好浮誇!跑車狂迷 cafe

發佈: 2016.09.28
文:

「細個已經好鍾意玩具車,尤其是紅色跑車,揸的士是我的 dream job……

「點解鍾意跑車?型囉!尤其是雙鈎門的跑車,一揸出街,個個都唔眨眼望住你!」同樣是屏山鄧氏第 26 代後人,他是鄧達智的堂弟 Alan,這間跑車 Cafe 的老闆。

Alan 從事汽車買賣生意,一直想在屏山開餐廳,賣圍村沒有的食物。「有諗過賣腸粉海南雞飯,但唔夠特別。」某天望着床頭的跑車模型,靈光一閃,不如開跑車主題餐廳!坐言起行,立即籌備,將自家物業改成主題餐廳。

即使閣下不是跑車狂迷,一進店,必定能感受他鉅細無遺的心思── 一盞盞賽車紅綠燈、紅黑賽車座椅、黑白賽旗地板,還有用真呔鈴打造的玻璃枱,以及睡房收藏多年的法拉利模型車、拼圖等,連老闆、侍應都穿上賽車 Tee。

為配合主題,以烤焗的西式肉食為主,如燒牛肋骨、燒春雞、炸魚薯條等,也少不了沙律、薄餅、意粉、甜品等,共廿多款,由五星級酒店西廚 Sam 哥主理。特色不算得,勝在即叫即做,材料新鮮,只用簡單香草調味,也能做出熱辣辣的美味。

兩磅重的燒牛肋骨,是每枱都點的招牌菜,因為大份夾抵食!用上美國 Prime Grade 穀飼牛肋骨,收到柯打,才用百里香醃一醃,放進焗爐燒至 medium rare,肉香四射,蘸上用牛骨、紅酒熬成的燒汁,更加 juicy,難以相信只賣 $138!

炸魚薯條也有驚喜,魚柳脆漿加入啤酒,炸起來金黃酥脆,「咔嚓」切開,熱氣和肉汁湧出;粗身薯條食落啖啖牛油香。覺得肉多不均衡?大廚在不少菜式都配上充足的蔬菜,燒春雞底下便有大量烤蔬菜,番茄、翠玉瓜、茄子、薯仔等,切得大大件,很清甜。飲品 menu 可找到老闆的飛佛,3 款用跑車牌子命名的特飲,包括林寶堅尼、法拉利、麥拿倫,喝罷有如在高速公路開行 turbo 飆車,爽!


賽車手薄餅 $78
10 吋薄餅鋪滿意大利辣肉腸、火腿、車打芝士、水牛芝士及巴馬臣芝士,即叫即焗,熱辣辣食可拉絲。很喜歡配上特製的蜜糖芥末醬,甜甜哋好開胃。


露絲瑪莉燒春雞 $98
用上原隻重近 1kg 的法國有機春雞,以 Rosemary、黑椒等醃足一日,收到柯打才裝上直身架焗 15 分鐘。皮薄肉嫩,抵讚是底下有好多新鮮番茄、翠玉瓜等蔬菜。


燒牛肋骨 $138
抵食夾大件,美國 Prime Grade 穀飼牛肋骨份份重 2 磅,用多款香草輕醃後,便用焗爐 280 度燒足 10 分鐘,上前還仲切成一件件,好貼心!配上紅酒燒汁,啖啖 juicy。


小店座位舒服,也可看到 Alan 泊在玻璃窗外的「戰車」。


小店鋪天蓋地盡是跑車相關的裝潢,紅綠燈、賽車座椅、呔鈴玻璃、黑白格仔地板、電話、燈掣、跑車模型等,連電視機都播着《Top Gear》。


F1 Cafe

地址:元朗屏山坑尾村 105 號
電話:2662 2162
營業時間:星期一、二、四 11am-5pm;星期五至日 11am-3:30pm,5pm-9:30pm(星期三休息)
收費:只收現金,不設加一
交通:輕鐵坑尾村站
泊車︰村內停車場
平均消費:$250

(原文摘自 U Magazine ISSUE 565)

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more