1. 層層疊紫米杯
講緊嘅唔係紫米露，而係「粟米屋」嘅自創紫薯粟米杯！店主仲好有心機，一層厚粟米之後，再加紫薯蓉，之後又一層厚粟米，最後舀一大球紫薯蓉好似雪糕咁放在粟米面，個樣好吸引！番薯味濃又幼滑，甜度適中，食落啖啖紫薯的粉糯甜香，紫薯同粟米粒原來好 match！
紫薯粟米杯 $25
粟米屋
地址：大圍大圍村第八街 4 號地舖（積德里及積富街交界）
電話：2543 9999
營業時間：9am-8pm
2. 激大塊香煎肉餅！
雖然係茶記出品，但製作超認真，以手剁豬肉加馬蹄、半乾吊片和果皮等混合而成肉餅，煎出來口感十足，多了份香口感，而且分量仲比一般肉餅厚大。店子接到柯打先將肉餅生煎至熟，甘香彈口，絕對可以送晒成碗飯，難怪少年食神 Michael 食過都讚不絕口。
另外仲有香辣菜脯，外賣拎番屋企，佐麵一流。
金城茶餐廳
地址：大圍積福街 100 號地下
電話：2602 6351 /2694 1323
營業時間：6:30am-7pm
3. 大熱！手撕雞腸粉！
近期大圍必食名物 N.o. 1！一收到柯打，小食店姐姐即刻拎起雞肉撕撕撕，再加入麻油等調味後撈勻，再喺腸粉櫃中拎出熱騰騰腸粉，加入豉油、芝麻及自家磨製嘅芝麻醬，就可以開餐！手撕雞肉質亦算嫩滑，雞皮更有少許爽脆感，意外地食唔到雪味，有幾分似台灣夜市嘅鹽水雞。豬腸粉都做得薄身同滑溜。店子可按客人需要加辣，一盒承惠 $28！
手撕雞腸粉配芝麻醬 $28
華輝小食
地址：沙田大圍道富嘉花園地下 28 號舖
電話：從缺
營業時間：10am-12:30am
4. 麻甩最愛！豆腐火腩飯
大圍漢年茶餐廳嘅豆腐火腩飯，質素好高，啱晒一班大男人！火腩肉連皮分 4 層，有層次得來肥瘦比例啱啱好，有肉香又有油脂甘香，質感仲好彈牙！豆腐經油炸過，但內裏依然非常滑溜，連埋少少鹹的芡汁食仲正，大大碟男人都夠飽！
豆腐火腩飯 $48
漢年茶餐廳
地址︰大圍積福街 100 號
電話︰2605 9355
營業時間：7am-7pm
5. 京都 feel Cafe！咖啡 x 紫薯包
環境幽靜嘅咖啡小店，帶點京都風格！店內供應意式咖啡，包括 4 款精品咖啡、2 款日本風抹茶 espresso 及抹茶 latte。供應咖啡之餘，每日仲有 3-5 款麵包，包括紫薯包、番薯包、宇治抹茶黑糖包、栗子牛奶包、雙花茶甜圈等，全人手製作，日味好濃。
Latte Macchiato $35
先倒牛奶，後倒 espresso，奶味好 rich，咖啡味帶少許焦糖及果仁味。
100% 紫薯包 $33
最受客人歡迎，麵包鬆軟具奶香，日本紫薯餡不添加糖，天然鮮甜。
Dear Coffee & Bakery
地址：大圍積運街 2-8 號海福花園地下 22 號舖
電話：9230 8450
營業時間：星期一 12nn-6pm，星期二及三 12nn-8pm，星期四至日 12nn-10pm
6. 識食梗係食海南雞手卷！
仲食海膽手卷？要食梗係食手卷界新人王 — 海南雞手卷。以紫菜包住真．雞油飯，飯粒企身，富雞油甘香卻不油膩，飯仲係熱暖；雞肉去晒骨，嫩滑之餘食到香料味，淋上惹味醬汁、黑豉油、薑蓉和青瓜，係正宗海南雞飯味道！
海南雞手卷 $13
