期待已久!大人氣 TwoTwo 炸雞嚟喇!

發佈: 2016.09.26
文:


等到喇!等到喇!由 7 月收到消息話 TwoTwo Chicken 會嚟香港開店,等足差不多 3 個月,舖頭終於宣布將於 10 月喺天后大坑書館街,開設香港首間分店,10 月 1 日試業。TwoTwo Chicken 可以話係韓國炸雞界嘅前輩級人馬,餐廳擁有 30 幾年歷史,單喺韓國就有超過 300 間分店,以後唔使飛韓國都食到,香港嘅哈韓族真係太幸福!


香港店嘅炸雞款式選擇與韓國本店相似,原味香蒜甜辣味香葱照燒汁麻辣共 6 款口味。由於韓國雞唔可以出口,所以餐廳改用重 900 克嘅巴西雞製作,炸雞全部有骨,仲可以柯打半隻,可一次過試多幾款。記者覺得雞的 size 偏細,肉多而結實,肥的部分偏少。


餐廳嘅炸雞出名外皮酥脆,雞肉嫩滑多汁。香港分店會沿用 TwoTwo Chicken 30 年以來自家傳統秘方做炸雞。雞件會以韓國本店提供嘅秘製醃汁,再加入蒜等 兩三款新鮮材料調成醃汁。醃汁雪一晚待發酵令味道更濃郁,先用嚟醃雞,醃足一日再風乾,吹到乾身再蘸上自家特製炸粉炸。大廚仲細心咁拍走多餘炸漿,炸好嘅雞件唔會有厚厚嘅炸粉!


炸爐特別由韓國運嚟香港,雞件會分別炸兩次,炸第一轉時會先以攝氏 210 度,加蓋炸 5 分鐘,特製嘅炸爐會邊炸邊抽真空,將空氣抽回炸爐內,令雞肉更加濕潤。5 分鐘後將雞取出略剪裁,再炸第二次至全熟。


餐廳會預先炸好一堆約 5 成熟嘅雞件,有柯打時再落鑊炸第二轉至 9 成熟,然後再加醬汁拌炒。


原味炸雞 $78/ 半隻、$148/ 全隻
炸雞唔會見到有厚厚嘅粉漿,皮炸得又脆又乾身,雞肉唔會炸到乾爭爭,一定要趁熱食!


麻辣炸雞 $78/ 半隻、$148/ 全隻
香港獨有麻辣味炸雞!麻辣醬以新鮮和乾的指天椒、花椒及多種香料煮成,炸雞有少辣,但唔覺有麻香,吃食時飲番杯冰凍啤酒先正。


香蒜炸雞 $78/ 半隻、$148/ 全隻
想再惹味啲?可試香蒜口味。將炸至金黃鬆脆嘅雞,拌生蒜製成嘅蒜香汁,蒜香濃郁,微辣嘅蒜香汁又可進一步中和炸雞嘅油膩,食完口腔仲有好悠長嘅蒜味!


甜辣炸雞 $78/ 半隻、$148/ 全隻
酸甜醬夠醒胃,混合咗蒜料,醬汁完全包圍脆香嘅炸雞皮,好滋味!


香葱炸雞 $78/ 半隻、$148/ 全隻
雞件拌以秘製葱汁,上面再鋪滿新鮮葱絲,一定要連葱食先食到葱嘅清香。食埋伴炸雞嘅特製醃白蘿蔔,酸咪開胃又去滯!


Golbang-I 香辣海螺冷麵 $78
海螺肉拌以韓國辣粉,與兩球冷麵撈埋一齊食,辛辣過癮。


炒飯 (售價待定)
香港店有獨家炒飯及 Taki-Soba 炒麵,以澳洲品牌嘅甜燒汁醬,再加雞髀肉炒成,甜甜哋好特別。


Taki-Soba 炒麵(售價待定)
香港店獨有菜式之一,煙韌嘅冷麵配帶甜嘅燒汁,要等正式開幕先有得食。


(左)Snowing $68、(右)Purple $68
炸雞同啤酒是絕配,原來配 mocktail 都一樣咁夾!香港店有一系列獨有嘅 cocktail 及mocktail,左邊是以菠蘿汁、柚子蜜糖及椰奶調製而成,香香甜甜有熱帶感覺。另一杯是以蔓越莓汁、raspberry 汁、青檸汁、玫瑰味糖漿及 7 喜 mix 成,酸酸哋好消滯!


TwoTwo Chicken
地址:大坑書館街 15-16 號地下
電話:2750 6490 / 2750 6491
營業時間:10 月 1 日試業,試業期間為 11:30am - 11pm

文:Jessie 、攝:keeyau

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more