葵芳食品嘉年華 8 個必 Check 小食攤位

發佈: 2016.11.03
文:

香港食品嘉年華已經舉辦到第五屆,今年喺葵涌運動場,仲搵到肥媽做美食大使,個生招牌夠響,多唔多嘢食㗎?小記行勻全場,真係好多選擇;揀咗心水 8 個 check points,想去嘅朋友參考吓。
1. Cute cute 串串鵪鶉蛋、章魚鬚 + 北京片皮鴨
無諗過美食嘉年華攤檔都食到片皮鴨!填鴨皮已片,客人走埋攤位,即點即包,食得方便。分量較細,但過口癮都夠食嘅。另外有鹽燒鵪鶉蛋,細細粒串起好得意;仲有深海章魚鬚幾好咬口,邊行邊吃好滋味。
片皮鴨材料喺枱面一眼睇晒!
操普通話的店員姐姐示範包片皮鴨。
北京片皮鴨 $30/ 盒
一盒有 4 件片皮鴨,外型幾似春卷,30 蚊算收貨。
鵪鶉蛋 $20 串、$30 兩串
街外少有鹽燒鵪鶉蛋,燒燶少少蛋邊加豉油食,有蛋香。
深海章魚鬚 $30
章魚鬚燒得香,好有咬口,不韌。
攤位:貝爾食品公司 C98-99 號舖
【相關報導】
中環海濱掃街 $80 食到乜?

2.台式味道:雞肉串、魷魚、蚵仔煎
離遠已見人頭湧湧!檔口賣幾款特底台灣風味小食,有香噴噴雞肉串、即燒大魷魚及蚵仔煎等,好似去咗士林夜市!
即燒大魷魚 $30/ 隻、$50/2 隻
勁大串燒魷魚,離遠未行到檔口已聞到香噴噴!大魷魚有成隻手掌咁大,好爽口;醬汁好惹味,咁大塊一定要同 fd 子些牙。
睇住姐姐做蚵仔煎,仲以為自己去咗士林。
蚵仔煎 $30/ 份、$50/2 份
去夜市唔少得蚵仔煎,不過呢份味道較淡,生菜絲多,如果再多啲蚵仔就 perfect!
雞肉串 $20/5 串、$30/8 串
典型台式燒雞肉串,食落有啲似五香肉丁,鹹鹹甜甜,當五香雞串食。
攤位:寶泰食品(香港)公司 C100 號舖
3.清爽解渴:椰子布甸、菠蘿仔
專賣泰式食品的檔攤,係小記全場至愛攤檔,可惜店員話最受歡迎嘅「椰青波」後日至返貨,唯有試其他椰子美食。
椰子布甸 $25(買四送一)
椰子肉化成滑滑布甸,雪成冰狀食好解渴,啖啖椰子肉 + 椰青水好清甜,小記大愛!
菠蘿仔 $15 至 $20 個
原個菠蘿仔好香甜,就咁聞已充滿果香,細或大 size 價錢不同。
攤位:浩信國際(貿易)有限公司 C106 號舖
【相關報導】
滑嘟嘟泰國椰青波波 香港有得飲!

4.女生最like:紫薯珍珠奶茶、雙色牛奶
紫薯風已經攻陷香港,紅磡特色飲品店 Color chacha 亦現身嘉年華,最好賣就係紫薯珍珠奶茶以及「雙子星」雙色牛奶,多 like 無他嘅,因為外型顏色真係好靚!
紫薯珍珠奶茶 $28(左)、雙子星 $30 (右)
珍珠奶茶唔係用茶包沖製,真係人手每天在工場煲茶葉泡茶,茶味香濃,加上自製紫薯珍珠,咬口十足。「雙子星」其實係蝶豆花 + 士多啤梨牛奶,做成夢奶粉藍及粉紅雙色效果,好少女。
愛芭樂 (三色) $28
先前有兩色芭樂飲品,最新推出三色,有芭樂、芒果、火龍果三種生果,三隻色放埋一齊勁 sharp。
攤位:灰熊娛樂有限公司 C92 號舖
5.人氣小甜品:芋圓豆腐花
近來甜品最潮係芋圓,現場都有芋圓,煙煙韌韌,仲配埋豆腐花,最正係唔太甜,好多人排隊爭住食。
芋圓豆腐花 $20
芋圓有三色,分別係紫薯、蕃薯及芋頭,芋圓及豆腐份量平均,味道不太甜,芋圓夠煙韌。
蘭香子飲品 $15/ 杯、$40/ 樽
台式飲品蘭香子有助清排便,有百香果、柑桔檸檬及蝶豆花味。
攤位:元利行 C94-95 號舖
【相關報導】
旺中無敵台飲 芋圓 x 珍珠奶茶

6.買畀阿媽手信:油浸鹹魚、香脆魚皮
店鋪招牌寫住馬友鹹魚專門店,好受太太歡迎!最人氣係油浸馬友鹹魚,街外無得賣,而且數量唔多,入到場睇咗就要買。
油浸馬友鹹魚 $110/ 樽、$200/ 兩樽
油浸馬友鹹魚只限場內有售,淡口而甘香;老闆指數量唔多,最啱買返屋企炒菜或做煲仔飯。
鹹魚干貝醬 $55/ 樽、$100/ 兩樽
加入馬友鹹魚肉,原條拆絲保留鹹香,有原味及辣味,炒飯、蒸肉餅一流。
香脆深海魚皮 $12/ 包、$50/6 包
有 6 種口味深海魚皮,炸得脆口,又到打邊爐季節,烚吓烚吓食一流。
攤位:香港潤志 B18-19 號舖
7.即買即磨甘香芝麻醬
雖然人頭湧湧,行近檔口已聞到濃濃黑芝麻香,仲有冷壓機即場生磨成芝麻醬,不添加糖份,好健康!
即磨芝麻醬 $68樽、$120 兩樽、$320 六樽
現場有機器即場生磨芝麻醬,運用冷磨法保留營養兼原汁原味,可製成芝麻糊、湯丸、塗麵包及沖咖啡、麥皮等。
攤位: 港豐發展公司 B23-24 號舖
8.好足料:D24 榴槤蓉
主要賣馬來西亞榴槤食品, D24 榴槤蓉好香濃,甜而不漏。
馬來西亞 D24 榴槤蓉 細$30、大$100
馬來西亞 D24 榴槤蓉,啖啖香,榴槤 fans 必試。
馬來西亞 D24 100% 純榴槤蓉 $250
100% 純榴槤蓉,不含忌廉、牛奶,味道超濃郁。
海燕榔皇凍 $35
有原味及桂圓黑糖兩種味道,可凍食或燉熱食,小記就覺得冬天熱食比較滋潤。
攤位:馬來西亞商務(香港)有限公司 A07 號舖
第 5 屆香港食品嘉年華
地址:新界葵涌運動場
日期:即日至 11 月 6 日
時間:11am-8pm
網址:http://www.foodhk.com.hk
停止售票時間:11 月 1 至 5 日 7:30pm,11 月 6 日 7pm
費用:$5/ 位、身高 1 米或以下小童、65 歲或以上長者及殘疾人士免費進場
文:Celia、攝:Paul
【相關報導】
Weekend 掃食!中環海濱 5 大 Best Pick


歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【限時搶⚡】Kilo Calo慢煮即食雞胸套裝!↓

↓ 雞胸經低溫慢煮烹調!/ 提供研製多時的獨特口味!↓


↓【必收藏】最新深圳食買玩攻略!↓

↓ 大灣區一小時生活圈!最新打卡熱點/熱門美食等!↓

more