚嘅玉子燒望落去好似勁厚鮮牛油咁,賣相好吸引!等咗 3 個月喎,點都要試啦!


三文治嘅麵包好軟熟,抹上混入了 wasabi 嘅沙律醬,wasabi 味唔太濃、唔會有嗆喉攻鼻感覺,味道甜甜哋,好特別。


中間嘅玉子燒唔係平時食開卷起一層層啲玉子,而是一大嚿、好似玉子豆腐咁嘅質地。店員話,特別選用蛋味突出嘅日本雞蛋,再於蛋漿加入秘製鰹魚汁。玉子唔係用鑊煎香,而是以半蒸半焗處理,難怪玉子食落滑溜,蛋味夠香,即使凍食都好好味!


B.L.T Sandwich $58
香港限定款式,三文治同樣係預先製作,不過店員話遲啲會考慮即叫即做。B.L.T Sandwich 以白麵包夾住生菜、番茄及火腿,多咗蔬菜食落無咁 heavy!


火腿都係厚切,仲帶點煙燻香味,加埋少許沙律醬,味道清新啲,是輕食之選。


Avocado Toast $118
香港限定嘅仲有呢個 Avocado Toast。Sourdough 麵包烘到外面香脆,中間仍然保持煙韌。


多士面鋪滿混入了洋葱粒、番茄粒及蟹肉嘅芥末牛油果醬。拌以芥末嘅牛油果醬,減輕滯賺感,牛油果醬口感 Creamy,又有爽口嘅洋葱粒增加口感,當咬到番茄時又再增添一份清新!


牛油果醬上仲有水波蛋(Poached Egg),切開即湧出金黃色嘅蛋汁,與牛油果醬拌勻同食,感覺更幼滑。


Hayashi Rice $78
想食熱嘢都滿足到!咖啡店仲有一款熱辣辣嘅咖喱飯,係 cafe 食咖喱飯確係有趣嘅配搭!


甜口咖喱汁入面有大量免治牛肉,最讚是洋葱依然保留脆口感,唔會煮到融融爛爛。沾滿咖喱汁嘅日本珍珠飯粒,真係好惹味,食完個胃暖笠笠!食完再飲杯招牌手沖咖啡,好滿足!


Omotesando Koffee
地址:灣仔皇后大道東 200 號利東街 G24-25 號
電話:2601 3323
營業時間:星期一至五 8am-8pm,星期六、日 9am-9pm

文、攝:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more