屋邨熟食檔 $118 無限時任食串燒

發佈: 2016.11.06
文:

秋風起,乜嘢會肥?咪我同你囉!天氣涼啲就想瘋狂 BBQ!沙田呢個屋邨嘅熟食檔,就有間餐廳有串燒放題, 百幾蚊任食任燒,仲要無限時!堅筍?記者放蛇試吓質素先!


呢個串燒放題,沙田友應該早早知道;舖頭喺博康邨,搭港鐵喺沙田圍站 B 出口行兩分鐘就到。不過,餐廳 6pm 先開,熟食檔仲要隱藏於屋邨入面,都幾隱蔽㗎, 區外人搵到嚟。今次介紹佢哋嘅任食自助重慶燒烤, 星期一至四每位 $118,星期五至日 $128兼唔收加一, 列明有 40 多款食物選擇,好抵咁啵!老闆娘話現在暫未限時,踏入冬天,即係 12 月,就會限時 3 小時,都足夠吃到飽了。

【相關報導】
碟碟 $48 抵食均真本地牛火鍋


任食串燒喺露天位置,只有風扇,無冷氣,好在而家天氣涼涼哋, 唔會食到成身汗,有涼風吹過都幾舒服!露天另一好處係食完唔會成身油煙!


屬全自助形式,店員帶你入座、開爐,你就要自己搵食! 食物放於凍櫃中,預先串好放於不銹鋼盤內, 再置於冰塊上保冷。再用膠蓋蓋好,好似幾衛生。


凍櫃上嘅食物以肉類、丸類為主,先嚟好吸引嘅原條秋刀魚,幾大條喎。


羊架屬薄切,易燒熟,有香草調味。


魷魚片無醃味,都唔細塊㗎!


金莎骨一大堆,size 比較細,亦係方便快啲燒熟有得食。

【相關報導】
隱密發現!伊斯蘭餐廳有平茶飲?


肉類串燒,有雞肉、牛肉等選擇, 不過試食當晚一打開肉類串燒嘅膠蓋,就聞到陣陣酸味。


放棄肉類串燒,仲有多春魚選擇。


蔬菜類放於另一個有蓋雪櫃內,粟米、青椒、菠蘿必食, 仲有洋葱片、韮菜、雞髀菇、翠玉瓜等。


飲品每人兩罐,多數都是康師傅出品及樽裝水。但喺康師傅下面,原來收埋咗啲檸檬茶!


埋位開餐,個爐係 gas 唔係炭爐,失望。爐嘅面積唔細,可以一次過放到十幾串食物。


調味方面好簡單,任拎豉油或勁辣沙嗲醬。


仲有孜然粉畀你任落調味。


燒烤肚餓必食快熟腸仔,呢度用咗廚師腸,唔係古怪味雜牌腸仔。


羊架薄切食落無啖啖肉嘅口感,但勝在快熟、脂肪少、肉質腍, 帶少少羶味,合格。


金莎骨是必食,醃得入味,腍滑有肉汁。


肥仔之選!豬大腸!餐廳清潔得夠乾淨,無異味!油脂燒到香香,好惹味。


BBQ 唔食雞翼,呢餐唔算數!都算但隻,但只得香草味一款,唔夠!亦醃得唔夠入味, 建議一邊燒一邊抹上豉油或勁辣沙嗲醬自製沙嗲雞翼。

【相關報導】
食燒雞翼 發現燒菠蘿


芝士薯蓉,唔會拉絲的。薯蓉食到粒粒薯仔粒, 但芝士味怪怪的。


原條秋刀魚油脂好足,燒時好搶火。魚肉白雪雪幾新鮮,魚肉結實、 唔會太腥,可以encore!


菠蘿片燒到表面焦香,有陣焦糖香,好多汁,小心辣嘴。

小評:
試食當日9:30pm 到餐廳,只有 4 枱客食串燒, 由於無乜人嘅關係,食幾耐都無職員趕你走。小記戰鬥力一般, 但見隔離枱嘅 4 位熱血青年,10 隻雞翼一 round, 轉頭成個爐又鋪滿串燒,食足 3 個鐘,咁食法肯定回本!講食物質素,老實說是一般的;可能記者放蛇當晚係平日,食物流量慢;希望假日流量快,食物新鮮度會改善。如果你是食肉獸、無乜要求、 只求瘋狂喪食瘋狂燒嘅話,可以一試嘅!


隱世貮館
地址:沙田博康村熟食檔地下 8 號鋪
電話:6659 8087
營業時間:6pm-12mn
任食重慶燒烤收費:星期一至四 $118/ 位,星期五至日 $128/ 位,不設加一

文、攝:Jessie

【相關報導】
$88 印度自助餐 任食咖喱春卷烤餅
3 小時韓式 Brunch 任食炸雞年糕五花腩
中環人秘點!$110 半山靚景 Buffet


歡迎你 like 我哋 U Food Facebook Page / U Food Instagram ,取得我哋更新更快嘅資訊!

↓【出Post賺現金賞】《社群》助您發展創作者事業↓

↓透過發佈帖文賺取收入!立即參加!↓


↓【限時搶⚡】Louiscocoa鳳梨啤酒口味可可即沖營養代餐奶昔!↓

↓ 首創含微量酒精代餐 / 嚴選高級可可粉 / 加水即沖即飲!↓

more