$108 任鋸牛扒豬扒 可以食到幾多件?

發佈: 2016.09.28
文:


呢間位於灣仔的「知味屋」,上次首推 $98 任食牛扒,已經引來好多牛魔王排隊試。今次餐廳再加碼,畀多 $10、用 $108 就可食到新西蘭穀飼西冷牛扒 + 英國貴族豬扒!嘩!無肉不歡的朋友聽到即時流口水。入座後店員會解釋放題有乜係任食,同之前一樣,75 分鐘內唔單止可以任食扒,田園沙律、湯、蒜蓉包、蔬菜、炸薯條全部都係任嗌任食!


解釋完之後等咗 2 分鐘多啲,就有齊田園沙律、湯及蒜蓉包上枱,好快手!


沙律 合格!
拌以芝麻醬的田園沙律,有火箭菜、生菜、青瓜片及車厘茄等,蔬菜夠新鮮,合格!


羅宋湯 不過不失!
是日廚師精選餐湯是羅宋湯,味道似足罐頭湯,不過湯入面有大量椰菜、紅蘿蔔及西芹,都算足料有誠意。

蒜蓉包 伏!
蒜蓉包睇落好香脆,但一咬先發現原來係……腍嘅!蒜味亦唔太明顯,食完呢兩片可以唔使再 order 了!


上桌速度 滿意!
唔使 5 分鐘,主角出場喇!由於每塊扒都是即叫即煎,呢個上菜速度已經好快,滿意。


醬汁太少!
任食嘅唯一條件,係要清晒碟先可以點第二塊扒,以免浪費食物。由於今次是牛扒、豬扒任食,第一 round 會先上牛、豬扒各一塊,仲有約 15 條薯條及少許雜菜伴碟,醬汁方面只得燒汁一款選擇。有圖有真相,醬汁確係少得有啲可憐。

薯條 伏!
伴碟有肥嘟嘟嘅粗身薯條,滿心歡喜咬一啖,哎呀……乜係凍嘅?!似係炸好一大堆放咗好耐咁,咬落仲油淋淋,扣晒分。唔緊要,牛扒先係主角!抵唔抵食呢?用軟呎度一度塊扒先!牛扒長約 17 cm,雖然唔算太厚身,都算大塊。食落暖暖哋,如果無特別要求,一律 7 成熟上枱。

牛扒 伏!
扒嘅表面有輕微的焦位,切開睇真啲,帶有少許粉紅色,將近 well done。食落牛肉味唔濃,可能是太熟的關係,肉汁欠奉,肉質仲有啲乾。雖然見到牛扒表面有啲黑椒,但食唔到有黑椒味。如果合埋眼盲試,只會知道自己咬緊一嚿肉。




豬扒 有肉汁!
豬扒又如何呢?塊扒都有差不多 12cm 長,第一 round 的豬扒厚過牛扒啲。豬扒表面亦有微微的焦香。豬扒中心呈粉紅色,好似好嬌嫩咁。好容易就切得開,嗒真啲有豬肉的甜味,有肉汁唔太乾,唔錯!




小記戰鬥力薄弱,食完兩塊扒已經有 7 成飽。正想坐一陣休戰時,店員提醒任食時間仲有 15 分鐘,嚇得我即刻追加一牛一豬。同樣唔使 5 分鐘牛扒就送到!牛扒表面唔算太多煎燶位,醬汁同樣只得少少。




生熟度 有分別!
第二塊牛扒長約 16cm,跟第一塊扒差不多大、厚度無太大分別。今次要求 5 成熟,牛扒中心明顯生啲、粉紅啲,仲滲出血水。味道依舊不變,牛味唔突出,肉質唔夠腍。


第二塊豬扒等咗 5 分鐘多啲就有喇,上菜速度無變慢,抵讚!




今次塊豬扒窄身啲,長約 14cm,仲厚身好多㖭!切時明顯較困難,推到隻碟都郁埋亦然未切開豬扒。中間唔見粉紅色,切都有難度了,咬就更困難。雖然未至於嚡口,但豬扒無肉汁,感覺乾柴柴,連少少的肉味都消失得無影無蹤,可見質素唔穩定。


豬扒一滴汁都無,不過你可以問店員拎燒汁,咁就唔使乾啃啦!


後追加的牛、豬扒無雜菜及薯條伴碟,想食就要自己嗌!用蒜蓉炒過的蔬菜堆滿成個碟,有翠肉瓜、青豆、西蘭花、黃椒、紅蘿蔔,分量十足。


(右)菠蘿梳打、(左)蜜桃水果茶 (另加$15)
放題唔包飲品,加 $8 可以有最基本的咖啡、奶茶、檸茶檸水等。加 $15 則可以點特色飲品,菠蘿梳打有菠蘿粒粒,酸酸哋有啲消滯,蜜桃水果茶就太過甜。畀多 $15 仲可以食埋 70g Haagen-Dazs 雪糕。


總結:
今次實試,2 個人於 75 分鐘總共食咗 3 塊牛扒、3 塊豬扒,由於要趕下一場入座,餐廳好準時截單及提醒你離座,想食得多,就要食得夠快。食早場比較易訂位,放蛇當日是星期三,5:45pm 好多人都未放工,所以餐廳只得 4 成滿。如果你對扒類要求唔高,只求有無限量任食嘅放肆感,呢個放題絕對滿足到你。食唔食得過?自己衡量吓啦!


知味屋
地址:灣仔道 207 號地舖(利景酒店旁)
電話:2840 0923
WhatsApp訂座號碼:5543 9914
營業時間:11:30am-10pm
任食供應時間:5:45pm、7:15pm、8:45pm 入座
用餐時間:75分鐘
收費:每位 $108,只收現金,不設加一。
註:只限堂食,不可分食,優惠需提前預訂。

文、攝:Jessie

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more