有伏有讚！松坂庫手卷邊款得？

松坂庫的壽司魚生手卷推出一陣子，甚受大家歡迎，尤其係海膽手卷，海膽水準比一般舖頭穩定兼新鮮，每次經過都忍唔住食番個。最近經過，眼球被兩款手卷吸引住——日本拖羅配黑魚籽同埋松坂 mix 手卷，仲有我最愛的蟹味手卷。作為吃貨，即試！

先講日本拖羅配黑魚籽，見到實物，似乎與相片不相符喎！拖羅分量都算多，有一大片再加拖羅粒，但魚肉呈瘀色，感覺唔太新鮮，唔似圖中粉紅色魚肉中透出密密油花。問過店員，佢咁講：「唔好意思！這批魚都是這樣的顏色，如果覺得有問題，可以退換。」我試咗，拖羅質感同平日吃到的差不多，有油香但同時帶點腥，幸好有黑魚籽甘鹹點綴一下。

至於松坂 mix 手卷，有油甘魚、三文魚及吞拿魚，色水鮮艷得多！啖啖肉夠新鮮，同時呢 3 種魚 mix 埋一齊，味道好夾。個人誠意推介鮮蟹膏．蟹肉．蟹籽手卷，即是蟹的親子手卷，蟹膏味道香濃又夠多，配埋蟹柳及蟹籽，味道好豐富，食完之後蟹膏香味仍然在口腔遊走好一陣子，讚！

日本拖羅配黑魚籽 $45

色澤睇落唔多開胃，但食落又唔係唔新鮮，有魚味亦有點腥。

松坂 mix 手卷 $28

集合油甘魚、三文魚及吞拿魚，賣相夠晒豐富，而且魚生亦夠新鮮，三款魚mix埋一齊，味道又幾夾。

鮮蟹膏．蟹肉．蟹籽手卷 $40

蟹膏味道非常香濃，散發陣陣蟹香，加上蟹柳及蟹籽，呢個蟹版的親子手卷，絕對必食。

相比其他地方的手卷，松坂庫出品價錢有點貴，但食到最尾仍然有魚生，性價比算高啦！

【相關報導】

旺中 vs 葵廣 4 大海膽手卷 邊間最正？