今年要快 book!人氣大閘蟹餐任食 5 款蟹

發佈: 2016.09.27
文:

如果你係大閘蟹癡,一定識得香港九龍東皇冠假日酒店的紫粵軒。中菜廳幾年前已推出大閘蟹任食套餐,每年反應都好激烈!聽酒店經理講,單是去年已供應超過十萬隻大閘蟹,酒店不斷加開座位,延長供應期,但仍有 3,000 食客落空!今年係酒店第三年搞任食大閘蟹盛會——「大閘蟹 膏瘋會」,最初以短訊通知熟客和於 fb 推廣,3 日內已接受超過 2,000 位客人預訂,認真誇張!



套餐只選用四至五兩(煮前)蟹公,打開蓋即見橙黃蟹膏。

同坊間一般大閘蟹餐不一樣,除咗任點任食,最大亮點就係大閘蟹有多種食法。今年保留咗去年 3 款最受歡迎的,包括清蒸風沙冰鎮黃酒大閘蟹,新口味則有籠仔荷香蟹粉糯米蒸大閘蟹燕窩蟹粉蛋白蒸釀大閘蟹蓋。用太湖大閘蟹蟹公,質素有保證;雖然都係用細蟹,但每隻都有四至五兩重(未烹調前),無欺場啦。


冰鎮黃酒大閘蟹用稀釋冰凍黃酒浸 3 小時,蟹肉滲透酒香。


風沙大閘蟹的蟹肉、蟹膏及蟹殼均充滿避風塘的惹味,味道以蒜香為主,帶辣椒的香辣。

想原汁原味,一定係食清蒸。見到真蟹身,每隻都有白肚金爪黄毛,掰開蟹身,雖然未至於爆膏,但蟹膏分量不少,口感 creamy,都算甘香。新品燕窩蟹粉蛋白蒸釀大閘蟹蓋係必試,滑嘟嘟蒸蛋白上,鋪上大閘蟹粉、大閘蟹肉和燕窩蒸,匙羹一舀入口,又香又滑,蟹粉蟹肉鮮味好突出。籠仔荷香蟹粉糯米蒸大閘蟹,糯米飯入口充滿蟹膏甘香,又吸收荷葉清香,啖啖精華,啱晒唔想拆蟹嘅蟹民!


紫蘇葉清蒸大閘蟹最能吃出蟹的鮮味。


籠仔荷香蟹粉糯米蒸大閘蟹,大廚將糯米用酒糟爆香,再混入蟹粉、蟹肉、蟹油、花雕、薑米撈勻蒸 45 分鐘,再將蟹粉糯米飯釀入蟹蓋,以荷葉包好蒸 10 分鐘,工夫多多,每啖都係心機。


燕窩蟹粉蛋白蒸釀大閘蟹蓋,蛋白滑溜溜,伴大閘蟹粉、蟹肉和燕窩一齊放入口,伴鮮炸蝦片同吃,層次更突出。


大廚還在蟹醋中花心思,子薑酒糟蟹醋(右) 用當造子薑加入米醋中,再加檸檬、去皮子薑、酒糟、砂糖及少量紅椒浸 3 個月,味道清香。山楂荔枝蟹醋(中)將山楂、荔枝醋及冰糖同浸,微酸帶甜又開胃。而秘製大閘蟹醋(右)是師傅自行調配加入薑絲的鎮江浙醋。

除咗任食大閘蟹,套餐還包每位一客前菜和湯羮,唔使齋食蟹咁單調。每位四百多,計計數,只要每款大閘蟹吃一隻,都回到本。


話梅爽脆溫室白涼瓜選用台灣青、白涼瓜,冰涼爽口,滲出話梅清甜味,甘甘哋。鮮人蔘陳年花雕醉雞用本地雞以鮮人蔘、花雕酒及清雞湯慢火浸煮,雞肉不嚡,仲滲出酒香。


花菇鮑魚絲湯羹有鮑魚、瑤柱、花膠、花菇、竹笙、木耳,另配老雞、赤肉、金華火腿熬成的上湯,甘甘甜甜,秋天飲最滋潤。


棗皇薑茶連皮老薑加黃糖,原粒山西棗皇去核煲,暖胃袪寒。


每張餐枱都有齊拆蟹工具,配套方便完備。


「大閘蟹 膏瘋會」
供應時間:6:30pm-10pm

收費:
星期一至四
成人 $418/ 位 (19/9 - 30/9)、 $458/ 位(1/10 – 30/11)
小童 $298/ 位 (19/9 - 30/9)、 $328/ 位(1/10 – 30/11)

星期五至日、公眾假期及前夕
成人 $448/ 位 (19/9 - 30/9)、 $488/ 位(1/10 – 30/11)
小童 $318/ 位 (19/9 - 30/9)、 $348/ 位(1/10 – 30/11)

註:設加一

紫粵軒
地址: 將軍澳唐德街 3 號香港九龍東皇冠假日酒店 2 樓
電話: 3983 0660


文:Celia、攝:Kee Yau

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】 Midea美的25公升氣炸焗爐!↓

↓ 結合「氣炸」同「烘焙」︱0.2秒即熱︱7種烹調模式↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more