太子上樓 掃罕見韓國零食雜貨

發佈: 2016.09.29
文:

家家士多的貨架上大部分都是韓國 iCOOP 食物,部分是本地組織天姿作圍及公平點寄賣的食物或護膚產品。

呢間叫「壹樓共同社」嘅舖頭,聽落同韓國似一啲關係都無,但內裏賣的卻大部分是韓國貨!不似一般韓國超市或雜貨店,選址好特別,喺旺角維景酒店對面一間叫「儷凱酒店」的一樓,空間唔算太大,但樓底很高,新裝修地方好光猛光鮮。整個共同社其實唔止賣食物,內裏劃分為 4 個空間:家家士多、SHY Dance Cafe、長頸鹿繪本館及家家學堂,唔係由韓國人開,係由一班擁共同理念的香港朋友組成,讓大家分享美食、繪本、飲吓咖啡。

先講講吃貨好關心嘅韓國雜貨,有番薯片、果凍、果汁糖、朱古力、爆谷、豬肉條等零食,又有午餐肉、吞拿魚、拉麵等雜貨,甚或護膚品面膜都有!唔係一般零食店花碌碌的韓國零食,大多以健康、天然、無添加作掛帥,統統由喺韓國極有規模的合作社 iCOOP 進口。
 

貨架旁邊寫有 12 種由士多自己劃分的食物種類,例如 OR 是「有機」、FT 是「公平貿易」、VG 是「素食」等等,令客人容易分辨食物種類,十分細心。

iCOOP 的成立,源於 08/09 年金融風暴後,當地經濟差,特別是農民,一班有心人就成立自己食物自己生產的組織,串連農民及其他生產者,聯合發展自己的食品,由當初得 6 個機構,發展到今日社員達廿多萬人,甚至有自己的食物安全中心監管。食物的原材料好健康,謝絕添加劑、激素、抗生素、塑化劑、防腐劑、味精。
 


(左)紫薯正狂熱,這款「紫薯脆片」$15 用韓國紫心番薯烘製,不用油炸,拎上手乾身,感覺好健康。
(右)蘋果甘筍果凍、提子果凍、橘子果凍(各 $11),均用環境友善蔬果汁及有機糖製造,無香汁及防腐劑。


(左)士多啤梨及提子味果汁糖 $6,用天然果汁及有機糖製造,無人工香料、防腐劑。
(右)無基改鹽味爆谷 $16,用無基改韓國粟米製造,又用日曬鹽調味,甘甘鹹鹹卜卜脆。


(左)無激素豬肉條 $32(前)及無激素辣味豬肉條 $38,用無激素豬肉製造,食得放心之餘,肉味也香。
(右)橄欖油吞拿 $26 (前)及輕辣吞拿魚 $24,用高等級黃鰭吞拿魚,無幅射及毒素,用來夾三文治或拌麵吃最啱。


(左)酥脆鯷魚乾小食 $25,用優質韓國鯷魚製造,食落無腥味。
(右)有機朱古力脆米條 $12,成分有有機米、黑米、糖、牛奶、可可,鬆脆香口。


(左)粟米脆片 $25,不經油炸,並用日曬鹽調味,由韓國無基改粟米製造,香脆乾身不油膩,甘鹹中又嗒到粟米的甜。
(右)味增醬 $48(上)及辣醬 $56


農場午餐肉 $38
使用無激素豬製成,無人工香料、色素等添加劑,熱量及納含量為其他午餐肉的 70% - 90%,感覺較天然健康。


士多引入 8 款韓國拉麵,有外間少有的有機湯拉麵(輕辣)$18、清香素菜湯拉麵 $13、黑豆炸醬撈麵 $14、甜辣素菜撈麵 $13 等,喜愛素食及韓式撈麵者必試!

共同社除了有士多,仲有 SHY Dance Cafe,老闆之一係前兒童節目主持人伍文生 Isaac,本身已有幾間 cafe,今次聯同合作社朋友,又找來 10 位年輕人一齊營運這間 cafe,支持良心消費。店中供應一般 café 的輕食,食材亦選用 iCOOP 有機拉麵,配上無激素午餐肉、公平貿易即磨咖啡等,既幫助年輕人賺取創業經驗,又可讓大家食到健康有機食物,成件事、成間 cafe,變得有意義。


iCOOP 爆紅辛辣湯麵 $45 用 iCOOP 韓國湯麵及農場午餐肉製作,午餐肉肥膏不多,吃到真.豬肉味道。


iCOOP 窩夫 $42 用有機麵粉、低聚果糖漿、朱古力漿、洋槐蜜糖等製成,中間夾着番茄蓉,鹹中帶甜好得意。


SHY Dance Cafe 採開放式廚房,地方不大,一般 café 輕食都有供應。其中一位老闆是開食店的前藝員伍文生,他指共同社理念吸引,一拍即合。


Cafe 可容納 24 至36人,空間算舒適。


壹樓共同社(家家士多、SHY Dance Café)
地址:太子砵蘭街 372 號儷凱酒店 1 樓
電話:3580 0388
營業時間:11am-8pm

文:Celia、攝:Kee Yau

歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【免費送🎁】Patisserie Tony Wong全新花形系列蛋糕!↓

↓立即拎走3款口味:芒果椰子+朱古力紅桑莓+柚子芝麻!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more