任點任食火鍋周街都係，質素係點？咪肥牛得肥膏、牛丸硬到掟死狗、餃類結住冰上枱囉。我哋呢啲大食火鍋鐵粉都蔑，行過尖咀厚福街，耳朵靈敏的我，居然聽到街上響起烚下烚下的福音，有一間又 fancy 又扮嘢又高質素的任吃火鍋店登陸。
真係任點任食火鍋店？咁型仔咁，似仲地牢 band house 喎，好啱後生仔嚟打邊爐。
利申先，套餐係以點菜形式推出，重點台式手工火鍋料、海鮮及甜品位上，其餘的前菜、超過 50 款火鍋料、無酒精飲品都是 2.5 小時內無限追加嘅，10 月 21 日開始有得食喇。我知大家唔鍾意睇字，睇圖啦！寫明咗邊啲任吃。舖頭又真係同稻記嗰啲火鍋店唔同，型仔到似 band 房，原來它是𡃁界最愛的 101 肉燥飯專門店的新 line，肉燥飯店那邊一人火鍋超受歡迎，於是衍生這店。
舖頭幾帶點工業味，座位安排鬆動，唔似其他任點任吃火鍋咁迫夾。
舖內有好多卡位，夠私隱。
老闆陳生請咗前大紅袍師傅來店工作，仲 sent 咗佢去台灣學做台式火鍋。重點要吃，梗係台味特濃嘅鍋底，有三杯雞、沙茶雞、紅燒牛肉 3 款，由師傅每日爆炒同燘出來，鍋底上枱唔好笨笨即刻加湯，要好似食一品鍋或雞煲咁，食晒啲雞件同配料先叫店小二加湯打邊爐。套餐包埋湯底啦。
三重芝士無骨雞涮涮鍋 套餐免費、單點 $138 / $198
三種芝士加上雞髀肉、番茄、洋葱及娃娃菜等，上枱先吃雞件，芝士半融令湯底有少少稠身，蘸雞吃，鹹香奶香結集。
無骨香辣三杯雞涮涮鍋 套餐免費、單點 $138 / $198
雞髀肉以九層塔及酒等爆香，鍋裏仲有鱆魚餅、番茄、雜菇、薯仔、花枝丸、豆卜及蔬菜等，餸料滿滿，可以當一品鍋般先吃餸料，最後才加湯打邊爐。
台灣紅燒牛肉涮涮鍋 套餐免費、單點 $138 / $198
紅燒牛肉由大廚每天燘製，食味質感像台式牛肉麵的牛肉，筋更燘到似啫喱，入晒味好軟腍。連湯汁上枱，鍋裏仲有蘿蔔、甘筍、豆卜、番茄、雜菇及蔬菜。
台灣沙茶無骨雞涮涮鍋 套餐免費、單點 $138 / $198
特別從台灣運來 1 款超香的沙嗲醬炮製，加上 2 款由香港的沙嗲醬做，沙茶味中有淡淡甜味，唔會太重口味，鍋裏有金菇、豆卜、番茄及蔬菜。
金蟬脫殼 套餐免費、單點 $138 / $198
冬瓜裏有雞髀肉，加湯底燉後上枱，這款鮮甜口味較清，唔怕熱氣上火。
火鍋料人無佢有，必吃梗係台灣手工火鍋料，賣相已贏咗啦，好似似足黑色鳥結糖嘅墨魚滑、成枝雪條咁嘅蝦滑棒、用 100% 安格斯牛肉打成的牛丸、用世上最高級的西班牙伊比利亞黑豚做的梅菜豬肉丸、勁大隻的太極墨魚膠冬菇……咦咦！有少少台北名店寬巷子 style 喎！上述嘅台式手工料套餐每人一粒，但一個拼盤已有 10 款，試過啱食可以再單點。逐位上嘅，仲有海鮮拼盤，巨人版蟶子、貴妃蚌、美國桶蠔 3 揀 1，真係超大隻。
海鮮拼盤（位上）
游水海蝦、花甲王、刀貝蜆、白鱔片、脆鯇魚片。珍寶特大蟶子、珍寶特大貴妃蚌或特大美國桶蠔 3 選 1。
豬牛肉選一款，可揀手切安格斯 Prime Grade 牛頸脊肥牛片（位上） 、西班牙伊比利亞玫瑰豬頸肉或西班牙伊比利亞黑毛豬肉片。
西班牙伊比利亞玫瑰豬頸肉（位上）
西班牙伊比利亞黑毛豬肉片（位上）
無酒精飲品（任飲）
木糠珍珠奶茶布丁
手工麻辣醬手撕雞（任點前菜）
