今晚去快餐店打邊爐!邊間好?

發佈: 2016.09.28
文:

今次推介的快餐店火鍋,全部都係登場不久的新鍋物,每款都各有特色。如果鍾意食海鮮的,有吉野家的「珍寶蟹棒藍青口鍋」或大家樂的「藍海星斑海捕鍋」,如果是牛魔王,又可以試吓大快活的「即刨肥牛火鍋」

牛魔王必食:即叫即刨肥牛大快活


美國穀飼肥牛 $66(4 安士)、$78(8 安士)、美國穀飼豚肉 $62(4安士)、$70(8安士)、雙拼牛豚肉 $78(各 4 安士)

相比其他將牛肉 pack 好晒的快餐店,大快活做法好唔同;「即叫即刨肥牛火鍋」真係喺點餐後,即時在廚房刨牛肉,雖然由點餐到上枱,需要 10-15 分鐘時間,但見到牛肉及豚肉呈卷曲狀,感覺好似好新鮮咁,又唔會有出晒水嘅情況,保留到肉汁。

先講肥牛,用美國穀飼牛,夠薄身,汆熟後入口即融兼有牛味,豚肉無豬臊味又不太肥,兩款肉類都算高質。其他配料款式都幾豐富,有唐生菜、娃娃菜、油麥菜、金菇、泰式肉丸、枝豆魚餅、胡椒扎肉、煎豆腐及讚岐烏冬,蔬菜夠多,我 like!泰式肉丸及胡椒扎肉好想 encore。湯底方面,有番茄薯仔湯海帶大概豬骨湯選擇,試過豬骨湯,味道清甜,無乜味精。


配料的配搭多,胡椒扎肉及泰式肉丸是必食推介。


豬牛肉都是即叫即刨,雖然等候需時,但呈卷曲狀上枱,感覺新鮮。


味道與一般的豬骨湯有些許分別,味道感覺似媽媽煲的靚湯,蘿蔔非常入味。

大快活
電話:2856 7217
網址:http://www.fairwood.com.hk/

相機食先!超長珍寶蟹棒藍青口鍋吉野家

珍寶蟹棒藍青口鍋 $67.9

不論甚麼天氣,吉野家的鍋物都有捧場客,舖頭仲經常有新鍋登場。剛推出的「珍寶蟹棒藍青口味噌湯鍋」,主角蟹棒唔係一般蟹柳, size 有手掌咁長,實物與圖相符!雖然是仿蟹棒,但質感不太粉,話有蟹鮮味就太誇張,甜甜哋啦。蟹棒以外,另一亮點係藍青口,唔嚡口兼食到少少鮮味。配菜仲有冬菇、金菇菜、粟米、津白及韓式粉絲,在味噌湯內熬一熬,湯頭有蔬菜的鮮甜,又有味噌的濃惹。當然唔少得吉野家的肥牛,都係一貫水準。


蟹捧有手掌咁長,霸氣十足。


藍青口感覺幾新鮮,有嚼口。


鍋物配料有粟米、冬菇、金菇菜、粟米及津白,在味噌湯內灼,湯頭都有蔬菜的鮮甜。

吉野家
電話:2959 2322
網址:http://www.yoshinoya.com.hk/

海鮮迷最啱!真‧斑片火鍋 大家樂

藍海星斑海捕鍋 $70

大家樂推出不久的「藍海星斑海捕鍋」,以斑片做噱頭。柯打嚟試,被佢嘅超大堆頭嚇一嚇!海鮮除咗藍海星斑外,仲有原條吊筒及大蝦星斑雖然只得兩塊,有點唔夠喉,但肉質睇落有彈性,汆熟後鮮嫩有魚味;吊筒大蝦,都算新鮮。除咗海鮮,仲有美國穀飼肥牛,分量十足,數一數至少有 8 塊,略嫌有啲肥,但不失牛味。食完兩款主菜已經夠飽,火鍋仲有其他配菜,如六色菜盤(唐生菜、木耳、粟米、車厘茄、菇、豆卜及烏冬)及特盛五寶盒(炸魚皮、野菜福袋、芝士魚腐、香菇豬肉餃及豬肉丸),以 $70 來說,性價比極高,大胃王啱晒!


斑片肉質鮮嫩,放湯一汆即食,可惜只得兩塊,唔夠喉。


六色菜盤,有唐生菜、木耳、粟米、車厘茄、菇、豆卜及烏冬,豐富!


特盛五寶盒,有炸魚皮、野菜福袋、芝士魚腐、香菇豬肉餃及豬肉丸,最驚喜是炸魚皮夠脆。

大家樂
電話:2451 2431
網址:www.cafedecoralfastfood.com

文、攝:Theo

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓

more