手卷內有 6 塊薄切雞肉，去晒骨啖啖肉，肉質嫩滑，爽呀！油飯粒粒甘香，加上醬料，好惹味！
肥仔海南雞
地址：大圍村南道 41 號
電話：從缺
營業時間：11:30am-11pm
註：海南雞手卷 12nn-2pm 及 6pm-8pm 暫停供應。
7. 屋村韓國懷舊菜
由 3 位分別來自韓國、台灣及上海嘅大媽開設，主打韓國懷舊菜式，包括江南風水煮魚、泡菜鮑魚蠔肉粥、真露雞翼等，也有新興嘅漢拿山芝士蛋熔岩炒飯、火焰芝士拉骨蛋邊鍋，大部分食材均由韓國空運來港，包括延平島活蟹、午餐肉腸、米、麵條、醬料等。飲品亦甚有睇頭，包括原個韓國菠蘿冰及芬達插草莓沙冰等。
亞之媽街頭炒豬雜錦 $168
傳統韓國街邊市場找到的路邊炒豬雜，豬大腸、豬粉腸及豬腩肉先用韓式醬料炆 2 小時，再加入韓國魚片、粉絲、韓國大蔥、青尖椒等邊滾邊兜煮，非常惹味，吃到最後可加 $38 點叫一份雞蛋、芝士、紫菜，由 Oppa 即場炮製炒飯。
懷舊便當盒 $58
以韓國麻油拌飯，加上泡菜炒豚肉、煎蛋、午餐肉腸，將所以配料拌勻來吃，香辣惹味，是最地道的風味。
韓國菠蘿冰 $58
用原個地捫菠蘿打成沙冰，啖啖菠蘿的香甜，冰涼透心，非常消暑。
Sister Korea Cafe
地址︰沙田大圍新翠村新翠商場地下 17、18 及 18A 舖
電話︰2596 0018
營業時間︰11:30am-11pm
8. 24 小時掃街
面向大圍港鐵站嘅「大圍」小食，24 小時燈火通明，賣的是地道港式小食，如煎釀三寶、豬油渣麵、車仔麵、燒賣魚蛋、生菜魚肉碗仔翅、串燒、雞蛋仔、炸雞髀及炸大腸等。人氣炸雞髀大大份，炸漿夠薄，炸好後唔使加椒鹽香料，已經夠入味，皮炸得又薄又脆，雞肉入口依然 juicy。
炸雞髀 $18
大圍小食
地址：大圍富嘉花園 22 號地舖
電話︰從缺
營業時間：24 小時
9. 酒店大廚心思甜品
曾於半島、香港酒店等做廚嘅傅師傅，擅長製作心太軟、炸雪糕、窩夫、梳乎厘等精緻巧手嘅西式甜品，用料高級，質素亦屬酒店級水準。必試甜品有炸雪糕、酥皮焗香蕉等，價錢仲只係四五十蚊，平酒店近半！
炸雪糕 $45
外層口感如沙翁，裏面就有朱古力、呍呢嗱及士多啤梨 3 種雪糕口味。
酥皮焗香蕉 $43
即叫即製，外層如春卷皮，中間夾香蕉、提子乾及花生醬，味道帶鹹嘅花生醬正好中和甜膩嘅熱香蕉及提子乾。
傅師傅甜品小食
地址：大圍大圍村第六街 1 號地下
電話：2687 0668
營業時間：12nn- 1am
10. 難忘懷舊粉粿
區內老店之一，最初主打越南檬粉，慢慢加入不少中式糖水、豬皮魚蛋蘿蔔、酸齋粉粿等甜品小食。粉粿用粘米粉製成煙韌外皮，再加入沙葛、豬肉、韭菜、白蘿蔔等餡料，最特別係會淋上葱油，夾着葱油一起吃，份外惹味。叫件粉粿，加碗糖水，正！
腐竹雞蛋糖水 $12
腐竹不會煮融，一片片上增加口感，雞蛋煮至半熟，咬開仍見橙紅蛋汁，甚有驚喜。
粉粿 $9 / 2 件
林園甜品粉麵小食
地址：大圍積福街 60 號祥興樓地下
電話：2608 1330 / 2699 4638
營業時間：11am-12mn
文：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
