築地豊洲水產着陸!超多款海鮮丼 聽日有得食

發佈: 2016.09.27
文:




豊洲水産來頭有幾勁?介紹食物之前要講吓故!位於東京築地市場內嘅豊洲水産,向來以批發為主,老闆伊藤紘明嘅父親也是經營水產生意,而伊藤先生喺 20 歲開始自立門戶,至今已經營咗 13 年,雖然時間唔算耐,但舖頭水產種類達 70 多種,好多都會批發到香港、新加坡及澳門。其實豊洲水産喺日本一直做海鮮批發,無餐廳㗎!今次嚟到香港開首間料理店,香港人可以坐底慢慢歎海鮮丼!


餐廳會於聽日(9 月 28 日)至星期五(30日)soft opening,試業期間暫有 6 款海鮮丼供應,仲會有半價、免加一優惠!


到 10 月 1 日正式開張,海鮮丼選擇會增加到 20 多款。餐廳所用嘅海產大部分來自日本,除咗築地直送嘅海鮮之外,更有著名漁港三崎港的鮪魚(MAGURO)。唔係普遍、平價嘅吞拿魚(Tuna),MAGURO 於捕捉後會以攝氏零下 60 度急速冷凍,可以更有效保存魚鮮味。餐廳會供應不同種類的 MAGURO,好似大眼吞拿魚、日本黑吞拿魚、黃吞拿魚等,可以食到嘅部位亦夠晒刁鑽,魚眼、魚頭、魚都有得試!


海鮮丼另一個靈魂,就係飯!餐廳特別選用日本山形縣生拔米做海鮮丼。米飯飽滿有光澤,飯粒分明、口感鬆軟,帶香甜味,配自家製醬油更能突出水産嘅鮮味。


豊洲海鮮丼 $358/2 人份量
飯面鋪滿牡丹蝦、甜蝦、帆立貝、鮪魚(赤身及腹身)、香葱鮪魚腩、油甘魚、醋鯖魚、海膽、山芋粒、鮮海草、三文魚子、皇帝蟹肉等至少 12 款材料,是全店最豐富嘅海鮮丼!


黑鮪霜降腹身丼 $188
選用三崎港嘅水揚黒鮪,6 大片厚切腹身肉,睇見都流口水!腹身肉質肥美,入口即融。廚師將近骨的魚肉製成魚蓉,魚味特別濃郁。


蜜餞梅干香葱黒鮪火炙丼 $158
選用水揚黒鮪嘅腩位,上枱後店員會於席前用火槍炙燒,熱力將魚油完全逼出,油脂再回滲飯粒內,香噴噴!客人可按喜好加入 wasabi、葱粒及一味粉。食時再拌以鹽漬製和歌山紀州蜜餞梅干,甜酸開胃,減輕油膩感。


美人丼(秘製香葱鮪魚腩、魷魚、黃蘿蔔、蜜餞梅干) $118
店內有兩款美人丼,呢款係以秘製香葱鮪魚腩、青瓜粒、番茄、山芋粒混合而成,蔬果令丼飯增添清新及爽口感覺。另伴以魷魚、蜜餞梅干、黃蘿蔔及三文魚籽,又一豐富之選!


美人丼(秘製香葱鮪魚腩、韓味醬鮪面頰) $118
秘製香葱鮪魚腩、青瓜粒、番茄等材料外,加上韓味醬配鮪魚臉珠,肉質嫩得嚟又有彈性,好特別!


鰻魚丼(名古屋風)$128
名古屋風鰻魚丼,一上枱已經香噴噴!鰻魚厚肉又無腥味,烤得焦香,魚肉嫩滑多汁,就咁食已好好味!亦可以將白葱及柚子、山椒拌入鰻魚丼內一齊食,味道多啲層次。記得留返少少加埋鰹魚昆布湯拌飯,一飯 3 食!


蜜餞梅干鹽味牛脷丼 $108
飯面鋪滿薄切牛脷,密不見飯!牛脷爽嫩,充滿油脂香,拌以和歌山紀州蜜餞梅干,令丼飯增添一份酸鹹味,食落無咁膩。


鹽燒鮪魚鮫 $98
平時食開嘅魚鮫又細嚿又散,呢度嘅魚鮫係重量級、超巨型,足足有 10cm 長!鮪魚鮫是魚鰓對下、兩邊魚鰭對入的位置,每條魚只能起出兩件魚鮫。骨少、肉嫩肥美,廚師以鹽燒方法處理,將油充分逼出,超香口!


汁煮鮪魚眼 $98
大過拳頭嘅鮪魚眼放於面前,的確好震撼!魚眼用汁煮處理,老闆話主要食旁邊嘅骨膠原及魚肉位置,魚眼肉質煙韌,用嚟送酒一流!


極上魚鮮味噌湯 $28
味噌湯超足料,湯底以鯛魚、油甘魚等多種魚及其他雜魚,加上葱、豆腐等煮成。大廚特別用了北海道知床半島的羅臼昆布,令湯嘅鮮味大大提升。

聽日 11:15am 會有鮪魚解體 show,仲會用啱啱即切嘅鮪魚做海鮮丼畀參加者拎走!想參加?可以登上餐廳 Facebook click 入指定網址做簡單登記後就得,名額得 30 個咋!


豊洲水産海鮮丼専門店
地址:灣仔謝斐道 415-421 號積福大廈地舖 B
電話:2808 0292
營業時間:1pm-11:30pm(9 月 28 日):12nn-3pm、6pm-11:30pm(正式開業)
Facebook:www.facebook.com/ toyosusuisanhk/

文:Jessie、攝:Chow

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more