多年前在日本幫襯過自己動手炸的炸串專門店，至今仍難忘，在香港終於有得玩！位於大埔的稻八日式火鍋炸物放題，專程從日本京都廠商買來一部炸爐給人客自己做炸串，大家可能會擔心被油彈到唔安全，但老闆話這部炸爐的設計會令油呈 S 形流動，所以炸食物時，水份會向下走，不會油花四濺，非常安全，細路仔在大人陪同下，都可以自己炸來玩吓。
炸爐旁邊的凍櫃放了十多款預備好的炸串，有蝦、茄子、秋葵、菇類、腸仔、芋頭魚餅等，蝦最受歡迎，一陣就被人攞晒，店
員亦會好快 refill，最特別是芋頭魚餅，內有粒粒芋頭，食落彈牙有芋香，而蝦的肉質亦夠爽。揀了想食的炸串後，就可自己蘸漿上
麵包糠放落爐炸，聽見吱吱咋咋油炸聲，好過癮，好食又好玩。
任炸任食炸串是火鍋放題的一部分，放題有 5 個價錢選擇，全部都有得玩炸串，最平 $158，可任食豚肉和雞肉，如想任食埋牛肉、海鮮，可揀價錢 $298 那款，可食到澳洲 M6 和牛、安格斯小牛小排、海鮮盛合等。所有任食價錢已包括湯底，有 8 款選擇，大路的有沙嗲湯、番茄湯，另外亦有味噌芝麻豆乳湯、九州豬骨湯、北海道 3.7 牛乳牛骨湯、鰹魚昆布漬湯、壽喜燒甜醬油湯，以及地獄火岩湯，如想一鍋兩湯，每鍋加 $18。其他火鍋配料、沙律、小食、飲品、甜品、雪糕等都放在自助區，另外加 $20 就有得任飲 Asahi 生酒，成班朋友打住邊爐炸吓嘢食，全程 120 分鐘，開心到不得了。
在炸爐旁有齊所需用料，牆上貼有做法，還有一個計時器，校至 2 分鐘，鐘響就可取出炸串，零難度。
Step 1：淋上炸漿，均勻地蘸上麵包糠。
Step 2：放入炸爐，炸大約 2 分鐘，搞掂！
炸串有十多款選擇。
即炸自食的 DIY 炸串，新鮮熱辣脆卜卜。
自助區放滿火鍋配料、小食、沙律、甜品，還有即食麵、烏冬、日本拉麵、咖喱飯等。
任食雪糕是 Dreyer's D Collection，都幾落本。
老闆教路，如果揀鰹魚昆布漬湯底，火鍋尾聲在自助吧舀碗白飯放入湯內煮成雜炊，啖啖精華。
嚴選澳洲 M6 和牛放題 $298/位
任食牛、雞、豬、羊肉、海鮮，牛是澳洲 M6 和牛、安格斯牛小排，牛魔王好快回本。如想一鍋兩湯，另加 $18 一鍋。
稻八日式火鍋炸物放題
地址：太和舊墟直街 4-20 號美新大廈地下 A2 號舖
電話：3565 5031 / 6892 0619
營業時間：星期一至日 5:30pm-2am‧放題收費：每位 $158 至 $368，視乎所選火鍋料而定
備註：放題 120 分鐘任食
(原文摘自 U Magzine ISSUE 566)
歡迎你 like 我哋 U Food Facebook Page / U Food Instagram ，取得我哋更新更快嘅資訊！
