懷舊屋仔食曼谷街頭船河

最Hit食訊

發佈: 2016.10.24

文:

上環有間仿泰北地踎小店的人氣泰菜店「Chachawan」，爆辣爆有泰北 feel，日日爆場，但最估唔到係主理人唔係泰仔係鬼佬 Adam Cliff，這澳洲人憑泰菜獲得 2014 年 Tatler 頒發「Best New Chef」獎，當年最紅大廚是他。離開 Chachawan 後，他自立門戶，在藍屋附近開了這間泰麵店「Samsen」。

老闆兼行政總廚 Adam Cliff，採用每天從泰國空運的香草香料蔬菜及河粉煮麵，又用上泰國新鮮生果做沙冰凍飲，香味至夠 fresh。

店內設計靈感，源自泰國舊式老店上居下舖的裝潢，不少懷舊擺設品是老闆購自泰國的珍藏。

蟹肉炒飯 $108

蟹肉新鮮，泰國米粒粒分明，具鑊氣，吸收了炸蒜、香葱和蛋香，佐青檸魚露汁，清酸香甜，食到停唔到口。

起初以為鬼佬煮泰菜一定不倫不類，或遷就唔吃得辣的洋人，但 Adam 由 Chachawan 時代起，已經以菜式夠泰北風激辣、用料夠泰北而聞名，無論港人或洋人都豎起手指公讚好味。他大有來頭，先在倫敦一星米芝蓮泰菜名店「Nahm」當廚，之後去了曼谷生活多年，在當地首間高級正宗泰菜餐廳「Bo-Lan」當副廚，操得一口流利泰語，敢講九龍城的港式泰菜一定不及 Adam 的地道。

這店的懷舊裝潢，模仿曼谷常見的上居下舖式街頭粉麵舖，晚市打開一排門口木門，像置身曼谷路邊攤檔吃麵。賣 2 款船麵和 4 款炒河，最誇張每天從曼谷空運粉麵及大部分食材，如豬肉丸、通菜、蝦米、青檸、蒜頭、原粒青胡椒、野薑等來港，香港最具曼谷風味的泰式粉麵應該只此一家。

從泰國日日新鮮直送的有 Red basil 、Holy basil、青檸葉、紅葱頭、蒜頭、野薑等。

湯底也做得正宗，照足泰國路邊攤檔般以新鮮豬骨熬，加上多達 26 種香料包括南薑、茴香籽、蒜等，加上豬血熬夠 3.5 小時至濃稠狀，湯味豐富，令粉麵易吸湯。麵類供應泰國粉絲、幼身及粗身河粉，粗河原份由自己手切，保持鮮活富彈力。餸料把泰式街頭粉麵地踎貨 upgrade 了，選 M5 澳洲和牛和虎蝦。廚房使用火力猛的中菜專用爐頭，炒粉炒飯炒海鮮甚有鑊氣。小食、甜品、飲品都搵到我們在曼谷吃到那朕街頭味，香脆魚皮、泰式炸蛋、香草鴨肉沙律、自製斑蘭椰子湯圓、用泰國新鮮直送生果做的荔枝香茅梳打，通通都好味道！