101 特選手工火鍋拼盤（位上）
包括墨汁鳥結糖、太極冬菇、蝦兵蟹將雪條、手工香爆鮮菇福袋、黑松露蟹子海鮮軍艦、三重芝士安格斯霜降牛丸、三重芝士鮮製蝦丸、三重芝士鮮製墨丸、黑松露蟹肉餃、黑松露芝士豚肉餃共 10 款。
Show 埋單點分量嘅相，等你睇清楚啲！
墨魚汁鳥結糖 單點 $78 份
台灣火鍋名店寬巷子都有這類菜式，鳥結糖其實以墨汁、黑魚滑打成，裏面混了雞軟骨、冬菇粒及墨魚粒，用模子定型，它比一般墨魚滑彈牙爽實，咬下去仲有脆脆的雞軟骨，口感幾過癮。
蝦兵蟹將雪條 單點 $78 份
台灣手工火鍋都有這款，其實它是蝦滑棒，蝦肉用得多，所以色澤粉紅，裏面仲混了矜貴的黑松露，菌香濃濃又鮮甜。
太極冬菇 $88 份
冬菇上釀了墨魚滑，一邊混了墨汁，形成太極圖案，上面仲有不少蟹籽，墨魚滑分量十足，灼熟後夾埋多汁的鮮菇吃，多汁鮮甜。
手工香爆鮮菇福袋 單點 $58 份
腐皮裏包着爆香了的冬菇、秀珍菇、金菇等，用韭王綁着開口，做成錢包狀，可以熟食，也可用來打邊爐。
三重芝士安格斯霜降牛丸 $78 份
這裏的丸類好有心及矜貴，不像坊間般混了牛冧肉，100% 以 prime 級的安格斯牛肉打成，裏面仲釀了芝士，牛味重又 juicy。
高潮部分梗係無限追加嘅部分，記者堅誠意真心極力推介大家要狂點 8 吋鱈場蟹腳，食幾條真回大本，佢哋仲幾慷慨，餐牌上啲無酒精特飲都係任意追加，平時火鍋必點嘅金妹芝士腸、花枝丸、竹輪卷、魚皮餃、水餃、韭菜餃、雲吞、午餐肉、連埋蔬菜 50 多款火鍋料都係任點，容乜易食窮老闆。嘩！記者仲發現再抵啲嘅食法，7:30pm 前結賬或 9:30pm 後入座，每位平 $30，再慳豬啲。
足 8 吋鱈場蟹棒 單點 $48
叫套餐，可以任意追加這款，激抵，重點要狂叫。
| 有乜食，同你數一數！ 極上吃到飽套餐 $278 位 （2 位起，2 - 6 人可選鍋底 1 款，7 人或以上可選鍋底 2 款） ※ 手工麻辣醬手撕雞（任點前菜） ※ 101 特選手工火鍋拼盤（位上） 包括墨汁鳥結糖、太極冬菇、蝦兵蟹將雪條、手工香爆鮮菇福袋、黑松露蟹子海鮮軍艦、三重芝士安格斯霜降牛丸、三重芝士鮮製蝦丸、三重芝士鮮製墨丸、黑松露蟹肉餃、黑松露芝士豚肉餃共 10 款 ※ 海鮮拼盤（位上） 游水海蝦、花甲王、刀貝蜆、白鱔片、脆鯇魚片。珍寶特大蟶子、珍寶特大貴妃蚌或特大美國桶蠔 3 選 1。 ※ 手切安格斯 Prime Grade 牛頸脊肥牛片（位上） 或； ※ 西班牙伊比利亞玫瑰豬頸肉（位上） 或； ※ 西班牙伊比利亞黑毛豬肉片（位上） ※ 無酒精飲品（任點任飲） ※ 木糠珍珠奶茶布丁 ※ 超過 50 款蔬菜及火鍋料任點 |
101 手工涮涮鍋
地址：尖沙咀厚福街 9 號地下
電話：5399 5188
營業時間：5pm - 1:30am（試業期間）
備註：
1.「極上吃到飽套餐」10 月 21 日開始供應
2. 套餐原價 $278 位，7:30pm 前結賬或 9:30pm 後入座，特價收費每位 $248
3. 用膳時間限時 2.5 小時，設加一
文：Sieg、攝：May
歡迎你 like 我哋 U Food Facebook Page / U Food Instagram ，取得我哋更新更快嘅資訊！
