舖頭 2010 年開業，分店全開在原宿、中目黑及代官山扮嘢潮人區，啱啱上星期嚟咗香港！本以為過江龍拉麵會好貴，睇睇單價，最平的叉燒拉麵先賣 $58，最貴集齊所有配料的「男盛」拉麵才 $88，單價真係平過好多拉麵店。
俺流熟成濃湯拉麵 $58
堅係無講笑認真地便宜，基本款式拉麵配上濃湯及叉燒，麵面仲放了柚子皮。濃湯鮮甜，但不像九州豚骨湯般又油又有豬羶味，麵條掛了湯，很滑溜又有嚼勁。
俺流男盛熟成拉麵 $88
「男盛」即男士拉麵，因為配料特別多啱大食男士，有 2 塊大大塊炸雞、半熟卵叉燒，配濃湯，叫呢碗連小食都使點。
本店 2010 年於澀谷成立，10 多家分店都位於代官山及原宿等潮人地帶，由小林健創立，麵店自創風格，雖是以豚骨煮湯，但不屬港人熟悉的九州拉麵門派。（官網截圖）
你見到呢度的拉麵湯底奶白色，可能會以為又係大路九州拉麵，咁你就錯晒啦。睇睇舖名「俺流」呢個 term，其實係指自家流派，創辦人小林健在不同風格嘅拉麵店工作過，這裏的拉麵集各家大成，好像取九州拉麵的湯底鮮香但又減咗豬羶味及油膩，又取味噌拉麵嘅濃稠口味，所以縱然用豚骨雞骨煲湯，湯底風格就是不同。
店內選用一粗一幼麵條由日本直送，由東京精品小型麵廠製作，2 款嚼勁都不俗，麵質幾滑。
客人可以自己添加梅子醬、柚子胡椒或黑蒜油醬，都是日本直送的。
拉麵分「濃湯」或「清湯」，兩者主要材料都是豚骨雞骨，濃湯好勁，用高壓煲煮 2 小時，高壓唔止逼晒啲骨味出嚟，連骨都化成粉，煲出奶白如豆乳嘅「熟成鹽湯」，濃稠香滑但出奇地唔油、又無豬羶味，全部都係骨膠原；清湯真係清，加咗蘋果文火煮，煮成湯色半透明，味道鮮帶鹹香的「鹽湯」，真係食到鹽味拉麵特色。
濃湯就是用這個超級壓力煲煲成，豬骨雞骨及蔬菜放在裏面高壓煮 2 小時，就灰飛煙滅，變成奶白色濃湯。
俺流特製撈麵 $72
用上粗身麵條，麵以橄欖油撈過，碗底放蒜蓉、醬油再拌勻 xo 醬，配日本蛋黃及炸蒜片，這款香口惹味，而且嚼感幾好。
俺流柚子拉麵 $72、俺流餃子 $28 六件（後）
清湯配上柚子條，柚子芳香與湯底鹽味很夾，炎熱天氣吃不會覺得飽膩，記者鍾意清湯，湯頭輕盈帶鹹香，肉味不濃，吃來口感很乾淨。
俺流芝士辛辣濃湯拉麵 $88
豬骨濃湯略稠，加埋辣味及芝士粉，口感幾 creamy，湯底辣度適中。
唐揚炸雞 $32/4 件
香港店是舖頭首間海外分店，總店自然全力拾卜，小林師傅不但派出首徒樫田師傅來監察及訓練員工，除了湯底是在香港製作，叉燒、醬料、調味料、麵條全是日本空運來。開店才 1 星期已經誇張，試過幾次 8pm 湯底賣到一滴不剩，潮人啊潮人，真係要朝拜下。
總店派出其中一位資深拉麵師傅樫田昭博來店監督，手法跟足日本，好似呢下為拉麵揈水，已是技藝超凡。
俺流塩らーめん
地址：屯門鄉事路 83 號 V City 一樓 L1-19 號舖
電話：2114 3388
營業時間：11:30am - 10:30pm（湯底賣完會提早關門）
文：sieg、攝：Jay
歡迎你 like 我哋 U Food Facebook Page / U Food Instagram ，取得我哋更新更快嘅資訊！
